Diosan munasiñapajj wiñayatakiwa

1, 2. Jan waltʼäwinakan uñjasisajj ¿kunjamsa walja jilat kullakanakajj jikjjatasipjje?

LAMAR qotankir mä barcos oladanakampi uksar aksar apatäkaspa ukham amuytʼañäni. Uka barcojj oladanakampi jan yaqha cheqar apatäñapatakejja, mä ancla qotar jaqontañakiw yanaptʼaspa.

² ¿Jumajj mä jan walinti uñjasiskta? Ukhamächi ukhajja, oladanakamp uksar aksar apatäki uka barcor uñtasitäkasmas ukhamwa amuyasisma. Mä urojj Jehová Diosan jumar munasitapatsa jumar yanaptʼaskatapats janiw payachaskasmati. Ukat mä jukʼa tiempotjja, Jehová Diosajj janis yanaptʼjjeristam ukhamwa amuyjjarakisma (Sal. 10:1; 13:1). Ukhaman jikjjatasisajja, inas mä munat amigomajj mä qhawqha arunakamp chʼamañchtʼiristam. Ukaw mä qhawqha tiempo sumak jikjjatasiñatak yanaptʼiristam (Prov. 17:17; 25:11). Ukat mä jukʼa tiempo pasatatjja, wasitatwa Jehová Diosajj janis jumat llakiskaspa ukham amuyjjarakisma. Jumatï ukhaman uñjassta ukhajja, ¿kunas “mä anclar” uñtasitajj yanaptʼarakiristam? Mä arunjja ¿kunas Diosan munasiñapata ukat yanaptʼapat jan payachasiñatak yanaptʼiristam?

3. 1) ¿Munasiñat jan jaytjasirïñajj kamsañs muni? (Salmo 31:7; Salmo 136:1). 2) ¿Kunatsa taqenit sipans Jehová Diosakiw uk uñachtʼayaspa sasin sissna? (Dibujo uñjjattʼarakïta).

³ Mä jan waltʼäwin uñjasiñäni ukhajja, Jehová Diosan munasiñat jan jaytjasirïtapwa amtañasa, ukaw “mä anclar” uñtasitäspa (Salmo 31:7; 136:1 liytʼäta). ‘Munasiñat jan jaytjasiri’ siski uka arunakajja, maynir taqe chuyma munasiñat janipun kunäkipans jaytjaña sañwa muni. Taqenit sipansa Jehová Diosaw ukham chuymanejja. Cheqas Bibliarjamajja, Jehová Diosajj ‘wali munasiñat jan jaytjasiriwa’, servirinakaparus walpun munasiraki (Éx. 34:6, 7; Sal. 86:5). Ukhamajj Jehová Diosajj janipuniw jupat jan jitheqtir servirinakaparojj jaytjkaniti, uk amtañaw jan waltʼäwinakamp jan aynachtʼañatakejj yanaptʼiristam (Sal. 23:4).

JEHOVÁ DIOSAN MUNASIÑAPAROJJ BIBLIAN MÄ WAKISKIR YATICHÄWIPARJAM UÑJAÑÄNI

4. ¿Biblian wakiskir mä qhawqha yatichäwinakapajj kawkïrinakasa? ¿Ukanakat yateqjjasajj kunatsa jan payachasjjta?

⁴ Jehová Diosan munasiñapajja, Biblian mä wakiskir yatichäwiparakiwa, ukaw jan waltʼäwinakan uñjasktan ukhajj “mä anclar” uñtasitäspa. ¿Kunas jumatakejj Biblian mä wakiskir yatichäwipajja? Bibliat yatjjatkasajj qalltan yateqktan uka cheqa yatichäwinakawa. Ukanakat mä qhawqhajj akanakäspawa: Diosan sutipajj Jehová satawa, Jesusajj Jehová Diosan mä sapa Yoqapawa, jiwatanakajj janiw kunsa yatipkiti, aka oraqejj mä paraisöjjaniwa, ukat walja jaqenakaw ukan wiñayatak jakapjjarakini (Sal. 83:18; Ecl. 9:5; Juan 3:16; Apoc. 21:3, 4). Uka yatichäwinakajj cheqäskapunitap creyjjtan ukhajja, ¿janejjay uka yatichäwinakat jukʼamp payachasjjtantejja? Jehová Diosan munasiñaparojj Biblian mä wakiskir yatichäwiparjam uñjäta ukhajja, Jehová Diosan jumar munasitapatsa jumat llakisitapatsa, janiw payachasjjätati. Uka toqet jukʼamp amuytʼaskakiñäni.

5. ¿Kunjamatsa maynejj kʼari yatichäwinakar jan creyjje?

⁵ Bibliat yateqañ qalltawaykta ukhajja, ¿kunas kʼari yatichäwinak jaytañatakejj yanaptʼawaytam? Inas kuntï religionamajj yatichkayätam ukat kuntï Bibliajj yatichki ukamp igualtʼaychiyäta. Jesusajj Diosawa sasins creykasmäna ukham amuytʼañäni. Bibliat yatjjatkasajja, “¿ukajj cheqäpachati?” sasaw jisktʼasiyätajja. Ukat Bibliat yatjjatasajj ukajj kʼarïtapwa amuyjjayätajja, ukat janiw uka kʼari yatichäwir creyjjayätati. Jan ukasti Bibliat yatjjatasajj Jesusaw Diosan ‘taqpach luratanakapat nayrïrejja’ ukat ‘Diosan sapa Yoqapawa’ sasaw creyjjarakiyätajja (Col. 1:15; Juan 3:18). Cheqas kʼari yatichäwinakajj jachʼa perqar uñtasitäspawa, ‘ukanak allthapiñajj’ wali chʼamäspawa (2 Cor. 10:4, 5). Ukampis uka yatichäwinakajj jan cheqätap yateqjjtan ukhajja, janiw wasitat uka kʼari yatichäwinakarojj creyjjtanti (Filip. 3:13).

6. Salmo 136 textonjja ¿kunatsa “munasiñat jan jaytjasirïtapajj wiñayatakiwa” sasin siski uka arunakajj walja kuti uñstpacha?

⁶ Mä jan walin uñjasisajj Jehová Diosan munasiñapat payachasïta ukhajja, akhamwa jisktʼasisma: “¿Cheqapunit Diosajj jan munaskpachïtu?” sasa. Ukatjja kuntï Salmo 136:1 texton Jehová Diosan munasiñapat siski ukwa amuytʼasma, aka yatichäwejj uka textorjam wakichtʼatawa. ¿Kunatsa uka texton Jehová Diosajj munasiñat ‘jan jaytjasiriwa’ sasin sispacha? ¿Kunatsa uka salmon “munasiñat jan jaytjasirïtapajj wiñayatakiwa” sasin 26 kuti uñstpacha? Kunjamtï uñjktanjja, Jehová Diosajj markapar munasiñat jan jaytjki ukajj Biblian mä wakiskir yatichäwiparakiwa. Ukjja qalltan Bibliat yateqkayäta uka yatichäwinakjamaw katoqasiñamaraki. Jehová Diosajj janiw munaskituti sasajj janiw amuyañasäkiti. Ukhamtï amuystan ukhajja, mä kʼari yatichäwirjamaw jankʼak apanukuñasa.

7. ¿Kawkïr textonakas Jehová Diosan jiwasar munasitap uñachtʼayistu?

⁷ Jehová Diosajj jiwasar qhawqsa munasistu uk uñachtʼayir walja textonakaw Biblian utji. Pä textonakat amuytʼañäni. Jesusajj discipulonakaparojj akham sänwa: “Jumanakajj walja gorrión jamachʼinakat sipansa jukʼampi valoranïpjjtawa” sasa (Mat. 10:31). Jupajj janiw akham siskänti: “Inas jumanakajj walja gorrión jamachʼinakat sipansa jukʼampi valoranïpjjsta” sasa. Pachpa Jehová Diosajj markapar akham sarakïnwa: “Nayaw jumarojj chʼam churäma, jïsa, nayaw jumarojj yanaptʼäma. Cheqpachapuniw jumarojj cheqapar lurir kupi amparajampejj katjjasïma” sasa (Is. 41:10). Janiw Jehová Diosajj markaparojj “inas yanaptʼchïma” sasajj siskänti. Ukhamajj mä jan walin uñjasisatï Jehová Diosan munasiñapat payachasïta ukhajja, uka kasta textonakajj janiw sumak jikjjatasiñatakik yanaptʼkätamti, jan ukasti Jehová Diosan munasiñapat jan payachasiñatakiw yanaptʼätam. Uka textonakat lupʼisajj kunanakatï payachasiyktam uka toqenakatwa Jehová Diosar oracionan parltʼasma. Ukhamtï lurätajja, nayrïr patak maranakan jakir cristianonakjamarakiw akham säta: “Qhawqsa Diosajj munasistu uk jiwasajj yattanwa, creyiraktanwa” sasa (1 Juan 4:16).a

8. ¿Jehová Diosan munasiñapat payachasiskakstan ukhajj kunsa lurañasa?

⁸ Jehová Diosan munasiñapat payachasiskaksta ukhajja, janiw kuntï chuymaman amuykta ukampejj apayasiñamäkiti, jan ukasti kuntï Biblian Jehová Diosan munasiñapat yateqawaykta ukaruw creyiñama. Amtapuniñäni, Bibliajj kunatï cheqäki ukpunwa yatichistu, ukampis chuymasajj engañjistaspawa. Jiwasatï Jehová Diosajj janis munaskistaspa ukham amuysna ukhajja, Diosajj janiw munasirïkiti sisksnas ukhamäspawa (1 Juan 4:8).

QHAWQSA JEHOVÁ DIOSAJJ MUNASISTU UK LUPʼIPJJAÑÄNI

9, 10. “Awkejj jumanakar munasipjjtamwa” sasajj ¿kuna toqetsa Jesusajj parlaskäna? (Juan 16:26, 27; fotonak uñjjattʼarakïta).

⁹ Jehová Diosan munasiñapat jan payachasiñatakejja, kuntï Jesusajj siskäna uk amuytʼañaw yanaptʼarakistani. Jupajj discipulonakaparojj akham sänwa: “Awkejj jumanakar munasipjjtamwa” sasa (Juan 16:26, 27 liytʼäta). ¿Kunatsa Jesusajj ukham sispachäna? ¿Sum jikjjatasipjjañapatakikit ukham sispachäna? Janiwa. Uka versiculonak nayrajja, janiw kunjamsa discipulonakapajj jikjjatasipjjäna uka toqet Jesusajj parlkänti, jan ukasti oracionatwa parlaskäna.

¹⁰ Jesusajj sutipjjar orasipjjañapatakiw discipulonakapar mayïna, janiw jupar orasipjjañap maykänti (Juan 16:23, 24). Uk discipulonakapajj sum amuyapjjañapäna. Niyakejjay Jesusampejj wali suma amigöpjjchïnjja, Jesusajj jiwatat jaktanjjäna uka qhepat jupar orasiñwa munapjjaspäna. Inas jupanakajj akham amuyapjjchispäna: “Jesusajj jiwasarojj wal munasistu, jupajj oracionanakasarojj istʼistaniwa, ukat jupaw kuntï mayktan uk Jehová Diosar yatiyaskani” sasa. Uk amuyañajj janiw walïkaspänti, ukatwa Jesusajj akham sasin qhan sispachäna: “Awkejj jumanakar munasipjjtamwa” sasa. Jehová Diosajj wal munasistu, ukatwa oracionanakas jupa pachpa istʼistu, ukajj oracionat parlir Biblian mä wakiskir yatichäwipawa. Bibliat yateqasajj jumajj ukhamarakiw Jesusar uñtʼawaytajja, juparus munasjjaraktajja (Juan 14:21). Ukampis nayrïr cristianonakjamarakiw “Jehová Diosajj munasituwa, jupajj oracionanakajar istʼitaniwa” sasin taqe chuym confiyas orasisma. Jehová Diosar sapa kuti orasisajja, jupajj jumar munasitapat jan payachasitamwa uñachtʼayasktajja (1 Juan 5:14).

KUNATSA PAYACHASTAN UK SUM AMUYAPJJAÑÄNI

11. Jehová Diosan munasiñapat payachasktan ukhajj ¿kunatsa Supayajj kusisi?

¹¹ ¿Khitis Jehová Diosan munasiñapat payachasiñas muni? Mä toqetjja, Supayaw payachasiñas muni. Jupajj sapa mayni jiwasar ‘manqʼantañwa thaqaski’, Jehová Diosajj janis munaskistaspa ukham amuyañaswa jupajj munaraki (1 Ped. 5:8). Ukampis Jehová Diosajj munasiñapatwa Yoqaparojj jiwas layk khitaniwayi. Uka suma regalo katoqasiñajj janis jiwasar waktʼkistaspa ukham amuyañaswa Supayajj muni (Heb. 2:9). ¿Khitis Jehová Diosan munasiñapat payachasktan ukhajj kusisi? Supayaw kusisi. Jan walinakan uñjasisin aynachtʼktan ukhajj Supayaw kusisiraki. Ukampis ¡jupaw Jehová Diosamp jan munatäjjeti! Ukatwa jupajj janis Jehová Diosajj jiwasar munasjjestaspa, janis Diosamp sum uñjatäjjsna ukham amuyañas muni. Ukajj Supayan mä engañjir trampapawa (Efes. 6:11). Uk yatiñajja, jupa contra saytʼasiñatakiw chʼam churistu (Sant. 4:7).

12, 13. Nayrïr awk taykasat juch katoqawayktan ukajj ¿kunatsa Jehová Diosan munasiñapat payachasiyistaspa?

¹² Maysa toqetjja, nayrïr awk taykasat juch katoqatasatwa Jehová Diosan munasiñapat payachassna (Sal. 51:5; Rom. 5:12). Juchajj Jehová Diosatwa jayarstʼayawayistu, amuyussa, chuymassa, cuerpossa jan waltʼayawayarakistuwa.

¹³ Juchararätas laykojj wali pantjasirïksnasa ukhamwa amuyastanjja, llakisiraktanwa, payachastanwa, phenqʼasiraktanwa. Juchar purtʼasktan ukhaw ukham jikjjatassnajja. Ukat ¿kunapachas ukham jikjjatasiraksna? Sapa kut pantjasirïtas yatisaw ukham jikjjatasiraksna. Kuna laykutejj kunjamtï Diosajj lurtʼawaykistu ukat wali jayarstʼatäjjtanwa (Rom. 8:20, 21). Kunjamtï mä autojj piñchat llantanïsajj jan sum sartkejja, pantjasirïtas laykojj jiwasajj ukhamarakïtanwa. Ukatwa awisajj Jehová Diosan munasiñapat payachastanjja. Ukham jikjjatasisajja, Jehová Diosajj ‘jachʼa musparkañ Diosätapa. Jupar munasipki mandamientonakapsa phoqapkaraki ukanakar munasiñat jan jaytjirïtapwa’ amtañasa (Neh. 1:5).

14. Jehová Diosan munasiñapat jan payachasiñatakejj ¿kunjamsa Jesusan jiwas layk jutatapat lupʼiñajj yanaptʼistu? (Romanos 5:8; “‘Jan juchan chʼamapamp engañjayasipjjamti’” siski uka recuadro liytʼarakïta).

¹⁴ Awisajja Jehová Diosajj jiwasar munasiñamp uñjañapajj janis wakiskaspa ukhamwa amuyassna. Cheqas jupamp suma uñjatäñajj janiw waktʼkapunistuti. Ukhamäkchisa kunja munasiñampis Diosajj uñjistu ukajj wali musparkañawa. Jupajj jiwasar munasiñamp uñjañapatakejj janiw kuns lurksnati. Ukhamäkchis jiwasar wal munasitapatwa juchanakasat perdonatäñasatakejj Yoqapar khitaniwayi (1 Juan 4:10). Ukampis akwa amtañasa: Jesusajj janiw perfecto jaqenakar salvir jutkänti, jan ukasti jucharar jaqenakar salviriw jutäna (Romanos 5:8 liytʼäta). Jehová Diosajj janiw taqe kuns perfecto lurañas suykiti, kuna laykutejj jan pueditas jupajj sum yati. Nayrïr awk taykasat juch katoqawayktan ukajja, Jehová Diosan munasiñapat payachasiyistaspawa, uk yatisajj jukʼampiw uka amuyump jan apayasiñatakejj chʼamachastanjja (Rom. 7:24, 25).

JEHOVÁ DIOSAT JAN JITHEQTAÑ AMTAPJJAÑÄNI

15, 16. Janitï Jehová Diosat jitheqtkañäni ukhajj ¿kunatsa jan payachaskañäni, ukat kunatsa? (2 Samuel 22:26).

¹⁵ Jan walinakan uñjasisajja, Jehová Diosajj jupat jan jitheqtañasa ukat suma amtanakar puriñaswa muni (Deut. 30:19, 20). Jiwasatï jupat jan jitheqtkañänejja, janirakiw jupajj kunäkipans jaytjkistaniti (2 Samuel 22:26 liytʼäta).

¹⁶ Jan walinakan uñjasisajja, kunjamtï mä barcon anclapajj qotar jaqontaskejj ukhamwa lurañasaraki, mä arunjja, qhawqsa Jehová Diosajj munasistu ukwa amtañasa, jupajj yanaptʼapunistaniwa. Ukat Jehová Diosan munasiñapat payachasiñäni ukhajja, janiw chuymasan amuyupampejj apayasiñasäkiti, jan ukasti qhawqsa Jehová Diosajj munasistu ukwa amtañasa. Jehová Diosan munasiñat jan jaytjasirïtapajj wiñayatakiwa, Biblian uka wakiskir yatichäwipat janipun payachasipjjañäniti.