Jehová Diosajj yanaptʼapjjapunitänwa

Mats ukat Ann-Catrin jilat kullakajja, 1979 maranwa Galaad Escuelar sarapjjäna, uka qhepatjja Irán, Mauricio, Myanmar, Tanzania, Uganda ukat Zaire markanakanwa servipjjäna. Galaad Escuelanjja, kunayman asignacionanak katoqasipjjañapataki kawkinkkasas Jehová Diosar kusisit servipjjañapatakiw Jack Redford jilatajj ewjjtʼäna, uka ewjjtʼajj kunayman asignacionanak katoqkasajj wal uka matrimonior yanaptʼäna. Jichhajj jupanakaw cuenttʼapjjestani.

¿Kunjamsa Jehová Diosar uñtʼawayapjjta uk cuenttʼapjjetasmati?

Mats: Segunda Guerra Mundialanjja, papitujajj Polonia markanwa jakäna, ukan católica Iglesiajj jan Bibliarjam phoqatapwa amuyäna. Ukhamäkchïnsa “mä cheqpach religionajj utjapunpachawa” sasaw sirïna. Tiempompejja ukhamäskapunitapwa amuyayäta. Libronak alasiñaw gustitäna, mä urojja La verdad que lleva a vida eterna sat mä azul libro alasiyäta. Uka titulojj kamsañs muni uk wal yatiñ munayäta, ukatwa uka arumpach taqpach libro liysuyäta. Qhepärmanthi alwajja, cheqa religión jikjjatatajwa amuyayäta.

Abril de 1972 maratjja, Jehová Diosan Testigonakapan walja qellqatanakapwa liytʼawayta. Ukanakanjja Biblia toqet jisktʼanakajj utjkitäna uka respuestanakwa jikjjatawayta. Jesusajj suma perlanak thaqer comerciantet parlkäna uka comerciantëkiristsa ukhamwa amuyasiyäta, uka comerciantejj wali valorani mä perla jikjjatasajja, taqe kunanakapatï utjkäna ukanakwa uka “perla” alañatakejj aljäna. Nayajj ukhamarakiw Jehová Diosar serviñ laykojj doctoräñatak universidadar sarañ amtkayäta uk jaytayäta (Mat. 13:45, 46). Ukat 10 de diciembre de 1972 maranwa bautisasta.

Awk taykajasa sullka jilajasa, mä maranakwa Bibliat yateqasajj bautisasipjjäna. Julio de 1973 maranwa precursor regularat serviñ nayajj qalltarakiyäta. Suma uñnaqtʼani ukat Dios chuyma mä precursoraw congregacionajankäna, jupajj Ann-Catrin satänwa. Uñtʼasisajj 1975 maranwa casarasipjjta, ukat pusi maranakaw Strömsund markan servipjjta, Suecia markankir uka suma markanjja, walja jaqenakaw Bibliat wal yatiñ munapjjäna.

Ann-Catrin: Estocolmo markan universidad niy tukuyaskäna ukhaw papitujajj Bibliat yateqañ qalltäna. Kimsa phajjsinikïskchiyätsa, papitujajj tantachäwinakarusa predikiris apapunirïtanwa. Ukajj janipuniw mamitajarojj akchʼas gustkänti. Kuntï Testigonakajj yatichapki ukajj kʼarïtapwa jupajj uñachtʼayañ munäna. Uk jan uñachtʼayañ puedisajja, tiempompejj bautisasjjarakïnwa. Nayajj 13 maraniw bautisasta, 16 maraniw precursoräjjarakiyäta. Niyakejjay Umeå markan predikirinakajj wal munaschïnjja, ukanwa serviyäta. Qhepatjja precursora especialat serviñatakiw invitapjjetäna.

Casarasisajja esposojampejj waljaniruw Bibliat yatichawayapjjta, jupanakat maynejj Maivor tawaqetawa, jupajj deporte toqen nayraruw sartaspäna, ukampis Diosar serviñ laykojj uk jaytänwa. Sullka kullakajamp chikaw precursorat servïna. Panpachanirakiw 1984 maran Galaad Escuelar sarapjjäna, jichhajj Ecuador markanwa misionerat servisipki.

Niyakejjay walja lugaranakan misionerot serviwayapjjstajja, ¿kunas uka lugaranakan yatinoqtañatakisa asignacionanakam kusisit chuymamp phoqañatakis yanaptʼawayapjjtam?

Mats: Walja kutiw mä lugarat yaqha lugarar asignapjjetäna. Ukampis uka lugaranakan yatinoqtañatakejja, Jesusat yateqasiñaw yanaptʼawayapjjetu, jukʼampis Jesusan humilde chuymanïtapat yateqasiñaw yanaptʼawayapjjetu (Col. 2:6, 7). Sapa lugarankir jilat kullakanakajj kunanak lurañar yatitäpjjesa, kunjamsa mä toqet amuytʼapjje ukanak amuyañatakiw chʼamachasipjjayäta. Jesusat yateqasiñatak jukʼamp chʼamachasisajja, ‘jawiranak jakʼan ayruntat mä qoqjamäpkiristsa’ ukhamaw amuyasipjjayäta. Ukaw kunayman lugaranakan kusisit chuymamp Jehová Diosar serviñatak yanaptʼawayapjjetu (Sal. 1:2, 3).

Ann-Catrin: Yaqha lugarar ayruntat mä qoqan jilaskakiñapatakejja, lupi qhanaw munasiraki, nanakatakejj Jehová Diosaw lupi qhanar uñtasitänjja (Sal. 84:11). Jilat kullakanakajj munasiñamp uñjapkitäna ukajj Jehová Diosan mä suma regalopänwa. Teherán (Irán) markankir jiskʼa congregacionankir jilat kullakanakajja, Diosan nayra servirinakapjam katoqtʼasiri wajjtʼasiri ukhamäpjjänwa. Irán markan quedasiñ wals munapkchiyätjja, julio de 1980 maranwa Gobiernojj Testigonakar jarkʼañ qalltäna, ukatwa aka markat sarjjañatakejj pä urunikïpjjtawa sasin sapjjetäna. Africankir Zaire markaruw asignapjjetäna, jichhajj uka markajj República Democrática del Congo sutimp uñtʼatäjjewa.

African serviñatak asignatäpjjataj yatisajj wal jachayäta, uka cheqan walja asirunak utjatapa usunak utjatap yatisajj wal ajjsarayasiyäta. Ukampis walja maranak África markan serviwayapki uka pä amigonakajajj akham sapjjetänwa: “Janïraw Africankapktati, sarapjjam, janiw ukat sarjjañ munapkätati” sasa. Ukhamapunïnwa Africankir jilat kullakanakajj wali munasirïpjjänwa. Sojjta maranak qhepatjja, Zaire markankir Testigonakajj jarkʼataw uñjasjjapjjäna, ukatwa Africat sarjjapjjañajäna. Ukampis “African quedasiyapjjakitaya” sasaw Jehová Diosar mayisiyäta. Ukat kuntï mayiskayäta uk amuyasisajj lartʼasiyätwa.

Jehová Diosar sirvkasajj ¿kuna kusiskañ experiencianakanïpjjtasa?

Mats: Akanakatwa amtasta: yaqha markankir misioneronakaruw uñtʼawayapjjta. Yaqhep markanakanjja, waljaniruw Bibliat yatichawayapjjta. Awisajj 20 estudionakaniyätwa, esposajas ukhamaraki. Africankir jilat kullakanakajj kunja munasirïpjjänsa, kunja wajjtʼasirïpjjänsa uks janirakiw armapkti. Tanzania markankir congregacionanakar visitasipkayäta ukhajja, Volkswagen Kombi autoj jilat kullakanakan utap jakʼaruw saytʼayapjjerïta. Uka autow nanakatakejj “uta” lantïnjja. Ukankir jilat kullakanakajj wali wajjtʼasirïpjjänwa, “qhawqhatï jupanakan utjkäna ukat sipansa jukʼamp chura[pjjetäna]” (2 Cor. 8:3). Chacha warmjamajj “parltʼasiñatak horasa” sat mä horariow utjapjjetäna. Sapa arumaw janïr ikintkasajj esposajampejj kunanaktï urun lurawayapkta ukanakat parltʼasipjjerïta, Jehová Diosaruw taqe ukanakat yuspärapjjarakirïta.

Ann-Catrin: Nayatakejj oraqpachankir jilat kullakanakar uñtʼañajj wali kusiskañapunïnwa. Francés, luganda, persa ukat suajili arunakwa yateqawayapjjta. Kunayman jakasir jaqenakaruw uñtʼawayapjjarakta. Jichhak bautisasiwayapki uka jilat kullakanakaruw Diosar serviñan yanaptʼawayapjjta. Suma amigonakwa jikjjatawayapjjta, mayachtʼataw jupanakampejj Jehová Diosar serviwayapjjarakta (Sof. 3:9).

Jehová Diosan walja luratanakapwa uñjawayapjjarakta. Yaqha asignación katoqasajja, Jehová Diosan irpat yaqha lugararus sarapkirista ukhamwa amuyasipjjerïta. Jupajj waljanakwa yatichawayapjjetu, janiw sapajj ukanak yateqapkiriskayätti.

¿Kuna jan walinakansa uñjasiwayapjjta, ukat kunjamsa ukanakar saykatawayapjjta?

Mats: Taqe aka maranakanjja juntʼu toqenkir usunakwa katuwayapjjta, ukanakat mayajj malariawa (jan ukajj paludismo). Mä qhawqha kutis esposajajj operasirakïnwa. Awk taykanakajas jilïrëjjapjjarakïnwa, ukas llakisiyapjjarakitänwa. Ukampis jil kullakanakajaw pacienciampi ukat munasiñampi jupanakar cuidapjjäna, walpun jupanakar ukat yuspärapjjta (1 Tim. 5:4). Ukhampachas awisajj llakisisipkakiyätwa, jayankapjjataj laykojj janiw kunjamtï munapkayäta ukham awk taykajar yanaptʼañ puedipkayätti.

Ann-Catrin: 1983 maranjja, Zaire markankkasaw mä jan wali usump qʼal usuntayäta. Doctorajj akham sasaw esposojar säna: “¡Jichhürpachaw aka markat sarjjapjjañama!” sasa. Qhepürpachaw Suecia markar carganak apir mä avionat sarapjjayäta.

Mats: Esposamajj janiw waliptkaniti sasas doctorajj sapkchitänjja, jupajj waliränwa. Ukhamäkchïnsa janiw misionerot sirvjjpachäñäniti sasaw wal jachapjjayäta. Ukampis mä mara qhepatwa Zaire markar kuttʼapjjayäta, Lubumbashi markankir suajili aru parlir mä jiskʼa congregacionanwa servipjjarakiyäta.

Ann-Catrin: Lubumbashi markankasipkayäta ukhajja, usuriptayätwa, ukampis janïr naskipanwa wawajajj jiwjjäna. Janis wawanïñ piensapkchiyätjja, wawajan jiwatapat walpun llakisiyäta. Uka tiempon Jehová Diosajj mä suma regalo churapjjetäna, nayrat sipans waljanirupuniw Bibliat yatichañ qalltapjjayäta. 35 publicadoranakakiw congregacionan utjäna, ukampis janïraw ni mä maräkänsa 70 publicadoranakaw utj-jjäna. 40 ukhaniw tantachasipjjeriyäta, qhepat 220 ukhaniw tantachasjjapjjayäta. Jan tiemponiw predicapjjayäta, Jehová Diosajj nanakar bendisiskatap amuyañajj wal chuymachtʼitäna. Ukhampachas wawajat amtasisipkaktwa jupats parlapjjapuntwa. Wawajan jiwatapat wali chuyma ustʼatäpkta uk askichañatakejj kunsa Jehová Diosajj lurani uk wal uñjañ munapjjta.

Mats: Mä qhawqha tiempotjja, esposajajj jan chʼamani ukat qarita ukhamakiw jikjjatasjjäna. Nayarojj cáncer de colon usunïtajwa yatiyapjjarakitäna. Ukampis uka usujajj wali avansatänwa, ukatwa operayasiyäta. Jichhajj walikëjjtwa. Esposajajj puedki ukarjamaw Diosar serviñatakejj wal chʼamachasiskaraki.

Janiw nanakakejj jan walinakan uñjasipkti, uk sum yatipjjta. 1994 maranjja Ruanda markan jaqenakajj jiwarayasipjjänwa, ukatwa walja jilat kullakanakajj escapasin campos de refugiados ukar sarapjjäna, jupanakaruw visittʼir sarapjjayäta. Ukham jan walin uñjasisas aguantasipkakïnwa, Diosarus confiyasipkakïnwa wajjtʼasirïsipkakïnwa, uk uñjasajja Jehová Diosajj servirinakapar yanaptʼañatakejj qhawqha chʼamanisa ukwa uñjapjjayäta (Sal. 55:22).

Ann-Catrin: 2007 maranjja, Uganda markankir sucursalaw Jehová Diosar katuyasïna. Uka qhepat mä qhawqha misioneronakampi betelitanakampiw Nairobi (Kenia) markar kuttʼanisajj jan walin uñjasipjjayäta, taqpachanejj 25 ukhanïpjjayätwa. Kenia markar jakʼachasisipkayäta ukhaw mä camionajj akatjamat nayräjjat chocantapjjetäna. Auto apirisa phesqa jilat kullakanakas ukaratpachaw jiwapjjäna, mä kullakajj hospitalanwa qhepat jiwarakïna. ¡Jupanakar wasitat uñjañ wal munapjjta! (Job 14:13-15).

Usuchjatäkchiyätsa tiempompejj ukajj jakjjänwa. Ukampis accidentasipkayäta ukanakat mä qhawqhanejja, kunatï pasapkitäna uk amtasisajj sustjasisipkaktwa. Nayajj arumanakaw sustuk thoqtapirïta, samanas taptʼasirpachaw sartasirïta. Ukanakar saykatañatakejja, Jehová Diosar wal orasiña, gustapkitu uka textonak liytʼaña ukat ukanakat lupʼiñaw wal yanaptʼapjjetu. Doctoranakampiw yanaptʼayasipjjarakta. Janisay qollatapunïpkstjja, ukar saykatañ yateqawayapjjtwa. Ukat nanakjam uñjasipki ukanakar chuymachtʼapjjañajatakejja, Jehová Diosaruw yanaptʼa mayipjjarakta.

Jan walinakan uñjasisajja Jehová Diosajj “mä kʼawnar” uñtasitaw apawayapjjetu sasajj ¿kamsañs munapjjta uk sapjjetasmati?

Mats: Suajili arut aka säwiw utji: “Tumebebwa kama mayai mabichi”. Uka arunakajj “mä kʼawnar uñtasitaw apawayapjjetu” sañwa muni. Kunjamtï maynejj jan pʼakjañatakejj kʼawn wali amuyump apkejja, ukhamarakiw Jehová Diosajj kunayman asignacionanakan wali sum cuidawayapjjetu. Janipuniw kunas faltapkitänti, necesitapkayäta ukat sipans jukʼampiw utjapjjetäna. Jehová Diosan wali munasirïtapsa yanaptʼasirïtapsa, Cuerpo Gobernante toqew amuyawayapjjta.

Ann-Catrin: Kuntï esposojajj siski ukajja, akwa amtayitu: mä urojj telefonot jawsanisajj “tatamajj wali usutaw hospitalankaski” sasaw yatiyapjjetäna. Esposojajj ukhakiw malaria usut qollasiskäna, ukhamajj Suecia markar sarañatakejj janiw qollqejj utjapkitänti, ukatwa auto aljañ amtapjjayäta. Ukampis ukaratpachaw telefonot jawsanipjjetäna. Nayraqatajj mä chacha warmiw jawsanipjjetäna. Jupanakajj jan walin uñjasipjjataj yatisaw avionat viajiñatak mä pasaje alarapipjjetäna ukat mä jilïr kullakaw jawsanipjjarakitäna, jupajj “Khititï necesitki ukataki” sat letreroni mä cajitar qollqe imasitayna. Ukhamajj mä qhawqha minutonakwa pasajenakanëjjapjjayäta. Jehová Diosaw yanaptʼapjjetäna (Heb. 13:6).

50 maranak Jehová Diosar servisajj ¿kunsa yateqawayapjjta?

Ann-Catrin: Isaías 30:15 textorjamajja, chʼamani saytʼasiñatakejj tranquilokïñasa Diosar confiyañas kunja wakiskirisa ukwa yateqawayta. Jehová Diosar confiyktan ukhajja, jupas jiwas lanti jan waltʼäwinakasar saykatkaspa ukhamawa (2 Crón. 20:15, 17). Kunayman asignacionanak katoqasajja, ukanakamp sum phoqañatakiw chʼamachasiwayapjjta, ukatwa Jehová Diosar jukʼamp servipjjataj laykojj walja bendicionanak katoqawayapjjta.

Mats: Kunayman jan walinakan uñjasisas Jehová Diosaruw confiyañaja, ukhamat jupan yanaptʼap uñjañataki, ukwa nayajj yateqawayta (Sal. 37:5). Arsutaparjamajj janipuniw jaytjawayapkituti. Myanmar markankir Betelan servisajj ukwa jichhakamas uñjasipkakta.

Jehová Diosar jukʼamp serviñ munapki uka walja wayn tawaqonakajja, Diosan munasiñat jan jaytjasirïtap nanakjam uñjapjjarakispa ukwa munapjjta. Jupanakatï kunayman asignacionanakan yatinoqtapjjani, kusisit servipjjarakini ukhajja, Jehová Diosan munasiñat jan jaytjasirïtapwa uñjapjjani.