Jilïrëjjasajj ¿kunjamsa kusisitakïsksna?

1, 2. Jilïrkipstasipki uka jilat kullakanakarojj ¿kunjamsa Jehová Diosajj uñji? (Salmo 92:12-14; foto uñjjattʼarakïta).

YAQHEP markanakanjja, jilïrkipstañajj sumat uñjatawa. Ukampis yaqhep markanakanjja, jaqenakajj janiw jilïrkipstañ munapkiti. Ukatwa jan jilïrkipstañatakejj kunaymaninak lurapjje. Sañäni, janqʼo ñikʼutanak jankʼakiw jikʼirasipjje, ukhamsa lurapkchejja jilïrkipstasipkakiwa.

² ¿Jilïrkipstasipki uka jilat kullakanakarojj kunjamsa Jehová Diosajj uñji? (Prov. 16:31). Jupajj panqarir qoqanakarjamaw jupanakar uñji (Salmo 92:12-14 liytʼäta). ¿Kunatsa jupanakar ukham uñjpacha? Kuna laykutejj walja hojanakani walja suma panqaranakani qoqanakajj walja maranakanïpjjewa. Ukanakat mayajj Japón markankir cerezo qoqawa, uka qoqajj wali sumawa, wali sumaw panqararaki, 1.000 jila maranakaw jakarakispa. Jilïr jilat kullakanakajj uka qoqar uñtasit wali sumäpjjarakiwa, jukʼampis Jehová Dios nayraqatan wali sumäpjjewa. Janqʼo ñikʼutanakap uñjañat sipansa, jupanakajj kunja suma chuymanïpjjesa ukwa Jehová Diosajj uñji. Uka jilïr jilat kullakanakajj walja maranakaw walinsa jan walinsa Jehová Diosar jan jitheqtas serviwayapjje.

3. ¿Kunjamsa Jehová Diosajj jilïrkipstat servirinakap toqejj voluntadap phoqäna? Uk qhanañchtʼam.

³ Jilïrëjjstan ukhasa Jehová Diosajj valoranit uñjaskakistuwa.a Amtañäni, nayra tiemponjja Jehová Diosajj jilïrkipstat servirinakap toqew walja kuti voluntadap phoqäna. Sañäni, Sara warmejj jilïrëjjchïnsa ‘mä yoqall wawaniyätawa, uka wawajj wali chʼamani mä markaruw tukuni, uka markatwa Mesiasajj jutarakini’ sasaw Diosajj jupar säna (Gén. 17:15-19). Moisesampejj niya ukhamarakiw pasäna, jupajj wali jilïrëjjchïnsa israelitanakar Egipto markat irpsuniñapatakiw Jehová Diosajj jupar mayïna (Éx. 7:6, 7). Jilïrëjjäna ukhajja, apóstol Juanajj Diosan amuytʼayatäsaw Bibliankir phesqa libronak qellqarakïna.

4. Proverbios 15:15 textorjamajj ¿kunas kusisitakïskañatakejj jilïrinakarojj yanaptʼaspa? (Foto uñjjattʼarakïta).

⁴ Maynejj jilïrkipstjje ukhajja, kunayman jan walinakanwa uñjasi. Ukatwa walja jaqenakajj akham sapjje: “Jilïrkipstañajj wali chʼamawa” sasa. Ukampis ¿kunas jilïrkipstat jilat kullakanakarojj jan waltʼäwinakar saykatañatak yanaptʼaspa? Kusisitäñawb yanaptʼaspa (Proverbios 15:15 liytʼäta). Aka yatichäwinjja, kunas jilïrkipstat jilat kullakanakarojj kusisitakïskañatak yanaptʼaspa ukwa yatjjataskañäni. Ukat kunjamsa congregacionankir jilat kullakanakajj jupanakar yanaptʼapjjaspa ukwa yatjjataskarakiñäni, ukampis nayraqatajja, kunatsa jilïrinakatakejj kusisitakïskañajj chʼamakïspa ukwa yatjjatañäni.

KUSISITAKÏSKAÑAJJ CHʼAMAKÏSPAWA

5. ¿Jilïrëjjasajj kunanakas llakisiyistaspa?

⁵ ¿Jilïrkipstjjasajj kunanakas llakisiyistaspa? Kunanaktï nayrajj lurirïkayätan ukanak jan lurirjamäsaw llakisjjsna. Jan ukajj inas nayrjam wayn tawaqöskakiña kʼumaräskakiñ munstan (Ecl. 7:10). Ruby sat mä kullakajj akham siwa: “Isthapisiñajj nayatakejj wali chʼamawa, kuna laykutejj wal cuerpojj usutu, janiw tawaqökayäta ukham kuns lurañ puedjjti, medias uchtʼasiñas nayatakejj wali chʼamawa, artrosis usunïtajat amparanakajajj janiw nayrjamäjjeti, mä kun lurañajj faciläkchisa, uk lurañajj nayatakejj wali chʼamawa” sasa. Betelan sirvkäna uka Harold jilatajj akham siwa: “Nayrjam kuns jan lurirjamäjjasajj awisajj colerasjjaktwa, waynäkasajj wali chʼamaniyätwa. Béisbol anatañajj wal gustarakitäna, uk anatapjjerïkta ukhajja, ‘Harold jilatar pelot pasayapjjam, jupaw atipayistani’ sasaw mayninakajj sapjjerïna. Jichhajja janiw pelot jaqtʼañs puedjjeristi” sasa.

6. 1) ¿Kunanakas llakisiyarakistaspa? 2) Auto apnaqasipkakiniti janicha uk amtañatakejja, ¿kunsa jilïr jilat kullakanakajj lurapjjaspa? (“¿Janit autsa motsa apnaqjjañajäkaspa?” sat yatichäwi aka revistan liytʼäta).

⁶ Jiwas sapak jan kuns lurirjamäjjasaw wal llakisiraksna. Kunapachatï maynejj cuidjjestu jan ukajj mä wawasan ukar jakir sarjjtan ukhaw jukʼamp llakistanjja. Jan ukajj usutätasata ukat jan sum uñj-jjatasat auto jan apnaqañ puedjjtan, jan ukajj sapak jan yaqha cheqanakar sarañ puedjjtan ukhaw llakisiraksna. Inas jiwas sapakejj jan kuns lurirjamäjjstanti, janirak sapak jakirjamäjjstanti, ni auto apnaqerjamäjjstanti, ukampis Jehová Diosatakisa jilat kullakanakatakis wali valoranikïsktanwa, uk amtañasapuniwa. Ukhamarus Jehová Diosajja, kunjamas jikjjatastan uk sum yati. Diosajja qhawqsa juparusa jilat kullakanakasarus munastan ukwa uñji (1 Sam. 16:7).

7. ¿“Akapachajj kunjamas tukusini uk janiw uñjkäti” sasin jan llakisiñatakejj kunas yanaptʼistani?

⁷ ¿Ukat kunas llakisiyarakistaspa? “Akapachajj kunjamas tukusini uk janiw uñjkäti” sasin amuyasaw llakisjjsna. Ukham jikjjatasisajj akwa amtañasa, Jehová Diosajj aka jan wali pach tukjañatakejj pacienciampiw suytʼaski (Is. 30:18). Ukham suytʼaskatapatjja, walja millón jaqenakaw Diosar uñtʼasin servipjjaspa (2 Ped. 3:9). Ukhamajj janïr akapach tukuskipan qhawqha jaqenakasa, ukat familiaranakasas Jehová Diosan paciencianïtapat jupar uñtʼapjjaspa ukwa llakitäktan ukhajj amtañasa.

8. ¿Kunsa jilïr jilat kullakanakajj usutäpjjatap laykojj lurjjapjjaspa?

⁸ Jan sum jikjjatasisajja, wayn tawaqonakasa jilïrinakas taqeniw jan sum amuytʼasisajj kuns arssna jan ukajj kuns lursna, qhepatakwa ukat amtassna (Ecl. 7:7; Sant. 3:2). Ukaw Diosat jan jitheqtir Job chachampejj pasäna. Tʼaqesiskatap laykojj jan suma amuytʼat arunakwa arsüna (Job 6:1-3). Maysa toqetjja, medicamentonak umasaw jan parlañanak parljjsna, jan ukajj jan lurañanak lurjjsna. Ukampis “jilïrëjjtwa” jan ukajj “usutätwa” sasajj janiw mayninakar chuym ustʼayañasäkiti, ni jiwas lanti kun lurapjjañapatakis sinti mayiñasäkiti. Jiwasatï parlatasamp maynir chuym ustʼayatas amuyasstan ukhajja, jankʼakiw perdón mayisiñasa (Mat. 5:23, 24).

KUSISITAKÏSKAÑATAK EWJJTʼANAKA

9. ¿Kunatsa mayninakamp yanaptʼayasiñasa? (Fotonak uñjjattʼarakïta).

⁹ Mayninakamp yanaptʼayasipjjañäni (Gál. 6:2). Qalltanjja yanaptʼayasiñajj chʼamäspawa. Gretl sat mä kullakajj akham siwa: “Maynin yanaptʼap katoqasiñajj nayatakejj chʼamakiwa, kuna laykutejj janiw khitirus chʼam tukuyañ munkti. Tiempompejj humilde chuymamp maynin yanaptʼap katoqasiñ yateqawayjjtwa” sasa. Jiwasar yanaptʼasajja, jilat kullakanakajj wal kusisipjje (Hech. 20:35). Qhawqsa jiwasar munasipjjestu qhawqsa jiwasat llakisipjjaraki uk uñjasajja, jiwasajj kusisitarakïñäniwa.

10. ¿Kunatsa mayninakar yuspärañ jan armasiñasäki? (Foto uñjjattʼarakïta).

¹⁰ Yuspärasirïpjjañäni (Col. 3:15; 1 Tes. 5:18). Mayninakan yanaptʼap katoqasajj wal kusistanjja. Ukampis awisajj jupanakar yuspärañ armassnawa. Jiwasatï yanaptʼapkistu ukanakar lartʼasis uñkattʼañäni, jan ukajj “yuspära” sasin sañäni ukhajja, jupanakajj wal kusisipjjani. Betelan jilïr jilat kullakanakar cuidir Leah kullakajj akham siwa: “Mä jilïr kullakajja, yuspärasin tarjetitanak churapunituwa. Mä qhawqha arunakakïkchisa, wali munasiñamp qellqtʼatawa. Walpun gustitu, yanaptʼaj wali valoranit uñjatap yatisajj wal kusista” sasa.

11. ¿Kunjamsa mayninakar yanaptʼsna? (Foto uñjjattʼarakïta).

¹¹ Mayninakar yanaptʼapjjañäni. Mayninakarutï chʼamasampi tiemposampi yanaptʼañäni ukhajja, janiw problemanakasat añch llakisjjañäniti. ¿Jilïr jilat kullakanakajj kunamp sasipjjaspasa? Sumanak yatichir libronakamp sasipjjaspawa. Ukampis jaqenakatï libronak jan liytʼapkaspajja, janiw kuns uka libronakat yateqapkaspati. Jiwasampejj ukhamarakiwa, janitï wayn tawaqonakar parlkañäni, kuntï yatktan ukanaks janirak cuenttʼkañäni ukhajja, janiw kuns jiwasat yateqapkaniti, ukhamajj jupanakar jisktʼapjjañäni istʼapjjarakiñäni. Kunatsa Jehová Diosar istʼañajj wali wakiskirejja, ukat kunatsa jupar istʼasakejj kusisitäsna ukanaks qhanañchtʼapjjarakiñäni. Wayn tawaqonakar chuymachtʼasasa chʼamañchtʼasasa jiwasajj kusisitarakïñäniwa (Sal. 71:18).

12. ¿Isaías 46:4 texton Jehová Diosajj jilïr jilat kullakanakarojj kamsisa? (Foto uñjjattʼarakïta).

¹² Chʼamanïskakiñatak Jehová Diosar yanaptʼa mayipjjañäni. Inas awisajj qaritak jikjjatassna, ukampis Jehová Diosajj “janipuniw qarjtkiti, ni thayjtkisa” (Is. 40:28). Jupajj wali chʼamaniwa, uka chʼamampiw jupat jan jitheqtir jilïr jilat kullakanakarojj chʼamañchtʼi (Is. 40:29-31). Jupajj jilïrinakar yanaptʼaskakiñwa arsuwayi (Isaías 46:4 liytʼäta). Kuntï arski uk phoqapuniwa (Jos. 23:14; Is. 55:10, 11). Kunapachatï qhawqsa jupajj munasistu yanaptʼarakistu uk amuytan ukhajja, wal kusistanjja.

13. 2 Corintios 4:16-18 textorjamajj ¿kunsa amtañasa? (Foto uñjjattʼarakïta).

¹³ Janiw wiñayatakejj jilïrïkañäniti, uk amtapjjañäni. Mä jan walejj tukusirïtap yattan ukhajja, aguantañajj janiw chʼamäkiti. Bibliajja jilïrkipstañasa usuntañanakas janiw utj-jjaniti sasaw qhanañchi (Job 33:25; Is. 33:24). Ukhamajj jutïrin janiw usutäjjañäniti, chʼamanëjjañäniwa, nayrat sipansa suma uñnaqtʼanirakëjjañäniwa, uk yatiñajj walpun kusisiyistu (2 Corintios 4:16-18 liytʼäta). Ukampis kunjamsa mayninakajj yanaptʼapjjestaspa uk jichhajj uñjañäni.

¿KUNJAMSA JILÏR JILAT KULLAKANAKAR YANAPTʼSNA?

14. ¿Kunatsa jilïr jilat kullakanakar jawstʼañasa visittʼañas wali importantejja?

¹⁴ Sapa kutiw visittʼañasa jawsañasaraki (Heb. 13:16). Jilïrinakajj llakisipjjewa, kuna laykutejj jilapartejj sapakïpjjewa. Camille sat mä jilatajj akham siwa: “Niyakejjay utat jan mistuñ puedkstejja, walpun aburrjasta. Awisajj llawintat mä awki leonjamaw jikjjatasta, janiw kamachtʼañs puedkti, wal colerarakta” sasa. Jilïrëjjapjje ukanakar visitʼtan ukhajja, jupanakat llakisitasa jupanakar munasitaswa uñachtʼaytanjja, inas mä kutejj congregacionasankir mä jilataru jan ukajj mä kullakar visittʼaña jan ukajj jawstʼañ amtstan, ukampis qhepat armasisajj inas jan uk lurjjstanti. Wali ocupatäkstansa, jilïr jilat kullakanakar visittʼañatakejj tiempo apstʼasiñasapuniwa. Ukajj “kunanakatejj jukʼamp importantëki” ukanak taypinkiwa. ¿Kunsa lursna? (Filip. 1:10). Calendariosanwa jilïr jilat kullakanakan sutinakap anottʼassna, ukat kunürus jupanakar mä mensaje qellqtʼañäni jan ukajj jawsañäni ukwa anottʼasiraksna. Jupanakar visittʼañ munstan ukhajja, kunürus sarañäni uk sum amtañasawa, ukat sarañasapuniwa.

15. ¿Kunsa wayn tawaqonakajj jilïr jilat kullakanakamp lurapjjaspa?

¹⁵ Jumatï waynästa jan ukajj tawaqösta ukhajja, “¿kuna toqetsa jilïr jilat kullakanakar parlirista? ¿Kunsa jupanakamp lurirista?” sasin inas jisktʼassta. Jan uka toqet añch llakisimti. Jupanakan amigopäñamakiw wakisi (Prov. 17:17). Janïr tantachäwi qalltkipana jan ukajj tantachäw tukuyataruw jilïr jilat kullakanakamp parltʼasisma. Kuna textos gusttam sasaw jisktʼasma, jan ukajj wawäkasin kunanaks lurayäta ukanak cuenttʼita sasaw sarakisma. Jan ukajj JW Broadcasting^® program uñtañatakiw invittʼasma. Maysa toqetjja, celularapa jan ukajj tabletapwa actualizarapisma jan ukajj yatjjatañatak qellqatanakwa descargarapisma. Carol sat mä jilïr kullakajj akham siwa: “Kunatï jukʼamp gustktam uk lurañatak invittʼam, nayajj walja maranakanïkstsa, jakañ vidat disfrutaskaktwa. Alir sarañasa, manqʼer sarañasa, Diosan luratanakap uñjañas wal gustitu” sasa. Maira sat yaqha kullakajj akham sarakiwa: “Mä amigajajj 90 maranëjjewa, ukhamajj nayat 57 maranak jilïriwa. Ukampis mitapuräpkiristsa ukhamawa, wal lartʼasipjjta, peliculanaks wal uñchʼukipjjarakta. Wakiski ukhas ewjjtʼasipjjaraktwa” sasa.

16. Jilïr jilat kullakanakajj doctoran ukar sarapki ukhajj ¿kunatsa jupanakar compañtʼañasa?

¹⁶ Doctoran ukaruw compañtʼañasa. Doctoran ukar mä jilïr jilataru jan ukajj mä jilïr kullakar irpañäni ukhajja, jupanakamp chikaw quedasiraksna, ukhamat kunjamsa jupar uñjasipki, yanaptʼasipkit janicha uk uñjañataki (Is. 1:17). Kuntï doctorajj siskani uks anottʼasiraksnawa. Ruth sat mä kullakajj akham siwa: “Sapak sarta ukhajja, doctoranakajj janiw yäqapkituti. Awisajj akham sapjjetuwa: ‘Janiw usutäktati; jumakiw usutäkasmas ukham amuyastajja’ sasa. Maynejj compañtʼitu ukhajj doctoranakajj sum uñjapjjetu. Nayamp sarañatak tiemp apstʼasipki uka jilat kullakanakarojj walpun yuspärta” sasa.

17. ¿Kunjamsa jilïr jilat kullakanakamp prediksna?

¹⁷ Jupanakamp chikaw predicañasa. Awisajj jilïr jilat kullakanakajja, utat uta predikir sarañatakejj janiw chʼamanëjjapjjeti. ¿Janit jiwasamp chika carritomp predicapjjañapatak invittʼksna? Ukhamtï lurañänejja, jupanakan qontʼasipjjañapatakejj mä asiento apsna. Ukat mä estudior jiwasamp sarapjjañapatakiw invittʼsna. Jan ukajj estudiosaruw jupanakan utapar irpsna, ukhamat ukan yatjjatañataki. Ancianonakajja jilïr jilat kullakanakan utapat predicacionar mistusiñapatakiw organiztʼapjjaspa, ukhamat jilïr jilat kullakanakajj facilak predikir sarapjjañapataki. Jilïrinakar yanaptʼañatak chʼamachasitas uñjasajja, Jehová Diosajj walpun kusisi (Prov. 3:27; Rom. 12:10).

18. ¿Kuna toqetsa jutir yatichäwin yatjjataskañäni?

¹⁸ Aka yatichäwinjja, qhawqsa Jehová Diosasa congregacionankir jilat kullakanakas jilïr jilat kullakanakar munasipjje, qhawqsa valorapjjaraki ukwa yatjjatawaytanjja. Cheqas jilïrëjjañajj janiw faciläkiti, ukampis Jehová Diosan yanaptʼapampejja, kusisitakïsksnawa (Sal. 37:25). Wayn tawaqökasin sum jakaskayätan uka tiempot sipansa, jutïrinwa wali sum jakasjjañäni, ¡uk yatiñajj wal chʼamañchtʼistu! Ukampis jiwasatï jilïrkipstat mä familiarasaru, jan ukajj usut wawasaru jan ukajj amigosar cuidaskstan ukhajj ¿kunsa lursna? ¿Kunas kusisitakïskañatakejj yanaptʼistani? Uka jisktʼanakaruw jutir yatichäwin qhanañchaskañäni.