¿Janit autsa motsa apnaqjjañajäkaspa?

¿Jumajj ukhaman uñjasiraktati? Ukhamächi ukhajja, ¿autsa motsa apnaqaskakiñamati janicha uk amuytʼasiñatakejj kunas yanaptʼiristam?

Yaqhep markanakanjja, auto jan ukajj moto apnaqerïpki ukat edadanëjjapjjaraki ukanakarojj doctoramp uñjayasipjjañapatakiw mayipjje, jan ukajj janïr wasitat mä licencia apskasajj mä certificado apsupjjañapatakiw mayipjjaraki. Uka markanakan jakasir cristianonakajja, markan utjki uka leyinakarusa gobiernon uttʼayat autoridadanakajj kuntï amtapki ukarus respetapjjarakiwa (Rom. 13:1). Ukampis kuna markanjjay jakstanjja, auto jan ukajj moto apnaqaskakiñäniti janicha uk amuytʼasiñatakejj kunayman yanaptʼanakaw utji.

AUTSA MOTSA APNAQASKAKÏTATI JANICHA UK AMUYTʼASIM

Estados Unidos markankir Instituto Nacional sobre el Envejecimiento sat organizacionajja (inglés arurjamajj NIA satarakiwa), aka jisktʼanak lurasiñaswa munapjje:

• ¿Arumanakajj transiton señalanakap uñjañajj nayatakejj chʼamakiti?

• ¿Khitis qhepäjjata ukat jan uñjkañ jutaski uk jankʼakit retrovisorat uñjtjja?

• ¿Aceleradorar taqjjatañatakisa frentʼañatakis jankʼakïtti?

• ¿Wali kʼachat auto jan ukajj moto apnaqtjja?

• ¿Niyat walja kut chocantawaytjja, jan ukajj perqanakarus postenakarus yaqha ukhamanakarus niyat chocantawayaraktjja?

• ¿Jan wali apnaqatajat policiajj mä kutis saytʼayituti?

• ¿Apnaqkasajj ikjawaytti?

• ¿Sum apnaqañatakejj pastillanakti umtjja?

• ¿Auto jan ukajj moto apnaqatajat familiaranakajasa amigonakajas llakisipjjeti?

Uka jisktʼanakat mayaru jan ukajj payarutï “jïsa” sasin sawaysta ukhajja, inas mä qhawqha cambionak lurañamajj wakischini. Sañäni, janiw jaya tiempojj autsa jan ukajj motsa apnaqjjañamäkaspati, jukʼampis arumanakajj janiw apnaqjjañamäkaspati. Ukhamarus sapa mä qhawqha tiempotjja, apnaqañamajj wakisiskakiti janicha uk amuytʼasiñamaw wakisini. Mä familiaramaru jan ukajj mä amigomaruw jisktʼasisma, kunjamsa auto jan ukajj moto sum apnaqasma uka toqets mä curso pasarakismawa. Alayan uñjaniwayktan uka walja jisktʼanakarutï jïsa sasin sawaysta ukhajja, janiw auto jan ukajj moto apnaqjjañamäkaspati.a

BIBLIAN YAQHEP TEXTONAKAPAW AMUYTʼAYIRISTAM

Apnaqañ jan puedjjatasat inas jan amuyasksnati, ukhamïpan auto jan ukajj moto apnaqañ jaytañajj inas wakischispa. Uka toqet mä amtar puriñajj wali wakiskiriwa. ¿Kunjamsa Bibliajj sum amuytʼasiñataki, suma amtanakar puriñatak yanaptʼiristam?

Apnaqerjamäsktanti janicha uk amuytʼasiñasawa (Prov. 11:2). Jilïrëjjtan ukhajja, janiw sum uñj-jjtanti, janiw sum istʼjjtanti, janiw chʼamanëjjtanti, janirakiw jankʼak kuns lurjjtanti. Ukatwa walja jaqenakajj jan kuna deportsa lurjjapjjeti, usuchjasirjamäpjjatap amuyasisaw ukanak jaytjjapjje. Auto jan ukajj moto apnaqañampejj niya ukhamarakïspawa, jan sum apnaqañ pueditas amuyasisajja, jiwasan askisatakiw jan apnaqjjañasäkaspati (Prov. 22:3). Maynirutï auto jan ukajj moto apnaqasin llakisiystan ukhajja, kuntï jupajj siskistu ukar jankʼakiw istʼañasa (2 Samuel 21:15-17 liytʼarakïta).

Janiw wila wartasitapat juchanïñ munktanti (Deut. 22:8). Maynitï auto jan ukajj moto jan sum apnaqkaspa ukhajja, jaqenakaruw usuchjaspa jan ukajj jiwarayaspa, jupas jiwarakispawa. Mä accidenter purtʼasisajj wila wartasitapat juchanirakïspawa.

Jumatï auto jan ukajj moto apnaqañ jaytjjäta ukhajja, mayninakajj janiw respetjjapjjetaniti sasajj janiw amuyañamäkiti. Jehová Diosajj amuytʼasirïtamatsa, humildëtamatsa, mayninakat llakisitamats wal munastamjja. Jupajj jumar yanaptʼaña chuymachtʼañwa arsuwayaraki (Is. 46:4). Janipuniw jaytjkätamti. Jupaw suma amtar puriñamatakisa, sum amuytʼasiñamatakis yanaptʼätam. Ukhamajj taqe confianzamp jupar jakʼachasim.