Diosatakejj wali valoranïtawa

1, 2. Jehová Diosatakejj qhawqha valoranïtansa uka toqet jan payachasiñatakejj ¿kunas yanaptʼistaspa?

JEHOVÁ DIOSAJJ taqe servirinakaparojj wali valoranitwa uñji, ukampis yaqhepajj janis valoranïpkaspa ukhamwa amuyasipjje. ¿Kunatsa ukham amuyasipjje? Inas mayninakamp jiskʼachatäsin ukham amuyasipjjchi. Jiwasatï ukham jikjjatasirakstan ukhajj ¿kunas Jehová Diosatak wali valoranïtas amuyañatakejj yanaptʼistani?

² Maynit maynikam kunjam uñjasiñassa Jehová Diosajj muni uka toqet parlir sarnaqäwinakwa Biblian liytʼsna. Jehová Diosan Jesús Yoqapajja, jaqenakarojj munasiñampi ukat respetompiw uñjirïna. Jaqenakar ukham uñjasajja, jupatakisa Awkipatakis humilde chuyman jaqenakasa, janis kunatakis servipkaspa ukham amuyasir jaqenakas qhawqha valoranïpjjesa ukwa uñachtʼayaskäna (Juan 5:19; Heb. 1:3). Aka yatichäwinjja, Diosatakejj qhawqha valoranïpjjesa uk amuyapjjañapatakejj kunjamsa Jesusajj jaqenakar yanaptʼäna ukwa yatjjataskañäni. Ukatjja, Jehová Diosajj wali valoranit uñjitu sasin jan payachasiñatakejj kunsa jiwasajj lursna ukwa yatjjataskarakiñäni (Ageo 2:7).

VALORANÏPJJATAP AMUYAPJJAÑAPATAKIW JESUSAJJ JAQENAKAR YANAPTʼÄNA

3. ¿Kunjamsa Jesusajj galileankir jaqenakarojj uñjäna?

³ Jesusajj kimsïr kut Galilear predikir sarkäna ukhajja, walja jaqenakaw jupamp yatichayasirisa qollayasiris kutin kutin sarapjjäna. Jesusatakejja, “jupanakajj jan awatirini ovejanakjam qʼala usuchnoqata, ananukuta ukhamäpjjänwa” (Mateo 9:36 liytʼasajj español arut utjki uka Biblia de estudion notanakap liytʼäta). Religión pʼeqtʼirinakajj uka jaqenakarojja, janis kuns yatipkaspa ukhamwa uñjapjjäna, janirakiw jupanakarojj yäqapkansa, uka ‘jaqenakajj maldisitäpjjewa’ sasaw sapjjarakïna (Juan 7:47-49 liytʼasajj español arut utjki uka Biblia de estudion notap liytʼäta). Ukampis Jesusajj jupanakarojj wali valoranitwa uñjäna, ukatwa jupanakar yatichañatakisa qollañatakis tiempo apstʼasïna (Mat. 9:35). Jukʼamp jaqenakar yanaptʼañatakejja, predicapjjañapatakejj apostolonakaparuw wakichtʼäna, kunayman kasta usutanakar qollapjjañapatakis chʼam jupanakar churarakïna (Mat. 10:5-8).

4. ¿Kunjamsa Jesusajj humilde chuyman jaqenakar uñjäna, ukat kunsa jupat yateqsna?

⁴ Mayninakamp jiskʼachatäpki uka jaqenakarojja, munasiñampi ukat respetompiw Jesusajj uñjirïna, ukham lurasajj jupasa Awkipas jiskʼachat jaqenakar valoranit uñjapjjatapwa uñachtʼayäna. Ukampis jiwasatï Jehová Diosar sirvkasin janis valoranïksna ukham amuyasstan ukhajja, kunjamsa Jesusajj humilde chuymanïpkäna ukat jupat yateqañ munapkarakïna uka jaqenakarojj uñjäna ukwa amtañasa. Ukaw Jehová Diosatakejj qhawqha valoranïtansa uk amuyañatak yanaptʼistani.

5. ¿Jesusajj Galilea markan jikiskäna uka warmejj kuna jan walinakans uñjasïna?

⁵ Jesusajj janiw walja grupo jaqenakaruk yatichkänti ni yanaptʼkarakïnti, jan ukasti mayni saparukis yanaptʼarakirïnwa. Uk amuytʼañatakejja, kunas Galilea markan pasäna uk amuytʼañäni; uka markan predicaskäna ukhajja, wila apa usuni mä warmimpiw jikisïna, jupajj 12 maranakaw uka usump tʼaqesiskäna (Mar. 5:25). Uka usunïtapatjja Leyirjamajj qʼañut uñjatänwa, khititï jupar llamktʼkaspäna ukajj qʼañut uñjatäjjarakispänwa, ukhamätapatjja janiw jaqenakamp chikachaskpachänti. Ukatjja Diosar adorañatak fiestanakansa sinagoganakansa, janiw mayninakamp chik Jehová Diosar adorañ puedkänti (Lev. 15:19, 25). Ukhamajj uka warmejj janiw usupampik tʼaqeskänti, jan ukasti janis khitis jupar munaskaspa, janis valoranïkaspa ukhamwa amuyasirakpachäna (Mar. 5:26).

6. Wila apa usuni warmejj usupat qollatäñatakejj ¿kunsa luräna?

⁶ Uka warmejj Jesusamp qollatäñs munkchïnjja, janiw qolltʼita sasin Jesusar sañ puedkänti, kuna laykutejj inas usupat phenqʼaschïna, jan ukajj Leyirjam qʼañut uñjatätapatjja inas Jesusamp toqjjatäñ ajjsararakchïna. Ukatwa Jesusan isipak llamktʼäna, ukhamatwa qollasëjja sasaw jupajj confiyäna (Mar. 5:27, 28). Ukhamapuniw pasäna: ¡uka warmejj usupat qollatäjjänwa! Ukat Jesusajj “¿khitis isijat llamktʼitu?” sasaw jisktʼäna, ukat uka warmejj jan kun imtʼasaw kuntï lurkäna uk Jesusar awistʼäna. ¿Jesusajj uka warmir kamspachänsa?

7. ¿Kunjamsa Jesusajj wila apa usuni warmir uñjäna? (Marcos 5:34).

⁷ Jesusajja, uka warmejj ‘ajjsarañat khatatiskatapwa’ uñjäna, ukatwa wali munasiñampi respetompi jupar parltʼäna (Mar. 5:33). “Wawa” sasaw juparojj sarakïna, ukham sasajj janiw uka warmir respetatapak uñachtʼaykänti, jan ukasti jupar munasitapwa uñachtʼayäna (Marcos 5:34 liytʼäta). Bibliarjamajja, uka may kutikiw Jesusajj mä warmir “wawa” sasin säna. Inas uka warmin wal ajjsarayasitap layku munasiñamp ukham sischïna. Jesusamp munasiñamp uñjatäsajja, uka warmejj janiw ajjsarjjpachänti. Jesusatï uka warmir jan munasiñamp uñjkaspäna ukhajj ¿kunas pasaspäna? Uka warmejj usupat qollaskchispänsa, jaqenak taypir mantatapatsa, Jesusan isip llamktʼatapats juchañchasispänwa. Ukatwa aleq qollañatak sipansa qhawqsa Jehová Diosajj uka warmir munasïna uk uñjañapatak Jesusajj yanaptʼäna.

8. ¿Kuna jan walinakans Renata kullakajj uñjasïna?

⁸ Jichhürunakan yaqhep jilat kullakanakajja, ukhamarakiw mä usunïsajj llakisipjjaspa, janis kunatakis valoranïpkaspa ukham amuyasipjjarakispa. Brasil markankir Renataa sat mä kullakat parltʼañäni, jupajj precursora regularatwa serviski. Mä usunïtapatjja, jan kayunakani ukat jan chʼeqa amparaniw nasïna, kullakajj akham siwa: “Escuelanjja, sapa kutiw kunayman sutinak uchasin nayat burlasipjjäna. Awisajj pachpa familiaranakajasa, janis kunatakis sirvkirista ukhamwa amuyayapjjetäna” sasa.

9. ¿Kunas Renata kullakarojj wali valoranïtap amuyañatak yanaptʼäna?

⁹ Renata kullakajj Testigöjjäna ukhajja, congregacionapankir jilat kullakanakajj munasiñampiw wal chʼamañchtʼapjjäna, qhawqsa Jehová Diosajj jupar munasi uk amuyañapatakiw yanaptʼapjjarakïna. Renata kullakajj akham siwa: “Khitinakas yanaptʼawayapjjetu jupanakan sutinakaptï mä listan qellqerista ukhajja, janiw kunapachas tukuykiristti. Markapankatajat walpun Jehová Diosar yuspärta” sasa. Jilat kullakanakan yanaptʼap katoqasajja, Renata kullakajj Jehová Diosatakejj qhawqha valoranisa uk sum amuyi.

10. ¿Kuna jan walins María Magdalenajj uñjasïna? (Dibujonak uñjjattʼarakïta).

¹⁰ Jichhajj kunjamsa Jesusajj María Magdalenar yanaptʼäna ukat parltʼarakiñäni. María Magdalenajj paqallqo demonionakamp mantatänwa (Luc. 8:2). Ukhamätapatjja, uka demonionakajj jan lurañanakwa Mariar lurayapjjpachäna, ukatwa jaqenakajj jupat jitheqtjjapjjpachäna. Ukham jan walin uñjasisajja, Mariajj yaqhachata, jan yanapirini, sustjata ukhamaw jikjjataspachäna. Amuyatajja, Jesusaw uka warmit demonionak alissüna, jupajj Jesusan arkiripäjjarakïnwa. Ukhamatwa Jehová Diosatakejj qhawqha valoranisa uk amuyañapatak Jesusajj yanaptʼäna. Ukampis janiw uk lurasak Jesusajj Mariar yanaptʼkänti.

11. Jehová Diosatakejj qhawqha valoranisa uk ¿kunjamsa Jesusajj Mariar uñachtʼayäna? (Dibujonak uñjjattʼarakïta).

¹¹ Jesusajja, jupamp chik predikir sarañapatakiw María Magdalenar invitäna.b Jupamp chik sarasajja, kunanaktï Jesusajj yatichkäna ukanakwa Mariajj istʼäna. Ukatjja kunapachatï jiwatat jaktjjäna ukhajja, Jesusajj María Magdalenaruw nayrïr kut uñstäna. Jupan jaktjjatapat apostolonakapar yatiyañapatakis Mariaruw encargarakïna. Taqe ukanak lurasajja, Jehová Diosajj qhawqsa jupar munasïna ukwa Jesusajj uñachtʼayaskäna (Juan 20:11-18).

12. ¿Kunatsa Lidia kullakajj janis khitis jupar munaskaspa ukham amuyasïna?

¹² Jichhürunakanjja, walja jaqenakarakiw María Magdalenjamajj yaqhachat uñjasipjje. España markankir Lidia kullakat parltʼañäni, mamapajj jupat usurïkäna ukhajja, abortañwa munäna. Ukampis janiw uk lurkänti, ukhamäkchïnsa janipuniw wawaparojj sum cuidkänti, arunakapampis chuym ustʼayarakirïnwa. Lidia kullakajj akham siwa: “Niyakejjay mamitajajj jan munaskchitänjja, yaqha jaqenakajj nayar munasipjjetaspa nayan amigajäpjjaspa ukwa munirïta, ukampis mamitajajj jan wali jaqëkiristsa, janis munatäñajajj wakiskaspa ukhamwa amuyayitäna, ukatwa ‘janjakiw khitis munaskitaspati’ sasin ajjsarayasirïta” sasa.

13. Jehová Diosatakejj qhawqha valoranisa uk amuyañatakejj ¿kunas Lidia kullakar yanaptʼäna?

¹³ Lidia kullakajj Bibliat estudiañ qalltäna ukhajja, janiw nayrjam jikjjatasjjänti. Oración lurañasa, Biblia liyiñasa ukat jilat kullakanakamp munasiñamp uñjatäñasa, Jehová Diosatakejj qhawqha valoranisa uk amuyañatakiw yanaptʼäna. Kullakajj akham siwa: “Esposojajj munassmawa sasajj sapa kutiw situ, suma chuymanïtajat sapa kutiw amtayarakitu, amigonakajas uka pachparakwa lurapjje” sasa. ¿Lidia kullakjam jikjjatasiri mä jilataru jan ukajj mä kullakar uñtʼtati? Ukhamächi ukhajj ¿kunsa jupar yanaptʼañatakejj lurasma?

¿JEHOVÁ DIOSATAKEJJ QHAWQHA VALORANÏTANSA UK AMUYAÑATAKEJJ KUNSA LURSNA?

14. 1 Samuel 16:7 textojj ¿kunsa Jehová Diosat yatichistu? (“¿Kunatsa Jehová Diosatakejj servirinakapajj wali valoranejja?” sat recuadro liytʼarakïta).

¹⁴ Jehová Diosajj janiw kunjamtï mä jaqejj maynir uñjki ukham uñjkiti, ukwa amtañasa (1 Samuel 16:7 liytʼäta). Jaqenakajja, suma uñnaqtʼanïtanti janicha, qollqenïtanti janicha, yatjjatatätanti janicha ukakwa uñjapjje, ukampis Jehová Diosajj janiw ukham uñjkistuti (Is. 55:8, 9). Qhawqha valoranïtansa uk amuytʼkasajja, Jehová Diosatakejj qhawqha valoranïtansa uk amuytʼapjjañäni. ¿Kunas ukatakejj yanaptʼistani? Janis valoranïpkaspa ukham amuyasiri Diosan servirinakapat Biblian liytʼapjjañäni, jupanakat yaqhepajj Elías, Noemí, Ana ukanakawa, liytʼkasajj kunjamsa Jehová Diosajj jupanakarojj valoranïpjjatap uñachtʼayäna ukwa amuytʼañasa. Ukatjja qhawqha kutis Jehová Diosajj munasiñap uñachtʼayawayistu, ukat qhawqha valoranïtansa uks uñachtʼayawayarakistu ukwa qellqtʼassna. Ukjjarusti qhawqha valoranïtansa uka toqet parlir Bibliat apstʼat qellqatanakwa liytʼaraksna.c

15. Wali valoranïtawa sasajj ¿kunatsa Jehová Diosajj Daniel profetar säna? (Daniel 9:23).

¹⁵ Jupat jan jitheqtatasat Jehová Diosatakejj qhawqha valoranïtansa ukwa amtañasa. Mä kutejja, Daniel profetajj “wali qarita” desanimata ukhamaw jikjjatasïna, ukhajj niya 100 maranëjjänwa (Dan. 9:20, 21). ¿Kunsa Jehová Diosajj jupar chʼamañchtʼañatakejj luräna? Oracionanakap istʼaskatapa “wali valoranïtawa” sasin sañapatakiw Gabriel sat angelar khitäna (Daniel 9:23 liytʼäta; Daniel 10:11, nota). ¿Kunatsa Jehová Diosajj Daniel profetarojj wali valoranit uñjäna? Kuna laykutejj Daniel profetajj cheqapar sarnaqerïnwa, janiw Diosat jitheqtkarakïnti (Ezeq. 14:14). Kuntï Diosajj Daniel profetar siskäna ukjja, jiwasar chuymachtʼañatakiw Diosajj Biblian qellqayawayi (Rom. 15:4). Daniel profetarjamarakiw Jehová Diosajj oracionanakas istʼi, kunatï walïki ukar munasitasata jupat jan jitheqtatasat wali valoranitwa uñjarakistu (Miq. 6:8, notanaka; Heb. 6:10).

16. ¿Kunas Jehová Diosarojj mä munasir awkisarjam uñjañatak yanaptʼistani?

¹⁶ Jehová Diosarojj wali munasiri mä awkisarjamaw uñjañasa. Jehová Diosajj pantjasitanakas uñchʼukiñat sipansa, jiwasar yanaptʼañatakiw uñchʼukistu (Sal. 130:3; Mat. 7:11; Luc. 12:6, 7). Uka toqet amuytʼañajja, janis valoranïpkaspa ukham amuyasirinakaruw sumak jikjjatasiñatak yanaptʼawayi. España markankir Michelle kullakat parltʼañäni, juparojj walja maranakaw esposopajj arunakamp chuym ustʼayäna, ukatwa kullakajj janis valoranïkaspa, janis khitis jupar munaskaspa ukham amuyasïna. Kullakajj akham siwa: “Janis valoranïkirista ukham amuyasta ukhajja, Jehová Diosajj amparapampis ichjjarkitaspa, munasiñampis jarkʼaqkitaspa ukhamwa piensta” sasa (Sal. 28:9). Sudáfrica markankir Lauren sat mä kullakajja, akhamwa amuytʼaraki: “Jehová Diosajj munasiñampiw jupan ukar irpanitu, walja maranakaw jupat jan jitheqtañatak yanaptʼawayitu, jaqenakar Bibliat yatichañatakis yanaptʼawayarakituwa. Taqe ukanakaw Diosajj nayar wali valoranit uñjatap uñachtʼayitu” sasa (Os. 11:4).

17. ¿Jehová Diosamp suma uñjatätasat jan payachasiñatakejj kunas yanaptʼistani? (Salmo 5:12; foto uñjjattʼarakïta).

¹⁷ Jehová Dios nayraqatan sumat uñjatätasat jan payachasipjjañäniti (Salmo 5:12 liytʼäta). Cheqap sarnaqerinakatakejja, Jehová Diosamp sumat uñjatäñajj ‘jachʼa escudjamawa’ sasaw Davidajj säna. Ukhamajj janis valoranïksna ukham amuyasiñäni ukhajja, Jehová Diosajj jiwasar sumat uñjatapa ukat jiwasar yanaptʼaskatapwa amtañasa. Jehová Diosan chuymapar kusisiyaskatas ¿kunjamatsa yatsna? Qhawqsa munasistu ukjja, Jehová Diosajj Biblia toqew qhanañchistu. Ukatjja, ancianonak toqe, amigonakas toqe, ukat jilat kullakanakas toqew qhawqha valoranïtansa uk amtayarakistu. Ukhamajj ¿kunjamsa maynin chʼamañchtʼkir arunakap katoqassna?

18. ¿Kunatsa chʼamañchtʼkir arunak katoqasiñasa?

¹⁸ Jiwasar uñtʼapkistu munasipkarakistu ukanakatï suma luräwinakasat felicittʼapjjestani ukhajja, katoqtʼasiñasawa. Kuntï sapkitu ukajj janiw cheqäkiti sasajj janiw amuyañasäkiti. Jehová Diosajj jupanak toqew suma jaqet uñjaskatap jiwasar uñachtʼayaskistaspa. Párrafo 16 ukan Michelle kullakat parlaniwayktan uka kullakajj akham siwa: “Nayatakejj chʼamäkchisa, jukʼat jukʼat chʼamañchtʼkir arunak katoqasiñwa yateqaskta, kunattejj ukham lurañajwa Jehová Diosajj muni” sasa. Ancianonakas wali munasiñampiw kullakar yanaptʼawayapjjaraki, jichhajj jupajj precursoratwa serviski, mä qhawqha urunakas Betelan yanaptʼarakiwa.

19. ¿Jehová Diosatak wali valoranïtas jan payachasiñatakejj kunas yanaptʼistani?

¹⁹ Jehová Diosatakejj wali importantëtasjja, wali munasiñampiw Jesusajj yatichistu (Luc. 12:24). Ukhamajj Jehová Diosatakejj wali valoranïtas janipun armapjjañäniti. Ukatjja mayninakarojj wali valoranïpjjatap amuyasipjjañapatakis yanaptʼapjjarakiñäni.