Aka revista liytʼirinakan jisktʼäwinakapa
Akat mä jukʼarojj ¿kuna ‘amuysa’ Jehová Diosajj gobiernonakan chuymapar uchani?
Jachʼa tʼaqesiñ tiempojj kunjamas qalltani uka toqetjja, Apocalipsis 17:16, 17 textojj akham siwa: “Uñjkta uka tunka wajjranakasa salvaje animalasa prostituta warmirojj uñisipjjaniwa, utjirinakapsa taqpachwa aparapjjani, jan isini jaytapjjani, jupanakaw jañchipsa manqʼantapjjani, ninampiw qʼal nakhantayapjjarakini. Kuna laykutejj Diosaw amuyupjja chuymanakapar uchäna, ukhamat jupan amtap phoqapjjañapataki. Jupanakajj mä amuyunikïpjjänwa. Jupanakajj salvaje animalaruw reinop churapjjäna, Diosaw uka amuyu jupanakar churäna” sasa. Nayrajja, Jehová Diosajj gobiernonakan chuymaparuw taqpach falso religionanakar tukjañ “amuyu” uchani sasaw qellqatanakasan qhanañchasïna.
Ukampis jichhajj uka amuyu mayjtʼayañaw wakisi. Gobiernonakaw ‘salvaje animalar reinop churapjjani’, Jehová Diosaw uka “amuyu” gobiernonakan chuymapar uchani. ¿Kunjamas ukajj phoqaspachäni? Ukar qhanañchañatakejj walja jisktʼanakar qhanañchañaw wakisi.
¿Khitinakatsa uka profecian parlasi? ‘Prostituta warmejja’, mä arunjja ‘Jachʼa Babiloniajj’ taqpach falso religionanakamp sasiwa. ‘Llijkir wila color salvaje animalajja’, jichha tiempon Organización de las Naciones Unidas sasin uñtʼatäki uka organizacionamp sasiwa, 1919 maranwa Sociedad de Naciones sutimp uttʼayasiwayi, ukhamat oraqpachan sumankañ utjayañapataki (Apoc. 17:3-5). ‘Tunka wajjranakajj’ salvaje animalar apoyir taqpach gobiernonakamp sasiwa.
Prostituta warmisa llijkir wila color salvaje animalas ¿kunjamas apasipjje? Prostituta warmejj llijkir wila color salvaje animaljjar ‘qonjjatatawa’. Ukham qonjjatatätapajja, salvaje animalar apoyatapa, munañaparjam apnaqañ munatapwa uñachtʼayi.
¿Kunas prostituta warmirojj pasani? Salvaje animalasa, tunka wajjranakas “prostituta warmirojj uñisipjjaniwa”. Taqpach utjirinakapwa aparapjjani, kuna jan walinaksa lurawayi uks taqeniruw uñachtʼayapjjarakini. Kuntï Jehová Diosajj siskäna ukarjamarakiw qʼal tukjapjjani (Apoc. 17:1; 18:8). Ukhamaw taqpach falso religionanakajj chhaqtayatäni. Ukampis janïr uk paskipanjja, Jehová Diosajj mä amuyu gobiernonakan chuymapar uchani, ukajj janipuniw nayrajj uñjasiwaykiti.
¿Kunsa Jehová Diosajj gobiernonakar lurayani? Kunjamtï uñjaniwayktanjja, tunka wajjranakarojj Diosaw ‘amuyup chuymanakapar uchani’, ukhamat jupanakajj llijkir wila color ‘salvaje animalaru’, mä arunjja, Naciones Unidas sat organizacionar ‘chʼamsa autoridadanïñsa’ churapjjañapataki (Apoc. 17:13). Ukhamajj ¿gobiernonakakit pachpa amuyupat uk lurañ amtapjjani? Janiwa. Kunjamtï profeciajj siskejja, Jehová Diosaw uk lurapjjañapatak amuyup chuymanakapar uchani (Prov. 21:1; Isaías 44:28 liytʼarakïta). ¿Jukʼat jukʼatti gobiernonakajj chʼamap Naciones Unidas ukar churapjjani? Janiwa, mä akatjamatwa churapjjani. Uka chʼamampiw salvaje animalajj jan mayampitak taqpach falso religionanakar tʼunjani, cheqas ukajj Jehová Diosan amtaparjamäniwa.
Ukhamajj ¿jutïrin kun pasañapsa suytanjja? “Gobiernonakajj jukʼat jukʼatwa Naciones Unidas sat organizacionar apoyjjapjje” sasin noticianakan yatiyasiñap janiw suyañasäkiti. Antisas gobiernonakajj mä akatjamatwa salvaje animalarojj chʼamap churapjjani, cheqas Jehová Diosaw uka amuyu chuymanakapar uchani, ukwa jiwasajj suyañasa. Uk pasir uñjañäni ukhajja, jachʼa tʼaqesiñ tiempojj niy qalltañampïtapwa amuyañäni. Ukañkamajj “uñnaqapjjapuniñäni, wali amuyumpirak sarnaqapjjañäni”, kuna laykutejj ¡akatjamatwa taqe ukanakajj pasani! (1 Tes. 5:6).