Jan waltʼayat uñjasipki uka warminakatak yanaptʼanaka

Uka arunakampiw jw.org cheqankir mä yatichäwejj qallti, uka yatichäwin pʼeqeñchäwipajj akham siwa: “Warminakan sum jakasipjjañapa: ¿Bibliajj uka toqet kamsisa?” sasa. Tukuyarusti descargañataki ukat imprimiñatak mä PDF ukaw utji, uk imprimisajj dobltʼasirakispawa. Estados Unidos markankir Stacy sat mä kullakajj akham siwa: “Mä kullakampejja, mä qhawqha copianakwa imprimipjjayäta. Ukat niyakejjay predicapkta uka cheqan jan walin uñjasir warminakar jarkʼaqer mä utajj utjchejja, ukaruw uka qellqatanak apapjjayäta” sasa.

Ukan trabajir mä warmejja, jukʼamp copianak apapjjañajatakiw mayipjjetäna, ukhamat ukan jakasir warminakar lakirañataki. 40 imprimit qellqatanakaw lakirasïna, ukat jw.org cheqar mantañataki 30 tarjetanakaw lakirasirakïna. Qhepat uka cheqat encargat warmejja, kunjamsa Bibliat yatichasi uk qhanañchapjjañapatakiw kullakanakar mayïna.

Stacy kullakasa yaqha pä kullakanakas ukhamarakiw yaqha cheqan wali suma katoqatäpjjäna, phesqa imprimit yatichäwinak apapjjäna, uk uñjasajj jukʼamp apanipjjañapatakiw mayipjjäna. Ukan trabajir mä warmejj akham sänwa: “Aka folletojja, akan jakasir warminakarojj wal yanaptʼani, akpunwa munapjjayäta” sasa. Ukat yaqha horasan visittʼir sarapkäna ukhajja, uka cheqan jakasirinakat waljaniw mä cheqan juntasipjjäna, ukhamat kunjamas Bibliat yatichasi uk uñjañataki, jupanakat paninejj uka seman tukuyar tantachäwir sarañwa amtapjjäna.

Stacy kullakajj akham siwa: “Uka suma yatichäwi wali sum katoqasiwayapjje, ukajj musparkañawa. Uk imprimisasa, folletjam sum dobltʼasasa, jan waltʼäwinakan uñjasir warminakar predicacionan churañajj wali sumawa. Warminakan sum katoqasipjjatap uñjañajj chuymarupuniw purtʼawayapjjetu. Jan walinakan uñjasir warminakar suma yatiyäwinakajj yatiyañatak chʼamachasitanakajarojj kunjamsa Jehová Diosajj bendisini uk wal uñjañ munapjjta” sasa.