Jw.org sat cheqampi yatiyañäni: “Jehová Diosajj amigomäspawa”

Internetanjja, jw.org cheqanjja, wawanakatak mä cheqaw akham sutini utji: “Jehová Diosajj amigomäspawa” sasa (QELLQATANAKA > VIDEONAKA siski uka cheqaruw Internetar mantasma). Ukanjja, videonakampi musicanakampiw utji. Uka cheqampejj ¿yatiyjjtanti? Bibliat yateqerinakasatï wawanakanïpjjchejja, uñachtʼayañaw wakisispa, ukhamatwa Internetar jw.org cheqar mantasajj jukʼamp yaqha yanaptʼanak jikjjatapjjaspa.

Mä jilatajja, wawanakani mä warmiruw ¿Jiwatanakajj jaktanipjjpachäniti? sat tratado churatayna, katoqasajj ukaratpachaw liytʼäna. Wawanakapasti uka qellqatat wal yatiñ munapjjarakïna. Jilatajja, uka tratadojj kuna toqets parli uk mä jukʼa qhanañchtʼasajja, qhep qhepa janan Internetar mantañatak utjki uka cheqwa uñachtʼayäna. Uka warmin wal yatiñ munatap amuyasajja, jilatajj wawanakatak utjki uka videonakatwa celularapat may uñachtʼayäna.

Mä kullakajja, wawanakani mä trabajir masiparuw jw.org toqet parläna. ‘Uka cheqanjja, familianakatak walja yanaptʼanakwa jikjjatäta’ sasaw säna. Uka warmejj wawanakapampiw uka cheqar mantapjjäna. Qhepatjja akham sasaw kullakar satayna: “Wawanakajajj utanjja, ‘Diosan arunakap yatiyapjjañäni’ sat qʼochjja sapa kutiw cantapjje” sasa. Uka qʼochojj “Jehová Diosajj amigomäspawa: Nänakamp cantañatati” siski uka cheqanwa utji.

Jw.org cheqar sapa kuti mantañasa, ukat videonaka cancionanaka apaqañas wali askiwa. Ukham lurasajja, uka cheqampi yatiyañatak wakichtʼatätas uñachtʼaytanjja. Tatitur esclavjam serviñatakis yanaptʼarakistaniwa (Hech. 20:19).