Jw.org sat cheqampi yatiyapjjañäni: “Preguntas sobre la Biblia”

Internetan jw.org cheqanjja, “Enseñanzas bíblicas” siski ukawjan “Preguntas sobre la Biblia” sat mä cheqaw utji. Kunanakatsa ukan yatichasi uk yatiñajj yatiyañatakejj wali wakiskiriwa. Jaqenakajj uka yatichäwinakar uñtasit jisktʼapjjestani ukhajja, uka cheq uñjjattʼayasaw yatichsna. Jan ukajj uka jisktʼanakampejj parlañ qalltaraksnawa. Sañäni, kunanakatsa yatiñ munapjjaspa uka jisktʼanakampiw parlañ qalltsna, ukatsti uka toqet kamsanis uk istʼasajja, Bibliampiw jw.org cheqan kamsis ukarjam qhanañchtʼaraksna. Ukjjarojja, ‘jw.org cheqanwa nayajj uka yatichäwi jikjjatta’ sasaw sissna, ukat uka cheqwa Internetan uñachtʼaysna. Maysa toqetjja, jisktʼapar qhanañchañatakejj jupa pachpa Internetan liytʼañapatakiw uñachtʼayaraksna. Tamanak tumptʼir mä jilatan esposapajja, akham yatichañ qalltasaw askinak jikjjati: “‘¿Diosat tʼaqhesiñanak utjaypacha?’ sasaw waljanejj jisktʼasipjje, ¿kunjamäpachas uk jumajj yatiñ munasmati? Ukjja niya mä minutonakwa yatjjatsnajja” sasa. Ukjjarojja, uka yatichäwin grabacionap celularapar apaqtʼkäna ukwa istʼayi, tukuyañatakejja, Kunsa yatichi sat libron 11 jaljapwa uñjjattʼayaraki.