‘Espíritu santojj mayachtʼat jakasiñ churistu’
ÉFESO markankir cristianonakarojja, apóstol Pablojj akham sänwa: “Maynit maynikam munasiñamp aguantasipjjam, espíritu santojj mayachtʼat jakasiñ churkistu ukarjam sarnaqañatak wal chʼamachasipjjam, sumankañan jakasipjjarakim” (Efes. 4:2, 3).
“Espíritu santojj” mayachtʼat jakasiñ churistu sasaw Pablojj säna. Uka espíritu santojj Diosan chʼamapawa. Ukampis Pablojja, espiritojj mayachtʼat jakasiñ churkistu ukarjam sarnaqañatak chʼamachasiñasatakiw chʼamañchtʼistu. Sapa mayni cristianow uka mayachtʼat jakasiñ utjañapatak chʼamachasiñapa.
Maynis mä machaq auto regalkiristam ukham amuytʼañäni, ¿khitis uka auto sum cuidañapa? Jumaw cuidañama. Jan sum cuidatamattï uka autojj jan sartjjaspa ukhajja, ¿regalktam ukarut juchañchasma? Janiwa.
Diosan markapan mayachtʼatäñajj utjki ukajj Diosan regaloparakiwa, ukampis sapa mayniw mayachtʼatäñatakejj chʼamachasiñasa. Ukhamajj mä jilatampi jan ukajj mä kullakamp jan sum apaskstan ukhajj akham sasaw jisktʼasiñasa: “¿Espíritu santojj mayachtʼat jakasiñ churkistu ukarjam sarnaqañatakit chʼamachasisktjja? ¿Uka jan waltʼäwi askichañatakejj chʼamachasiskti?” sasa.
“MAYACHTʼATÄÑATAKEJJ WAL CHʼAMACHASIPJJAM”
Kunjamtï uñjaniwayktanjja, awisajj espíritu santojj churkistu ukarjam mayachtʼatäskakiñatakejj wal chʼamachasiñaw wakisi sasaw Pablojj säna. Yamas maynitï congregacionan chuym ustʼaykistu ukhaw chʼamachasiñasajj wakisini. Mayachtʼatäskakiñatakejj chuym ustʼaykistu uka jilatampi jan ukajj uka kullakamp parlañajj ¿wakisipuniti? Janiwa. Antisas akham sasaw jisktʼasiñasa: “Nayatï jupamp parlä ukhajja, ¿Diosan markapan mayachtʼatäñatakit ukajj yanaptʼani, jan ukajj jukʼampikich jan waltʼayasipkäjja?” sasa. Awisajj chuym ustʼayawaykistu ukar perdonaña, jan ukajj uka toqet jan parljjañaw wakisispa (Prov. 19:11; Mar. 11:25).
“Nayatï jupamp parlä ukhajja, ¿Diosan markapan mayachtʼatäñatakit ukajj yanaptʼani, jan ukajj jukʼampikich jan waltʼayasipkäjja”.
Apóstol Pablojja, “maynit maynikam munasiñamp aguantasipjjam” sasaw ewjjtʼäna (Efes. 4:2). Uka arunakajja, “mayninakajj kunjamäpkitï ukarjam uñjaña” sañwa munaspa (Comentario para exégesis y traducción. Carta a los Efesios, Mariano Ávila Arteaga). Ukhamajj jilat kullakanakarojj suma chuymampiw uñjañasa, jupanakajj jiwasjam pantjasirïpjjarakiwa, uk amtañasapuniwa. Ukhamarus taqeniw “machaq jaqëñampi” isthapisiñatakejj chʼamachasisktanjja (Efes. 4:23, 24). Ukampis janiw khitis jan pantjasisajj uk lurksnati (Rom. 3:23). Uk amtapuniñäni ukhajja, maynit maynikam aguantasiñasa, perdonasiñas janiw chʼamäkaniti, ukhamatwa “espíritu santojj mayachtʼat jakasiñ churkistu” ukarjamajj sarnaqaskakiñäni.
Chuym ustʼaykistu ukampitï parltʼañäni, jan waltʼayasktan uk askicharakiñäni jan ukajj chuymas manqhan jupar perdonañäni ukhajja, ‘sumankañ utjañapatakiw’ yanaptʼañäni. Efesios 4:3 texton mayachtʼatäñat parlki ukajja, kunjamtï ankunakajj chʼakhanakar mayachthapki uka toqet parlañatakiw apnaqasiraki. Jan waltʼayasiñanakajj utjani ukhajja, ukhamarakiw sumankañampi munasiñampejj jilat kullakanakasamp mayachtʼatäskakiñatakejj yanaptʼistani.
Ukhamajj mä jilatasa jan ukajj mä kullakas chuym ustʼayistani jan ukajj colerayistani ukhajja, jupat jan walinak parlañat sipans sinttʼasiñasawa (Col. 3:12). Niyakejjay taqenis pantjasirïstanjja, jiwasajj maynirojj chuym ustʼayarakpachätanwa. Uk amtañaw “espíritu santojj mayachtʼat jakasiñ churkistu” ukarjam sarnaqañatak chʼamachasiñatak yanaptʼistani.