Jehová Diosat humilde chuymanïñ yateqasipjjañäni

1. Diosan humilde chuymanïtapat lupʼiñajj ¿kunatsa wali musparkañajja?

ORAQPACHAN utjki uka gobiernonakajj ¿humilde chuymanïpjjpachati? Amuyatajj janjamakiw humilde chuymanïpkiti. Ukampis Taqe Chʼamani Jehová Diosajj wali humilde chuymaniwa (Sal. 113:5-8). Janipuniw jupajj akchʼas jachʼa jachʼa tukkiti, janirakiw khitis jupjam humilde chuymanejj utjkiti. Aka yatichäwinjja, kunjamsa Jehová Diosajj fácil jakʼachaskayätapsa, amuytʼirïtapsa, paciencianïtapsa ukat mayninakar jachʼar aptirïtaps uñachtʼayäna ukwa yatjjataskañäni. Ukatjja taqe ukanakan kunjamsa humildëtap uñachtʼayäna ukwa yatjjatarakiñäni. Ukjjarusti kunjamsa Jesusajj Awkipjam humilde chuymanirakïna ukwa yatjjatañäni. Taqe ukanakaw Jehová Diosar jukʼamp jakʼachasiñataki, jukʼamp humilde chuymanïñatak chʼamachasiñatak yanaptʼistani.

JEHOVÁ DIOSAJJ FÁCIL JAKʼACHASKAYAWA

2. Salmo 62:8 textojj ¿kunsa Jehová Diosat yatichistu? (Foto uñjjattʼarakïta).

² Jachʼa jachʼa tukur jaqenakar jakʼachasiñajj ajjsarañjamawa. Jupanakajj wali importantëpkaspas ukhamaw tukupjje, ukatwa jaqenakajj jupanakar jan jakʼachasiñ munapkiti ni jupanakampïñs munapkiti. Ukampis Jehová Diosajj wali humilde chuymaniwa, jupar jakʼachasiñasataki, kunjamas jikjjatastan, kunsa pienstan ukanak cuenttʼañasatakiw jupajj invittʼistu (Salmo 62:8 liytʼäta). Kunjamtï mä munasir awkejj wawanakapan llakinakap wali atencionamp istʼkejja, ukhamarakiw alajjpachankir Awkisajj taqe servirinakapan oracionanakap wali atencionamp istʼi. Ukatwa nayra servirinakapan oracionanakap Bibliar qellqayawayi, ukaw Jehová Diosan wali jakʼachaskayätap uñachtʼayistu (Jos. 10:12-14; 1 Sam. 1:10-18). Ukhamäkchisa sapa kuti pantjasitas laykojj oración toqe Jehová Diosar jakʼachasiñajj chʼamakïspawa. ¿Kunas jupar jakʼachasiñatak yanaptʼistaspa?

3. Jehová Diosajj oración toqe sapa kuti jupar jakʼachasiñas muni sasajj ¿kunatsa sissna?

³ Jehová Diosajj janiw munaskitaspati sasins amuykstanjja, juparojj oración toq jakʼachassnawa. Uk sum amuytʼañatakejja, herenciap tukuntir waynat Jesusajj parlkäna uka uñachtʼäwit parltʼañäni. Herenciap tukuntir waynajja, “kunayman juchanakar purtʼasitaj laykojj janiw tatajajj utar kuttʼañajj munkaspati” sasaw amuyäna. Ukampis utar kuttʼkäna ukhajja, ¿kunjamsa wali khuyapayasir awkipajj katoqpachäna? Jupar uñjasajj ‘jupan ukaruw tʼijüna, wali munasiñampiw qhomantäna, jampʼattʼarakïnwa’ (Luc. 15:17-20). Jehová Diosajj uka khuyaptʼayasir awkjamawa, inas jiwasajj walja llakinakan uñjasisasa jan ukajj mä jachʼa juchar purtʼasisas qʼala aynachtʼatäskstan. Ukhaman uñjaskasas jupar orastan ukhajja, jupajj humilde chuymanïtapat wali atencionampiw istʼistu (Lam. 3:19, 20). Ukat wali khuyaptʼayasirïtap laykojja, jiwasar chuymachtʼiris ‘tʼijunkaspa’ ukhamawa, ukhamat qhawqsa munasistu ukat perdonarakistu uk uñachtʼayañataki (Is. 57:15). ¿Kunjamsa chuymachtʼistu? Jilpachajj ancianonak toqe, Testigo familiaranakas toqe, ukat yaqha jilat kullakanak toqew chuymachtʼistu (Sant. 5:14, 15). Jupan jakʼapankañas munatap laykuw Jehová Diosajj ukham yanaptʼistu.

4. ¿Kunjamsa Jesusajj fácil jakʼachaskayätap uñachtʼayäna?

⁴ Jesusajj Awkipat yateqasïna. Jupajj Awkipjam wali humilde chuymaniwa. Ukatwa aka oraqenkkäna ukhajj jaqenakajj jan ajjsaras jupar jakʼachasipjjäna, jan ajjsarasaw kuns jisktʼapjjarakïna (Mar. 4:10, 11). Mä kuna toqet jupajj jaqenakar jisktʼirïna ukhajja, jan ajjsartʼasaw jupanakajj kuntï amuyapkäna uk sapjjerïna (Mat. 16:13-16). Pantjasipkäna ukhasa, janiw ajjsarañat khatatipkänti, kuna laykutejj Jesusan munasirïtapsa paciencianïtaps yatipjjänwa (Mat. 17:24-27). Jesusajj Awkipat yateqasitap sumpun uñachtʼayäna, uk uñjasaw arkirinakapajj Jehová Diosar jukʼamp sum uñtʼapjjäna (Juan 14:9). Uka tiempon religión pʼeqtʼirinakajj wali qhorunaka, jachʼa jachʼa tukurinaka, jan sinttʼasiri ukhamäpjjänwa. Ukampis Jehová Diosajj jupanakat sipans wali humildewa, fácil jakʼachaskayarakiwa. Ukwa Jesusan arkirinakapajj jupar uñjasajj yateqapjjäna.

5. ¿Kunjamsa humilde chuymanïñajj jakʼachaskayäñatak yanaptʼistu?

⁵ ¿Kunjamsa Jehová Diosat yateqassna? Humilde chuymanïstan ukhajja, mayninakajj jan ajjsarasaw jiwasar jakʼachasipjjestani. Janitï humilde chuymanïksnajja, mayninakat envidiasjjaksnawa, jupanakat sipans jilankksnas ukhamwa amuyasiraksna, janirakiw kun luratas perdonjjsnati. Ukhamätasat jaqenakajj janiw jiwasar jakʼachasjjapjjestaspati, ukampis humilde chuymanïñäni ukhajja, munasiñampi pacienciampiw mayninakar uñjañäni, perdonañas facilakirakïniwa. Ukham chuymanïtasat jaqenakajj jakʼachasipjjakistaniwa (Col. 3:12-14). Ancianonakaw jakʼachaskayäñatakejj jukʼamp chʼamachasipjjañapa. Jan ajjsaras jupanakar jakʼachasipjjañapatakejja, jilat kullakanakamp chikachasipjjañapaw wakisi. Ukatwa videoconferencia toqe conectasiñat sipans tantachäwinakar sarañatak chʼamachasipjje. Ukat jilat kullakanakamp chik utat uta predikir sarañatakejj chʼamachasipjjarakiwa. Ukhamatwa jilat kullakanakajj ancianonakar jukʼamp sum uñtʼapjje ukat yanaptʼa munapki ukhas jan ajjsarasaw jupanakar jakʼachasipjjaraki.

JEHOVÁ DIOSAJJ AMUYTʼIRIWA

6, 7. Kunjamsa Jehová Diosajj servirinakapan ruwtʼasitanakapar istʼäna uk qhanañchtʼam.

⁶ Jachʼa jachʼa tukur jaqenakajja, jupanakakis razonanïpkaspa ukhamwa jilapartejj amuyasipjje, ukat janiw kuntï amuyapki uk cambiapkiti. Ukampis Jehová Diosajj taqe kunans razonanipuniwa, wali yatiñanirakiwa, ukhamäkchisa humilde chuymampiw mayninakar istʼi. Mä kutejj Miriamampi Aaronampejj Moisés jilap contraw parlapjjäna, uk uñjasajj kunsa Diosajj lurpachäna uk amuytʼañäni. Moisés ajllitap contra parlapjjatapajj janipuniw walïkänti, kuna laykutejj jupa contra parlasajj Dios contras parlapkaspa ukhamänwa. Ukatwa Jehová Diosajj wal colertʼasïna, lepra usumpiw Miriamar castigarakïna. Uk uñjasajja, Aaronajj Moisesaruw jupar yanaptʼañapatak wal ruwtʼasïna, ukat Moisesajj Jehová Diosarurakiw Miriamar qolltʼañapatak ruwtʼasïna. ¿Kunsa Diosajj lurpachäna? ¿Castigatäñapawa saskakpachänti? Janiwa. Kuna laykutejj Jehová Diosajj wali humilde chuymaniwa, ukatwa Moisesar istʼasajj Miriamar qolläna. Ukampis jachʼa jachʼa tukur mä jaqejj janiw uk lurkaspänti (Núm. 12:1-15).

⁷ Yaqha horasan Jehová Diosajj humilde chuymanïtap uñachtʼayarakïnwa. Mä profeta taypejja, usutäkäna uka Ezequías reyirojj jiwätawa sasaw Jehová Diosajj yatiyäna. Ukatwa reyejj usupat qollañapatak Jehová Diosar jachtʼasis ruwtʼasïna. ¿Diosajj mayisitaparojj istʼpachänti? Jïsa, istʼänwa. Wali khuyaptʼayasirïtapat 15 maranakampiw jakañ vidaparojj yapjjatäna (2 Rey. 20:1, 5, 6). Kunjamtï uñjktanjja, Jehová Diosajj jaqenakat walpun sinttʼasi, humilde chuymanïtapat jupanakarojj istʼarakiwa.

8. ¿Kunanakas Jesusan amuytʼirïtap uñachtʼayi? (Marcos 3:1-6).

⁸ Jesusajj Awkipat yateqasïna. Aka oraqenkkäna ukhajj Jesusajj wali amuytʼirïnwa, jaqenakajj yanaptʼa munapkäna ukhas yanaptʼarakïnwa. Jan sinttʼasiri religión pʼeqtʼirinakajj janisay munapkchïnjja, sábado urun usutanakaruw qolläna (Marcos 3:1-6 liytʼäta). Jichhajj cristiano congregación pʼeqtʼirjamas ukham chuymanikïskiwa. Sañäni, jachʼa juchar purtʼasirirojj wali pacienciampiw uñji, cambiañapatakis tiemp churarakiwa (Apoc. 2:2-5).

9. Amuyusansa luratasans ¿kunjamsa Jehová Diosjam amuytʼirïtas uñachtʼaysna? (Fotonak uñjjattʼarakïta).

⁹ ¿Kunjamsa Jehová Diosat yateqassna? Amuyusansa luratasansa Diosjam amuytʼirïñasawa (Sant. 3:17). Jehová Diosat yateqasir awk taykanakajja, janiw wawanakaparojj kuntï jan lurirjamäpki uk lurapjjañap mayipkiti. Uka toqet Jacobojj wali yateqaskayawa. Génesis 33:12-14 textorjamajja, janiw wawanakaparojj kuntï jan lurirjamäpkäna uk lurapjjañap maykänti. Ukat humilde chuymani amuytʼiri awk taykanakajj janiw mä wawaparojj mayni wawanakapamp igualayapkiti. Ancianonakajj amuytʼirïpjjañaparakiwa. Amuyuparjam lurayañat sipansa, janitï Biblian wiñay yatichäwinakap conträkchi ukhajj kuna amtarutï jilaparte ancianonakajj puriwayjjapjje ukaruw apoyapjje (1 Tim. 3:2, 3). Ukat janisay mayninakjam amuykchiñänejja, taqeniw kunsa mayninakajj piensapjje, kunjamas jikjjatasipjje uk amuyañatak chʼamachasiñasa (Rom. 14:1). Taqeniw Filipenses 4:5 textorjam lurañ muntanjja, ukan akham siwa: “Jumanakan amuytʼirïpjjatam taqeni yatipjjpan” sasa (Filip. 4:5).

JEHOVÁ DIOSAJJ PACIENCIANIWA

10. ¿Kunjamsa Jehová Diosajj paciencianïtap uñachtʼayäna?

¹⁰ Jachʼa jachʼa tukur jaqenakajj janiw paciencianïpkiti, ratukiw kuns munapjje. ¡Ukampis Jehová Diosajj janiw jupanakjamäkiti! Jupjam wali paciencianejj janiw alajjpachansa ni aka oraqens utjkiti. Noé tiemponwa uk uñachtʼayäna, jan wali jaqenakar jankʼak tukjañat sipansa, 120 maranakaw suytʼäna (Gén. 6:3). Uka tiemponwa Noé chachajj wawanakapar jilarayäna, familpachaw arca lurapjjarakïna. Mä qhawqha tiempot Jehová Diosajj Sodoma ukat Gomorra markanakar tʼunjañatak mä amtar purkäna ukhajja, wali atencionampiw Abrahanan jisktʼanakapar istʼäna. Jachʼa jachʼa tukur mä jaqejj inas Abrahanar akham sischispäna: “¿Khitïtas jumajj nayar jiskhiñatakejja?” sasa. Ukampis Jehová Diosajj janiw Abrahanar ukham siskänti, jupajj wali humildewa paciencianirakiwa (Gén. 18:20-33).

11. 2 Pedro 3:9 textorjamajj ¿kunatsa Jehová Diosajj jichha tiempon jaqenakar wali pacienciamp uñji?

¹¹ Jichha tiempon Jehová Diosajj wali paciencianirakiwa. Aka jan wali pach tukjkani uka uru puriniñapkamajj wali pacienciampiw suytʼaski. Kuna laykutejj “janiw khitin jiwañapsa jupajj munkiti, jan ukasti taqenin arrepentisipjjañapwa muni” (2 Pedro 3:9 liytʼäta). Ukham paciencianïtapatjja, walja millón jaqenakaw jupar uñtʼawayapjje. Ukat walja millón jaqenakajj jupar uñtʼasipkakispa ukwa muni. Ukampis pacienciapajj janiw wiñayatakïkiti, jaqenakarojj wals munaskchejja, janiw munañanakap wiñayatak luraykaniti. Jupajj jan mayampitakiw jan walinak chhaqtayani (Hab. 2:3).

12. ¿Kunjamsa Jesusajj Awkipjam paciencianïtap uñachtʼayi?

¹² Jesusajj Awkipat yateqasïna. Walja maranakaw Jesusajj Awkipjam humilde chuymanïtap uñachtʼayawayi. Kunjamsa Supayajj Diosatsa jupat jan jitheqtir servirinakapats kʼarinak parlawayi uk jupajj sum uñjawayi (Gén. 3:4, 5; Job 1:11; Apoc. 12:10). Jaqenakar tʼaqesiskirs uñjawayarakiwa. Taqe ukanak uñjasajj “Diablon luratanakap” wal tʼunjañ munpacha (1 Juan 3:8). “Diablon luratanakap tʼunjañ horasäjjewa” sasin Jehová Diosan sañapkamajja, ¿kunas Jesusarojj pacienciamp suytʼañatak yanaptʼi? Humilde chuymanïtapaw wal yanaptʼi, ukat ak yatiraki: Jehová Diosakiw kunapachas akapachajj tʼunjasini uk amtaspa (Hech. 1:7).

13. ¿Kuna horasas Jesusajj apostolonakapar pacienciamp uñjatap uñachtʼayäna, ukat kunatsa?

¹³ Jesusajj aka oraqenkaskäna ukhajja, apostolonakaparojj wali pacienciampiw uñjarakïna. Khitis jiwasat jilïrejja sasin sapa kuti jiskhisipkäna ukhajja, wali pacienciampiw istʼäna, janiw coleraskänti (Luc. 9:46; 22:24-27). Cambiapjjaniwa sasaw jupajj confiyäna. ¿Jiwasat kamsasirakispasa? ¿Kutin kutinit pachpa juchar purtʼastanjja? Ukhamächi ukhajja, Jesús Reyisan wali humilde chuymanïtapata, wali paciencianïtapat walpun yuspärpachätanjja.

14. ¿Kunas jukʼamp paciencianïñatakejj yanaptʼistani?

¹⁴ ¿Kunjamsa Jehová Diosat yateqassna? Jupjam amuyañataki, jupjam kuns lurañatakejja, “kunjamtï Cristojj amuyki” ukham amuyañwa yateqañasa (1 Cor. 2:16). Ukatakejj Bibliankir Evangelionakwa liytʼañasa, kunanaksa Jesusajj luräna ukat kunatsa ukanak luräna uka toqet lupʼiñatakiw tiempo apstʼasiñasa. Ukatjja “Yoqamjam humilde chuymanïñatak yanaptʼita” sasaw Jehová Diosar mayiñasaraki. Kunjamtï Cristojj amuyki ukham amuyañatak chʼamachasiñäni ukhajja, Jehová Diosat jukʼamp yateqasisajj mayninakarojj pacienciampiw uñjañäni, jiwas pachpas pacienciampiw uñjasirakiñäni (Mat. 18:26-30, 35).

JEHOVÁ DIOSAJJ HUMILDENAKAROJJ JACHʼARUW APTI

15. ¿Kunjamsa Jehová Diosajj humilde chuyman jaqenakarojj jachʼar aptawayi? (Salmo 138:6).

¹⁵ (Salmo 138:6 liytʼäta). Aka oraqensa alajjpachansa, Jehová Diosajj Taqe Chʼamaniwa, ukhamäkchisa jan yäqatäpki ukanakarojj jachʼaruw apti. Kunjamsa uk lurawayi uk jichhajj uñjañäni. Mä qhawqhanejj inas jiwasatakejj jan uñtʼatäpkchiti, ukampis Jehová Diosajj jupanakat Bibliaruw qellqayawayi. Débora warmit parltʼañäni, jupajj mä 125 maranakaw Isaac ukat Jacob chachanakar sirvientat servïna. Uka warmit janis añch yatiskchejja, Diosan amuytʼayatäsaw Moisesajj uka warmin sutip Biblian qellqäna, jupajj qhawqha munatänsa uk Biblian qellqarakïnwa. Kunapachatï jupajj jiwjjäna ukhajja, imtʼapkäna uka cheqarojj Alón-Bacut sutimpiw Jacobojj uchäna, uka sutejj “jachañ roble qoqa” sañwa muni (Gén. 24:59; 35:8). Walja maranak qhepatjja, Jehová Diosajj ovej awatir David waynituruw Israel markan reyipäñapatak ajllïna (2 Sam. 22:1, 36). Jesusan Belén markan nasitapatjja, Diosajj mä qhawqha awatirinakaruw mä ángel toqe yatiyäna, jupanakaw Mesiasan nasitapat nayraqat yatipjjäna (Luc. 2:8-11). Kunapachatï Joseampi Mariampejj Jesusar templor nayrïr kuti apapjjäna ukhajja, Jehová Diosajj Simeonampir Anampiruw Jesús Wawapar uñjayäna, uk lurasaw wali jilïr servirinakapar jachʼar aptäna (Luc. 2:25-30, 36-38). Ukhamasti “Jehová Diosajj wali jachʼa Diosäkchisa, humilde chuyman jaqerojj wali sum uñji”.

16. ¿Kunjamsa Jesusajj Awkipat yateqasitap uñachtʼayäna?

¹⁶ Jesusajj Awkipat yateqasïna. Jesusajj Jehová Diosjamarakiw humildenakarojj jachʼar aptäna. ‘Jan yatjjatat aleq jaqenakaruw’ Diosan Reinopat yatichäna (Hech. 4:13; Mat. 11:25). Usutanakarus wali munasiñampiw qollarakïna, ukham qollasajj jachʼaruw jupanakar aptäna (Luc. 5:13). Jesusajj janïr jiwkäna uka arumajja, apostolonakaparuw kayunakap jareqäna. Sirvientenakakiw uk lurapjjerïna (Juan 13:5). Ukat janïr alajjpachar sarkasajja, taqe arkirinakaparuw mä wakiskir luräwi churawayistu: ukajj wiñay jakañ katoqapjjañapatak jaqenakar yanaptʼañawa (Mat. 28:19, 20).

17. ¿Kunjamsa Jehová Diosat yateqassna? (Foto uñjjattʼarakïta).

¹⁷ ¿Kunjamsa Jehová Diosat yateqassna? Taqe jaqenakar predicasaw jupat yateqastanjja. Kuna jañchinïskpansa, kuna markatäskpansa, yatjjattʼatäskpansa janisa, taqeniruw suma yatiyäwinak prediktanjja. Maysa toqetjja, jilat kullakanakasar munasiñampi respetomp uñjasaw Jehová Diosat yateqasiraktanjja. Inas congregacionan mä luräwi katoqstan jan ukajj mä kuns lurtʼañ yatstan, ukhamïpan janiw jilat kullakanakasat sipans jilankksnas ukham amuyastanti (Filip. 2:3). Humildëtasatsa jilat kullakanakasar jachʼar aptatasats Jehová Diosajj wal kusisi (Sof. 3:12; Rom. 12:10).

18. ¿Kunatsa Jehová Diosat humilde chuymanïñ yateqasiñ muntanjja?

¹⁸ Wali munasir Awkisjam humilde chuymanïñatak chʼamachasiñäni ukhajja, fácil jakʼachaskaya amuytʼiri ukat pacienciani jaqëñäniwa. Ukat Jehová Diosjamarakiw jilat kullakanakasar munasiñampi respetomp uñjasajj jachʼar aptañäni. Ukhamajj Jehová Diosat yateqasis humilde chuymanïñatak jukʼamp chʼamachasiñäni ukhajja, jupatakejj jukʼamp valoranïñäniwa (Is. 43:4).