Oraqpachan Jilïr Irpirinakan qellqanitapa

Munat jilat kullakanaka:

“Taqe jumanakatjja Diosarojj yuspagarapjjapuntwa, oracionanakajjanjja jumanakat amtasipjjapuntwa. Dios Awkisan nayraqatapanjja jumanakatjja amtapjjtwa qawqha iyawsañampis irnaqapjjta, qawqha munasiñampis servipjjta, ukhamarak Tatit Jesucristosar suytʼañanjja chʼamamp saytʼapjjatama[ta].” (1 Tes. 1:2, 3.) Uka arunakajj ¡qawqsa jumanakar munasipjjsma ukwa qhanañchi! Wali sum irnaqtʼasipktajja, ukatwa Jehová Diosar wal yuspärapjjta.

Pasïr marajj Diosan Reinopatak ‘qawqha iyawsañampis irnaqtʼawayapjjta’, ‘qawqha munasiñampis serviwayapjjta’ uk yatiñajj wali kusiskañawa. Waljaniw yatiyañatak jukʼamp chʼamachasiwayapjjta. Amuytʼañataki, kawkhantï yatiyirinakajj munaski ukawjanakaruw sarapjjta, pachpa markamansa jan ukajj yaqha markanakarusa. Yaqhepanakasti walja jaqenak utjki uka cheqanakanwa yatiyawayapjjarakta. Jesusan jiwäwip amtaskäna uka phajjsinakansa, tamanak tumptʼir jilat tamar visittʼkäna ukhas precursor auxiliarjamaw irnaqtʼawayapjjta ukat 2014 agosto phajjsisa ¿Khitis jisktʼanakasar qhanañchaspa? sat tratadonak lakirañatakis wal chʼamachasiwayapjjaraktajja. Ukham Jehová Diosar taqe chuym servipjjatamatjja wal yuspärapjjsma (Col. 3:23, 24). ‘Qawqha iyawsañampis irnaqtʼasipkta’ uk yatisins wal Jehová Diosar yuspärapjjta.

Ukhamarak Jehová Diosar jachʼañchañataki utanakajj luraski ukan “qawqha munasiñampis” yanaptʼawayapjjta ukatsa wal yuspärapjjsma. Cheqas Jehová Diosan markapajj walipuniw jiljjattaski, ukatwa Diosar yupaychañatak utanak jukʼampi lurasiñapajj wakisi (Isa. 60:22). Pasïr marajja, 8.201.545 ukhaniw Diosan arunakap yatiyawaytanjja, ukat sapa phajjsejj 9.499.933 ukhanirurakiw Bibliat yatichasiwayi. Ukatwa sucursalanak jachʼaptayañasa jan ukajj askichasiñapas wakisiwayi. Ukhamarak Tantachasiñ Utanak lurasiñapas munasi. Ukhamarus yaqhep markanakanjja, yaqha arur jaqokipañatak utanakaw munasiraki, ukhamat kuna artï parlapki ukawjan traductoranakajj jakapjjañapataki.

Ukhamasti, ¿kunjamsa jiwasajj yanaptʼsna? Inas yaqhepajj trabajir sarsna. Ukampis utanak lurañsa yatiñäni, janisa, taqeniw ‘qamir kankañasampi’, mä arunjja kunanakatï utjkistu ukanakampi yanaptʼsna (Pro. 3:9, 10). Israelitanakajj tabernáculo lurañatakejj walja yänakwa apapjjäna, ukhamïpansti jan jukʼampi apjjapjjañapatakiw yatiyasjjäna (Éxo. 36:5-7). Biblian ukham ewjjtʼanakapajj chuymaruw purtʼistu, amuytʼayarakistuwa. Munat jilat kullakanaka, “qawqha munasiñampis” ukham irnaqtʼapjjta uk yatisajj wal Jehová Diosar yuspärapjjta.

Kunjamsa jilat kullakanakajj jan walinakar saykatasipki uk yatiñajj wal chuym chʼalljjtayapjjetu. Sañäni, Corea del Sur markanjja, 1950 marat aksaruw waynasipki uka jilatanakasajj kunatï Bibliarjamajj jan walïki uk jan lurañ munapjjatapat carcelar mä qawqha mara jan ukajj walja maranak jistʼantat uñjasiwayapjje. Walja jilatanakaw ukham tʼaqhesita uñjasiwayapjje. Jan walinakar saykatapjjatapajj iyawsäwis jukʼampiw chʼamañchi.

Eritrea markanjja, kimsa jilatanakajj 20 mara jilaw carcelar jistʼantat uñjasipjje. Kullakanakas ukhamarakiw jiskʼa wawanakapampi mä qawqha maranak carcelar jistʼantat uñjasipjje. Apsuñatakis chʼamachaskchejja, jichhakamas janiw apsuskiti. Ukhamäkchi ukasa, jilat kullakanakasajj janiw Diosat jitheqtapkiti. Jan walinakan jikjjataskasasa, Diosar taqe chuym servisipkakiwa. Nanakajj wal jupanakataki Diosat mayirapipjjta (Rom. 1:8, 9).

Cheqas jumanakat jilapartejj janiw carcelan jistʼantat uñjasipktati. Ukampis chuymankipstasa, usuntasaw tʼaqhesita uñjasipjjta, yaqhepasti Diosar jan servir familiaranakampi jarkʼataw uñjasipjjarakta jan ukajj yaqha jan waltʼäwinakanwa uñjasipjjta. Ukhampachasa Jehová Diosar servisipkaktawa (Sant. 1:12). ¡Walikpun ukham lurasipktajja! Ukham jan jitheqtas servipjjatamatjja walpun Jehová Diosar yuspärapjjta.

Cheqas qawqha munasiñampis irnaqtʼawayapjjta, qawqha munasiñampis serviwayapjjta ukat Diosarus jan jitheqtas yupaychawayapjjta taqe ukanakat ‘Jehová Diosaruw yuspärapjjta, Jupasti suma Diosawa.’ (Sal. 106:1, NM). Jilat kullakanaka walpun munasipjjsma, Jehová Diosarus, jan walinakar saykatañataki chʼam churañapataki ukat bendiciñapatakiw wal mayirapipjjsma, ukhamat wiñaya Diosar servipjjañamataki.

Jilatanakama,