Jukʼamp jaqenakaw sapakïpkaspas ukham amuyasipjje | ¿Bibliajj uka toqet kamsisa?

Oraqpachan yatjjatasiwayki ukarjamajja,a sapa pusi jaqenakat mayniw sapakïkaspas ukham amuyasi.

• “Qhawqha maranïskchiñänisa, kuna markatäskchiñänisa taqeniw mayninakat saparstʼat uñjassna” (Chido Mpemba, copresidenta de la Comisión de la Organización Mundial de la Salud sobre Conexión Social).

Janiw jilïr jaqenakaki jan ukajj sapak jakasipki ukanakakejj sapakïpkaspas ukham amuyasipkiti. Jan ukasti, wayn tawaqonakasa, kʼumaräpki ukanakasa, casaratanakasa, sum jakasipki ukanakas ukhamarakiw sapakïpkaspas ukham amuyasipjje, ukajj wali musparkañawa. Mayninakat jayarstʼañasa sapak jikjjatasiñas jaqerojj usuntayaspawa, llakisiyarakispawa.

• “Sapak jikjjatasiñajj janiw aleq ukhamakïkiti [...]. Sapak jikjjatasipjjatap layku jiwañ munapki ukanakajja, sapa urojj 15 cigarrillonaksa fumapjjaspa ukhamawa” (Vivek Murthy, director general de Salud Pública de Estados Unidos).

Bibliajj kamsisa

Diosajj janiw mayninakat jayarstʼañas munkiti. Diosajj suma amigonakanïsna, jupanakampis kusistʼsna ukwa nayratpach munäna.

• Texto: “Diosajj sarakïnwa: ‘Chachan sapaki jakaskakiñapajj janiw walïkiti’” (Génesis 2:18).

Diosajj jupan amigopäsna ukwa muni. Jiwasatï Diosar jakʼachasiñatak chʼamachasiñäni ukhajja, jupajj jiwasar jakʼachasirakiniwa (Santiago 4:8).

• Texto: “Kusisiñanïpjjew Diosat yatjjatañajj kunja wakiskirisa uk amuyasirinakajja, alajjpachankir Reinojj jupanakankiwa” (Mateo 5:3).

Diosajj yaqhanakamp chika jupar adorañaswa muni. Ukham lurtan ukhajj jukʼamp kusisitätanwa.

• Texto: “Mayninakajj kunjamäsipkisa ukjja amuyapjjapuniñäni, ukhamat munasiñasa suma luräwinakasa jukʼamp utjañapataki. Tantachäwinakasjja janirak jaytanukupjjañäniti, [...] antisas maynit maynikam chʼamañchtʼasipjjañäni” (Hebreos 10:24, 25).

Jan sapak jikjjatasiñataki chʼamachasiñamajj kunja wakiskirisa uka toqet jukʼamp yatiñatakejja, “Soledad en la era de la comunicación” siski ukwa liytʼasma.