Jesusajj qamirïñ toqetwa ewjjtʼäna

Jesusajj mä fariseon utapanwa manqʼaskäna, ukañkamasti uta anqanjja waljaniw Jesusar suyasipkäna. Galileankkäna ukhajja, ukhamarakiw suyapjjäna (Marcos 1:33; 2:2; 3:9). Judeanjja waljaniw uñjañ munapjjäna, yatichäwipsa istʼañ munapjjarakïna, jupanakajj janiw Jesusampi manqʼapkäna uka fariseonakjamäpkänti.

Jesusajj discipulonakaparuw nayraqat mä suma ewjja churäna, akham sasa: “Fariseonakan levadurapat amuyasipjjam, mä arunjja jupanakan kʼari chuymanakapat amuyasipjjam” sasa. Jesusajj nayraw uka toqet ewjjtʼäna, ukampis uka manqʼäwinwa uka ewjjtʼajj kunja wakiskirïnsa uk amuyäna (Lucas 12:1; Marcos 8:15). Inas fariseonakajj kʼari chuymanïpjjatap imantañ laykojj khuyaptʼayasirïpkaspas ukham tukupjjchïna, ukampis jupanakajj kunjam chuymanïpjjänsa uk qhanstañapajj wakisïnwa, ukatwa Jesusajj akham säna: “Kunatï suma imantatäki ukajj qhanstaniwa, kunatï jan yatiski ukas yatisirakiniwa” sasa (Lucas 12:2).

Jesusar istʼapkäna uka judionakat waljanejj inas kuntï Jesusajj Galilean yatichkäna uk jan istʼapkchïnti. Ukatwa Jesusajj Galilean yatichkäna uka pachpa yatichäwinak mayampi parlpachäna. Jupajj sänwa: “Cuerpo jiwayirinakarojj jan ajjsarapjjamti, ukat jukʼampjja janiw kuns lurapkaspati” sasa (Lucas 12:4). Jehová Diosaw uñjaskistani sasin taqe chuyma confiyapjjañapatakiw Jesusajj mayampi ewjjtʼäna. Ukatjja jaqen Yoqaparuw creyipjjañapäna, Diosan yanaptʼapatsa janiw pächasipjjañapäkänti (Mateo 10:19, 20, 26-33; 12:31, 32).

Mä jaqew kunas juparojj llakisiyäna uka toqet parläna, akham sasa: “Yatichiri, herencia jaljasipjjam sarapitay jilajaru” sasa (Lucas 12:13). Leyirjamajja jilïri yoqajj herenciat waktʼki ukat mä ukkhampiw katoqañapäna, ukhamajj janiw kunat chʼajjwañas utjañapäkänti (Deuteronomio 21:17). Amuyatajja uka jaqejj kunatï leyirjama jupar waktʼkäna ukat sipansa, jukʼampiw katoqañ munpachäna. Jesusajj wali amuyumpiw akham säna: “¿Khitis juezat jan ukajj herencia jaljirit jumanakjjar uttʼayitu?” sasa (Lucas 12:14).

Ukatjja akham sasaw taqenir ewjjtʼäna: “Nayranakam sum jistʼarapjjam, taqe kun munañanakatsa amuyasipjjam. Maynejj walja utjirinïkchisa, janiw ukanakajj jupar jakañ churkaspati” sasa (Lucas 12:15). Maynejj wali utjirinïkchinisa, jiwañap urojj purinini ukhajja taqe ukanakwa jaytani. Jesusajj uk sum amuytʼayañatakejj mä uñachtʼäwitwa parläna, kunatsa Dios nayraqatan suma uñjatäñajj wakisi ukwa qhanstayäna.

Jesusajj sänwa: “Mä qamir jaqen oraqepaw sum achoqäna. Ukatwa uka jaqejj chuymapan akham amuytʼasïna: ‘Janirakis kawkjar uka cosechanak imañajas utjkitejjä, ¿jichhajj kamachakïsa?’ sasa. Ukatwa jupajj akham säna: ‘Ukhamajj ak lurä, manqʼa imañ utanak allthapisin jukʼamp jachʼanakwa lurasëjja, ukaruw trigonaksa kunatï utjkitu ukanaksa apthapëjja. Naya pachparuw akham sasirakëjja: “Juman suma utjirinakamajj waljäjjewa, walja maranakatak imkatatäjjarakiwa, jan llakisimti antisas manqtʼasim, umtʼasim, kusistʼarakim” sasa’. Ukampis Diosajj akham sasaw jupar säna: ‘Jan amuytʼasir jaqe, jichha arumpachaw jumarojj jiwayapjjätam. ¿Khitis imat utjirinakam katusini?’ sasa. Cheqansa jupatakik taqe kun arkuntasir jaqejj ukhamanwa uñjasi, ukampis janiw Dios nayraqatan qamirïkiti” sasa (Lucas 12:16-21).

Jesusan discipulonakapasa mayninakasa wali utjirinïñ munasajj Diosat jitheqtapjjaspänwa. Jan ukajj llakinakaw Jehová Diosar taqe chuyma serviñat jarkʼaspäna. Ukatwa Jesusajj qamirïñ toqet mayampi parläna, ukjja mä mara chikatani nayraw Qollun Yatichkäna ukhajj yaticharakïna.

Akham sänwa: “Jan jumanakajj jakañanakamat llakisipjjamti, kuns manqʼañäni sasajja. Janiraki cuerponakamatsa llakisipjjamti, kunampis isisiñäni sasajja. [...] Cuervo sat jamachʼinakat amuytʼapjjam, jupanakajj janiw phawapkisa ni yawipkisa, janirakiw jupanakan grano imañanakapasa ni manqʼa imañ utanakapas utjkiti, ukampis jupanakarojj Diosaw manqʼayi. ¿Janit jumanakajj uka jamachʼinakat sipansa jukʼamp valoranïpkta? [...] Kunjamsa lirio panqaranakajj jilasipki uk amuytʼapjjam, uka panqaranakajj janiw chʼamsa tukupkiti, ni qapupkisa. Nayajj sapjjsmawa, janiw ni Salomonas wali qamirïkasajj uka panqaranakjam sum isthapiskänti. [...] Kunsa manqʼapjjäta, kunsa umapjjäta ukanak jan jukʼamp thaqapjjamti, janirak jukʼamp llakisipjjamti. [...] Ukanakajj qhawqha wakiskiris jumanakatakejj ukjja alajjpachankir Awkimajj sum yati. Ukhamasti jupan Reinop thaqasipkakim, ukatjja Diosajj ukanak churapjjätamwa” sasa (Lucas 12:22-31; Mateo 6:25-33).

¿Khitinakas Jehová Diosan Reinop thaqasipkakpachäni? Jesusajj mä “jiskʼa tama”, mä arunjja, Diosat jan jitheqtiri mä qhawqha jaqenakakiw thaqapjjani sasaw säna. Qhepatwa uka jaqenakajj 144.000 ukhanikïpjjatap qhanañchasiñapäna. ¿Kunsa jupanakajj katoqapjjani? Jesusajj sänwa: “Awkimajj jumanakaruw Reino churañ amtawayi” sasa. Jupanakajja janiw aka oraqen wali qamirïñ thaqapjjañapäkänti, aka oraqenjja lunthataw ukanak apasjjaspäna. Antisas chuymanakapajja ‘kunatï wali valoranïki jan tukuskirikaraki’ ukankañapänwa, ukanwa jupanakajj Cristomp chika apnaqanipjjani (Lucas 12:32-34).