Kuna jan walinakatï aka oraqen utjki ukanakjja, niyaw Jehová Diosajj Reinop toqejj chhaqtayani. Uka yatiyäwejj wali sumapuniwa, ukatwa taqe jaqenakan uk yatipjjañapajj wakisi. Jesusajja arkirinakapan uka suma yatiyäwi oraqpachan yatiyapjjañapwa munäna (Mateo 28:19, 20). Jesusan uka arunakapar istʼapjjatapjja, ¿kunjamsa Jehová Diosan Testigonakapajj uñachtʼayapjje?

1. ¿Kunjamsa Mateo 24:14 textojj jichha tiempon phoqasiski?

Jesusajj akham sänwa: “Reinon aka suma yatiyäwinakapajja, aka oraqpachanwa yatiyasini” sasa (Mateo 24:14). Uka suma yatiyäwinak yatiyañajj Jehová Diosan Testigonakaparojj walpun gustapjjetu. Aka oraqpachanjja, 1.000 jila arunakanwa uka suma yatiyäwinak yatiyapjjta. Ukham lurasiñapatakejja suma organiztʼatäña ukhamarak chʼamachasiñaw wakisi. Cheqas Jehová Diosan yanaptʼapampiw uk lurapjjta.

2. ¿Kunanaksa jaqenakar predicañatakejj lurapjjta?

Kawkjanakantï jaqenakajj utjki uka cheqanakanwa predicapjjta. Ukatjja nayrïr cristianonakjamaw ‘utat ut’ predicapjjarakta (Hechos 5:42). Ukham organiztʼatäsaw sapa marajj walja waranqa waranqa jaqenakar suma yatiyäwinak yatiyapjjta. Ukampis jaqenakajj janiw utapankapkapuniti, ukatwa kawkjantï walja jaqenakajj utjki uka cheqanakan yatiyapjjta. Jehová Diosatsa kun lurañtï jupajj amtki uka toqetsa, jaqenakar yatiyañatakejj chʼamachasipjjapuntwa.

3. ¿Khitinakas suma yatiyäwinak yatiyapjjañapa?

Cheqpach cristianonakaw suma yatiyäwinak yatiyapjjañapa. Uk lurañajj nanakatakejj wali importantewa. Jaqenakajj suma yatiyäwinak istʼasakiw salvasipjjaspa, ukatwa predicañatak wal chʼamachasipjjta (1 Timoteo 4:16 liytʼäta). Ukham lurapjjatajat janiw khitis pagapkituti, Bibliajja akham siwa: “Gratisakiw katoqapjjtajja, gratisakirak churapjjam” sasa (Mateo 10:7, 8). Jaqenakajj janis istʼañ munapkchejja predicasipkaktwa, ukham lurasaw Jehová Diosar istʼapjjataj uñachtʼayapjjta, juparus kusisiyapjjarakta.

JUKʼAMP YATJJATAÑÄNI

4. Taqe jaqenakar yatiyañatakiw chʼamachasipjjta

VIDEO: “Taqe aka oraqpachana” yatiyasktanjja (7:33)

• ¿Kunanaktï Jehová Diosan Testigonakapajj lurapkta ukanakat kawkïris jumar wal musparaytamjja?

Mateo 22:39; Romanos 10:13-15 liytʼasajja aka toqetwa parltʼapjjäta:

• ¿Kunjamsa predicasajj jaqenakar munasipjjataj uñachtʼayaptjja?

• Suma yatiyäwinak yatiyapki ukanakarojja, ¿kunjamsa Jehová Diosajj uñji? (Romanos 10:15 uñjjattʼapjjäta).

5. Diosamp chikaw trabajipjjta

Jehová Diosajj predicacionan pʼeqtʼaskatapjja, kunaymaninakatwa yattanjja. Kunatï Nueva Zelanda markan paskäna uk uñjañäni, Paul sat mä Testigojja mä jaypʼojj utat uta yatiykasajj mä warmiruw predicäna. Uka alwajja uka warmejj Jehová Diosarojj sutipatwa orasïna, jupar maynin visittʼañapwa mayirakïna. Kimsa hora pasatatsti Paul jilataw punkup leqtʼäna.

1 Corintios 3:9 liytʼasajja aka toqetwa parltʼapjjäta:

• Kunatï Nueva Zelanda markan paskäna ukajja, ¿kunjamsa Jehová Diosajj predicación pʼeqtʼaskatap uñachtʼayi?

Hechos 1:8 liytʼasajja aka toqetwa parltʼapjjäta:

• ¿Kunatsa predicaskakiñatakejj Jehová Diosan yanaptʼapajj munasi?

¿Yatiyätati?

Chika semanan apaski uka tantachäwinakanjja, kunjamsa predicapjjerista ukwa yatichapjjetu. Uka tantachäwirutï sarsta ukhajja, ¿jumatakejj ukham yatichasitapajj kunjamakisa?

6. Predicasajj Diosaruw istʼasipkta

Nayrïr patak maranakanjja, Jesusan arkirinakaparojj enemigonakapaw predicañ jarkʼapjjäna. Ukampis uka cristianonakajj ‘suma yatiyäwinak yatiyasiñapatakejj leyinakarjamaw arjjatapjjäna’ (Filipenses 1:7). Jichhürunakanjja ukhamarakwa Jehová Diosan Testigonakapajj lurapjjta.a

VIDEO: Suma yatiyäwinak yatiyasiñapatakejj leyinakarjamaw arjjatapjjta (2:28)

Hechos 5:27-42 liytʼasajja aka toqetwa parltʼapjjäta:

• ¿Kunatsa Jehová Diosan Testigonakapajj predicasipkakëjja? (Hechos 5:29, 38, 39 uñjjattʼapjjäta).

¿KUNSA YATEQAWAYTAN?

Jesusajja taqe markanakan suma yatiyäwinak yatiyapjjañapatakiw arkirinakaparojj khitäna. Jehová Diosaw markaparojj suma yatiyäwinak yatiyapjjañapatak yanaptʼaski.

Amtañataki

• Suma yatiyäwinak oraqpachan yatiyañatakejja, ¿kunanakas lurasiski?

• ¿Kunjamsa predicasajj jaqenakar munasitas uñachtʼaytanjja?

• ¿Predicasajj kusisitäsnawa sasmati? ¿Kunatsa ukham amuyta?

JUKʼAMP YATJJATAÑAMATAKI

Kunjamsa jachʼa markanakan Jehová Diosan Testigonakapajj predicapjje uk videon uñtam.

Walja jaqenakajj utjki uka cheqanakanwa París markan predicapjje (5:11)

Campos de refugiados ukan jakirinakarojja, ¿kunjamsa Jehová Diosan Testigonakapajj predicawayapjje?

Diosar uñtʼapjjañapatakiw yanaptʼapjjta (5:59)

Mä kullakarojj kunjamsa misionerat serviñajj kusisita jakasiñatak yanaptʼäna uk videon uñtam.

Diosar serviñajj wali sumapuniwa (6:29)

Jehová Diosan Testigonakapajj tribunalanakanwa atipjawayapjje, ukajj kunjamsa suma yatiyäwinak yatiyasiskakiñapatakejj yanaptʼawayi uk yatjjatam.

“Diosan Reinopat yatiyirinakajj tribunalanakaruw sarapjje” (¡Diosan Reinopajj apnaqjjewa!, 13 yatichäwi)

Taqpach cristianonakaw bautisasipjjañapa sasaw Jesusajj yatichäna (Mateo 28:19, 20 liytʼäta). Ukampis ¿kunjamsa maynejj bautisasiñapa? ¿Kunsa maynejj bautisasiñatakejj lurañapa?

1. ¿Kunjamsa maynejj bautisasiñapa?

Bautisaña arojja griego arutwa juti, “umar chhaqantayaña” sañ munaraki. Jesusajj Jordán jawiran bautisaskäna ukhajja umar chhaqantayatänwa, ukatjja ‘umat ukspachaw mistunïna’ (Marcos 1:9, 10). Cheqpach cristianonakajj Jesusjamarakiw umar chhaqantayatäsin bautisasipjje.

2. ¿Kunsa maynejj bautisasisajj uñachtʼayi?

Maynejj bautisaski ukhajj Jehová Diosar vidap katuyasitapwa uñachtʼayi. ¿Jehová Diosaru vidap katuyasiñatakejj kuns maynejj lurañapa? Jumarukiw wiñayatak servïma sasaw janïr bautisaskasajj Jehová Diosar mä oracionan sañapa. Uka oracionanjja, Jehová Dios saparukiw adoräjja jupan munañap lurañaw jakañ vidajan nayrankani sasaw mä promesan arsuraki. Jesusajj akham sänwa: “Maynitejj nayar arkañ munchitojja, jupa pachpat armtʼaspan, [...] jan qheparas arkitpan” sasa (Mateo 16:24). Ukatwa Jesusat yateqasiñsa yatichäwinakaparjam sarnaqañsa amtaraki. Maynejj Diosar vidap katuyasisasa bautisasisasa, Jehová Diosan suma amigopäniwa, jupar adorapki ukanakampis amigorakïniwa.

3. ¿Kunsa maynejj bautisasiñatak lurañapa?

Jumatï bautisasiñ munstajja, nayraqatajj Jehová Diosatwa yateqañama, jupar jukʼamp confiyañatakis chʼamachasiñamarakiwa (Hebreos 11:6 liytʼäta). Bibliat jukʼamp yatjjatasasa Jehová Diosar jukʼamp confiyasas jukʼampwa juparojj munasïta. Ukhamatwa jumajj predicañ munjjäta, Biblian utjki uka leyinakarjam sarnaqañatakis chʼamachasirakïta (2 Timoteo 4:2; 1 Juan 5:3). Maynejj ‘Jehová Diosatakjam sarnaqjje’ ukhaw Diosar vidap katuyasiñsa bautisasiñsa amtjjaspa (Colosenses 1:9, 10).a

JUKʼAMP YATJJATAÑÄNI

4. ¿Kunsa Jesusan bautisasitapajj yatichistu?

Jesusajj kunjamsa bautisasïna uk yatiñatakejja, Mateo 3:13-17 liytʼapjjäta. Ukatjja aka toqetwa parltʼapjjäta:

• ¿Jesusajj asu wawäskäna ukhat bautisasïna?

• ¿Pʼeqepat umamp chʼalljjatasakit jupar bautisapjjäna? Jan ukajj ¿kunjamsa Jesusajj bautisasïna?

Jesusajja bautisasisajj Diosan mayitaparjamaw mä wakiskir luräwi phoqañ qalltäna. Lucas 3:21-23; Juan 6:38 liytʼasajja aka toqetwa parltʼapjjäta:

• Bautisasjjäna ukhajja, ¿kuna lurañas Jesusatak nayrankäna?

5. Taqeniw bautisasipjjaspa

Diosar vidas katuyasiñasa bautisasiñasa qalltan ajjsarañjamäspawa. Ukampis jumatï Jehová Diosat yatjjataskakïta, juparus jukʼamp uñtʼarakïta ukhajj taqe chuymaw bautisasiñ amtäta. Bautisasiñ amtawayapki ukanakat mä qhawqhanir uñtʼañatakejja, VIDEO uñtapjjäta.

VIDEO: Jehová Diosar uñtʼañatak chʼamachasiskakim (1:11)

Juan 17:3; Santiago 1:5 liytʼasajja aka toqetwa parltʼapjjäta:

• Bautisasiñatak wakichtʼatäñatakejja, ¿kunas maynirojj yanaptʼaspa?

1. ‘Juma saparukiw wiñayatak servïma’ sasin Jehová Diosar sisktan ukhaw jupar vidas katuyastanjja.

2. Bautisasisajja Jehová Diosar vidas katuyasitaswa mayninakar uñachtʼaytanjja.

6. Bautisasjjasajj Jehová Diosan familiap taypinkjjtanwa

Bautisasjjasajj aka oraqpachan mayachtʼat mä familia taypinkjjtanwa. Kawkïr markatäskchiñänisa kunsay nayrajj lurkchiyätan, taqeniw pachpa yatichäwinakar creytanjja, Bibliarjamas sarnaqaraktanjja. Salmo 25:14; 1 Pedro 2:17 liytʼasajja aka toqetwa parltʼapjjäta:

• Uka textonakarjamajja, ¿kunjamsa bautisasiñajj yanaptʼistu?

¿KUNSA YATEQAWAYTAN?

Cristianöñatakejj maynejj bautisasiñapawa sasaw Jesusajj säna. Bautisasiñatakejj Jehová Diosaruw maynejj taqe chuyma confiyañapa, leyinakaparjamaw sarnaqañapa, vidapsa juparuw katuyasiñaparaki.

Amtañataki

• ¿Kunjamsa maynejj bautisasiñapa? ¿Kunatsa bautisasiñajj wali wakiskirejja?

• ¿Kunsa Diosar vidas katuyasitasasa bautisasitasas uñachtʼayi?

• Diosar vidap katuyasiñatakisa bautisasiñatakisa, ¿kunanaksa maynejj lurañapa?

JUKʼAMP YATJJATAÑAMATAKI

Bautisasiñajj kamsañsa muni, kuna kʼarinaksa bautisasiñ toqet yatichapjje uk yatjjatam.

“¿Qué es el bautismo?” (Artículo de jw.org)

Kunanakas bautisasiñatak yanaptʼiristam ukanak yatjjatam.

“Bautisasiñatakejja Jehová Diosar munasiñaw yanaptʼätam” (Yatiyañataki marzo 2020)

Kunjamsa mä chachajj Bibliat sum yatjjatasajj bautisasïna uka toqet yatjjatam.

“Kunatï cheqäki ukjja, naya pachpa yateqañajwa munapjjäna” (Yatiyañataki febrero 1, 2013)

Kunatsa bautisasiñatak chʼamachasiñajj wakisi, kunjamsa jumajj ukatak wakichasisma uka toqet yatjjatam.

“¿Bautisasjjeristti?” (Kunsa wayn tawaqunakax yatiñ munapxi payïr libro, 37 yatichäwi)