ARSUTAMAJJ “jïsa, janiwa” ¿ukhamati?

Aka yaqha toqet amuytʼarakim. Mä chacha warmiw tamapankir mä kullakar utapar mä aruma manqtʼasir jutapjjañapataki ukat mä rat qamartʼañatak invittʼi, uka kullakajj sapakiw wawanakapar uywasi. Kunapachatï kullakajj wawanakapar yatiyi ukhajj wal jupanakajj kusisipjje. Ukat uka arum puriniñap wal suyapjje. Ukampis mä uru faltkipanjja, yaqha luräwiw utjapjjetu janiw uka arumajj jutjjapjjätati sasaw uka chacha warmejj kullakar yatiyi. Qhepatwa uka kullakajj kunätaynas uka yaqha luräwejj uk yatjje. Utapar sarañapatak uka arumatak jawstʼkatayna uka qhepatwa uka chacha warmir amigonakapajj uka pachpa arumatak utapar jawstʼapjjatayna, ukat “iyaw” sasaw uka chacha warmejj sapjjatayna.

Cristianonakjamajj arsutas phoqañasapuniwa. Arsutanakasajj janiw “jïsa” ukampis “janiwa” ukhamäñapäkiti (2 Cor. 1:18). Ukampis kunjamtï uka pä uñachtʼäwinakajj uñachtʼaykejja, janiw taqpachajj ukhamapunïkiti. Kuntï arskayätan ukajj janiw awisajj phoqañjamäkaspati. Apóstol Pablojj mä kutejj ukhamanwa uñjasïna.

PABLOJJ ARUP JAN PHOQATAPAT JUCHAÑCHATAWA

Pablojj khä 55 maran misionerjam kimsïr kuti viajkän ukhajja, Éfeso markanwa jikjjatasïna, jupajj Egeo qota makatasin Corinto markaruw sarañ munäna ukat ukhat Macedonia markar sarañ amtäna. Jerusalén markar kuttʼkasaw payïr kuti Corinto markankir tamar tumptʼañ amtäna, inas uka cristianonakan Jerusalén markatak yanapanak khuyapayasiñat churapjjañapatakïchïna (1 Cor. 16:3). Ukwa 2 Corintios 1:15, 16 qellqatat amuytanjja, ukan akham siwa: “Ukar iyawsasa nayajj jumanakar uñjiriw nayraqat jutañ munäyäta, jumanakan kusisipjjañamataki pä kuti tumptʼatajjata. Macedoniar sarkasinjja tumpawayañwa amtäyätjja, ukhamarak Macedoniat kuttanjjasinsa. Ukhamatwa jumanakajj Judearu sarañajj yanaptʼapjjetasmajja”.

Amuyatajj Corinto markankir jilat kullakanakarojj kunarus sarani ukjj mä carta apaykäna ukanwa yatiyäna (1 Cor. 5:9). Ukampis uka carta apaykäna ukat mä qawqha tiempo qhepat Cloen familiap toqew Corinto markankir taman yaqhachasiñanak utjatap yatïna (1 Cor. 1:10, 11). Ukatwa Pablojj kuntï amtkäna uk mayjtʼayäna, ukat jichhürunakan Mayïr Corintios sasin uñtʼktan ukwa qellqarakïna. Uka cartapanwa jilat kullakanakarojj ewjjtʼäna ukat munasiñampi cheqañchäna. Ukat ukanwa nayraqat Macedoniar sarasin Corintor sarañ amtatap qhanañcharakïna (1 Cor. 16:5, 6).a

Kunapachatï Corinto markankir cristianonakajj cartap katoqapkän ukhajja, uka tamankir yaqha ‘jachʼa apostolonakajj’ janis arup phoqerïkaspa ukhamatwa juchañchapjjäna. Jupa pachpat arjjatasisinjja Pablojj akham jisktʼäna: “¿Janikiy sum amtkchïyätti akanak lupʼkäyät ukkhajja? ¿Jumanakasti amuyapjjtati nayajj akapach jaqenakjamaraki parlkirista: ‘Jïsa, janiwa’ sasa kunapachatejj nayajj tumpañataki amtkta ukkhasti?” sasa (2 Cor. 1:17; 11:5).

¿Pablojj kuntï arskäna uk jan amuytʼasisat arspachäna? ¡Janiw ukhamäkänti! Jan sum ‘amtkchiyäta’ siski uka arojja, jan confiyaña jan ukajj jan aruparjam phoqeri sañwa muni. Pablojj akham sänwa: “¿Jumanakasti amuyapjjtati nayajj akapach jaqenakjamaraki parlkirista[?]” sasa. Uka amuytʼayir jisktʼajja, Pablojj amtap mayjtʼaykäna ukajj janis confiykay jaqëkaspa ukham jan amuyapjjañapatakiw corintonkirinakar yanaptʼäna.

Pablojj aka arunakampiw kuna toqettï kʼarintapkäna ukajj jan cheqätap uñachtʼayäna: “Ukampis Diosajj yatiskiwa, janiw nanakajj: ‘Jïsa, janiwa’ sasajj parlapksmati” sasa (2 Cor. 1:18). Pablojj amtap mayjtʼaykäna ukajja, Corinto markankir jilat kullakanakan suman jikjjatasipjjañapatakïnwa. Kunjamtï 2 Corintios 1:23 qellqatan liytʼktanjja, Pablojj ‘jupanakat khuyapayasisaw’ amtap mayjtʼayatayna. Ukhamatwa janïr jupa pachpa uñjir sarkipan jan walinak askichapjjañapatak jaytäna. Pablojj Macedonia markankaskäna ukhajja, Corinto markankir cristianonakar kawkïr carttï apaykäna ukajj kuntï jupajj munkäna ukarjam phoqapjjañapatak yanaptʼatap yatisajj wal kusisïna, cheqas arrepentisipjjañapatakiw yanaptʼatayna, uksti Titow yatiyäna (2 Cor. 6:11; 7:5-7).

JESUSJJARUW “UKHAMÄPAN” SISTANJJA

Pablor juchañchapkäna ukajja, jupan arunakapajj jan confiykañätapwa uñachtʼayapjjäna ukat yatiykän ukas ukhamarakïspänwa. Ukampis Pablojj corintonkirinakarojj Jesucriston arunakap yatiyatapwa amtayäna. Jupajj akham sänwa: “Diosan Jesucristo wawapasti khitittejj Silvanosa, Timoteosa, nayasa parlapksma ukajja janiw: ‘Jïsa, janiwa’ sirïkänti, jan ukasti jupanjja Diosan arunakapajj cheqapapunïnwa” sasa (2 Cor. 1:19). Jesucristojj wali confiykayänwa, Pablojj jupatwa yateqasïna. Aka Oraqenkkäna ukhasa ukat yatiykäna ukhas kunatï cheqäki ukpunwa yatiyäna (Juan 14:6; 18:37). Niyakejjay Jesusan yatiyäwipajj cheqa ukat confiykayächïnjja, Pablojj pachpa yatiyäwirakwa yatiyäna, ukhamajj Pablon yatiyäwipajj confiykayarakïnwa.

Jehová Diosajj “cheqa Diosa[wa]” (Sal. 31:5). Ukwa Pablon aka arunakapajj uñachtʼayi: “Jupanarakwa taqe Diosan arsutanakapajj phoqhasejja”, mä arunjja, Jesucristo taypi. Jesusajj aka Oraqenkkäna ukhajja, Diosat jan jitheqtasapuniw loqtäna, ukaw Jehová Diosan arsutanakapat jan pächasiñatak yanaptʼawayi. Pablojj akham saskakiwa: “Ukatpï kunapachatejj Diosar yupaychktan ukkhajj ‘Ukhamäpan’ sistanjja, Cristo Jesús toqe” sasa (2 Cor. 1:20). Jesusaw “ukhamäpan” siski ukajja, kunatejj uka toqew kuntï Jehová Diosajj arsuwayki uk phoqani.

Kunjamtï Jehová Diosasa ukat Jesusas kuntï arsupki uk phoqapkejja, ukhamarakwa phoqañatak apóstol Pablojj amuytʼasis arsurïna (2 Cor. 1:19). Jupajj janiw ‘akapach jaqenakjam’ jan confiykañ arunak arskänti (2 Cor. 1:17). Jan ukasti ‘ajayun munañaparjamaw sarnaqäna’ (Gál. 5:16). Taqe kuntï lurkäna ukajj mayninakat llakisitapwa uñachtʼayäna. Jïsa satapasti jïsa sañpunwa munäna.

JUMAJJ JÏSA SISKTA UKHAJJ ¿UKARJAMPUNT PHOQTA?

Jichhürunakan khitinakatï Diosan aski yatichäwinakaparjam jan sarnaqapki ukanakajja, arsutap mayjtʼayapjje jan ukajj jukʼamp sumäki uk uñstipan jankʼakiw arsutap pʼakintapjje. Aljasiñ toqenakan kuna amtanakar puripki ukan jïsa satanakapajj janiw ukhamapunïkiti, ni qellqat documento utjki ukhas ukhamäkiti. Jaqechasïwejj pä jaqen mä contratöpakaspas ukhamawa, uksti wiñayatakiw lurapjje, ukampis waljaniw ukham jan uñjapkiti. Jan ukasti jaljtañanakan ratuk jiljjattatapajja, jaqechasiñajj janis askïkaspa ukat jaljtañajj walikïkaspas ukhamwa waljanin amuyasi (2 Tim. 3:1, 2).

¿Jumat kamsasirakispasa? ¿Juman jïsa satamajj ukhamapuniti? Kunjamtï aka qallta yatichäwin uñjaniwayktanjja, inas awisajj kunatï amtatäkäna uk jan phoqkchïtati, ukajj janiw arsutam jan phoqerïtam sañ munkiti, jan ukasti jan phoqerjamätamatwa jan phoqkasmati. Ukampis kuntï arskta jan ukajj kun phoqañamächi ukhajja, arum phoqañamatakiw chʼamachasiñama (Sal. 15:4; Mat. 5:37). Ukhamtï lurätajja, arsutam phoqerïtamata, cheq parlirïtamata ukat confiykayätamatwa uñtʼayasïta (Efe. 4:15, 25; Sant. 5:12). Kuntï sapür lurkta ukan confiykayätam mayninakajj uñjapjjani ukhajja, kunapachatï Diosan Reinopat parlkäta ukhajj inas istʼapjjchïtam. Ukhamajj jïsa satamajj ukhamapunïpan.