¿Jumajj kunjamsa amuyarakta? ¿Guerranakajj Diosatak walikïskpachati? Ukhamächi ukhajja, ¿guerran khitinakarus yanaptʼpacha? Uka jisktʼanakan qhanañchäwip yatisaw kunjamsa jumajj guerranakar uñjta uk amuyäta. Sañäni, jumatï Diosajj guerran ejercitom toqet nuwasiskatap yatisma ukhajja, ¿kunjamakis jikjjatasisma? Atipapjjäwa sasmawa. Ukampis Diosan mayni ejercitor yanapaskatap yatisajja, ¿kunjamas jikjjatasirakisma? Inas ukhajj wal ajjsarayasjjchisma.

Ukampis ukanak yatiñat sipansa mayaw jukʼamp wakiskirejja. Diosajj kunjamsa guerranak uñji uk yatisaw Jupajj kunjam Diosasa uk amuyañatak yanaptʼiristam. Jumatï guerranakan tʼaqhesiyata uñjasiwayapki uka millón millón jaqenaka taypinksta ukhajja, aka jisktʼan qhanañchäwip wal yatiñ munpachäta: ¿Diosajj wali qhorüpachati? ¿Jupat guerran tʼaqhesiñanak utjaypacha? Jan ukajj ¿guerranakan tʼaqhesiyatäpki ukanakat janit llakiskpacha?

Ukampis Bibliajja, janiw kunjamtï waljanejj amuyapki ukham qhanañchkiti, uk yatisajj inas muspharchïta. Cheqas nayratpachasa, jichhakamasa kunjamtï Diosajj guerranak uñjkäna ukajj pachpakïskiwa. Bibliajj uka toqet kamsisa uk jichhajj yatjjatañäni, ukaw kunjamsa nayra pachasa, nayrïr patak maranakansa Diosajj guerranak uñjäna uk yatiñatak yanaptʼistani. Ukat ukarakiw kunjamsa Diosajj guerranak jichhürunakan uñjaski ukat jutïrinsa guerranakajj utjaskakiniti janicha uk amuyañatakis yanaptʼarakistani.

Jehová Diosajj janiw taqpach guerranak jan walit uñjkiti, ukaw kuntï Egipto marka contra lurkäna ukan uñjasi. Awisajj Israel markaparojj nuwasir sarapjjañapatakiw khitirïna. Amuytʼañataki, mä kutejja cananeonak contra nuwasipjjañapatakiw khitäna, jupanakajj sinti jan wali jaqenakäpjjänwa (Deuteronomio 9:5; 20:17, 18). Ukatjja, David reyirojj filisteonak contra nuwasiñapatakiw khitarakïna, ukat kunjamatsa atipjaspäna uksa yatiyarakïnwa (2 Samuel 5:17-25).

Bibliankir uka sarnaqäwinakajja, ¿kunsa uñachtʼayistu? Jehová Diosajj Israel markapar jan walinakat jarkʼaqañatakejja, guerran nuwasipjjañapatakiw jupanakar khitirïna, ukhamat cheqpach yupaychäwisa, markapasa jan chhaqañapataki. Kuntï Jehová Diosajj lurkän uk jichhajj kimsa toqet amuytʼañäni.

1. KHITIS GUERRAN NUWASINI UK DIOSAKIW AMTÄNA. Diosajj israelitanakarojj akham sänwa: “Janiw jumanakati nuwasipkätajja” sasa. ¿Kunatsa ukham sispachäna? Dios pachpaw jupanak layku nuwasiñapäna (2 Crónicas 20:17; 32:7, 8). Kunjamtï qalltan yatjjataniwayktanjja, walja kutiw Diosajj markap layku nuwasïna. Ukampis awisajja, Suma Oraqe katuntañatakisa, jarkʼaqañatakisa, markaparuw guerran nuwasipjjañapatak khitirïna, ukampis Jupaw uk amtirïna (Deuteronomio 7:1, 2; Josué 10:40).

2. KUNAPACHAS GUERRAN NUWASIPJJANI UKJJA DIOSAKIW AMTÄNA. Diosan servirinakapajja, kunapachas nuwasipjjani uk pacienciampiw suyapjjañapäna. Janiw amtapatak nuwasir sarapjjañapäkänti. Amtapatak guerran nuwasir sarapjjerïna ukhajja, Diosajj janiw uka guerran yanapkänti. Kunapachatï israelitanakajj amtapatak guerran nuwasir sarapjjerïna ukhajja, jan walinwa uñjasipjjerïna.a

3. 

   DIOSAJJ JANIW KHITIN JIWAÑAPSA MUNKITI. Jehová Diosaw jaqenakar lurawayi ukat jakäwsa utjayaraki (Salmo 36:9, NM). Ukatwa jaqenakan jan jiwañap munkiti. Ukampis ñanqha lurañ munir jaqenakaw utji, jupanakajj mayninakar tʼaqhesiyaña ukat jiwayañ munapjje (Salmo 37:12, 14). Uka jan walinak tukjañatakiw Diosajj guerran nuwasipjjañapatak markapar khitirïna. Ukampis janïr uka markanakar tukjkasajja, ‘khuyaptʼayasirïtapsa’ ukat ‘jan jankʼak colerasirïtapsa’ uñachtʼayarakïnwa (Salmo 86:15, NM). Sañäni, janïr mä markampi nuwaskasajja, “nayraqatajj sumankañjjatwa parlapjjäta” ukhamata uka markajj jan wali luräwinakap jaytapjjañapataki, ukat jan nuwasiñataki sasaw säna (Deuteronomio 20:10-13). Ukhamatwa Diosajj ‘qhoru jaqen jan jiwañap munatapa, jan ukasti arrepentisipjjañap’ munatap uñachtʼayäna (Ezequiel 33:11, 14-16).b

Kunjamtï yatjjataniwayktanjja, Diosajj nayra tiemponjja, jan walinaka ukat tʼaqhesiñanak chhaqtayañatakiw guerranak utjayirïna. Ukampis kunapachasa ukat khitinakasa guerran nuwasipjjani ukjja, Diosaw amtirïna. Ukampis ¿Diosajj guerran nuwasiñ walti munpachäna? Janiwa, Jupajj ñanqha lurañanakjja, wal uñisi, ukwa kuntï lurkäna ukampejj uñachtʼayistu (Salmo 11:5). Ukampis nayrïr patak maranakan ¿janit ukham amuyjjpachäna?

¿Kunatsa ukajj pasäna? ¿Kunatsa jan nayrjam Diosajj judionak layku nuwaskäna? Jan ukajj ¿kunatsa Diosajj guerran nuwasipjjañapatak jan khitkpachäna? ¿Diosajj janit guerranak askit uñj-jjpachäna? Janiwa. Diosajj janiw judionakarojj nayrjam uñj-jjänti. Jupanakajj Diosan Yoqaparuw mä arunjja, Jesusarojj janiw Mesiasarjam katoqapkänti (Hechos 2:36). Ukatwa judionakajj Diosamp sum apasiñ aptʼasipjjäna (Mateo 23:37, 38).

Judionakarusa, ukat Suma Oraqerusa janiw Diosajj jarkʼaqjjänti, ukhamajja, janiw judionakajj guerran Diosan yanaptʼap suyapjjañapajj wakisjjänti. Kunjamtï Jesusajj arsuwaykänjja, kuntï katoqapjjañapäkäna ukanakajj yaqha markaruw churasjjañapäna, uka machaq markarojj ‘Diosan Israelapa’ sasaw Biblian qhanañchi (Gálatas 6:16; Mateo 21:43). Alajjpachar sarañatak ajllit cristianonakaw ‘Diosan Israelapa’ sasin uñtʼat markäpjjatap uñachtʼayapjjäna. Ukatwa nayrïr patak maranakan jupanakarojj akham sasïna: “Jichhasti [jumanakajj] Diosan markapäjjapjjtawa” sasa (1 Pedro 2:9, 10).

Niyakejjay nayrïr patak maranakan jakir cristianonakajj ‘Diosan markapäpjjchïnjja’, ¿Diosajj romanonakat qhespiyañatakejj jupanak laykojj nuwasïnti? Jan ukajj ¿guerran nuwasipjjañapatakis khitänti? Janiwa. ¿Kunatsa? Kunjamtï maynïr yatichäwin yatjjataniwayktanjja, Diosakiw kunapachas guerran nuwasipjjañapa uk amtañapäna. Diosajj janiw nayrïr patak maranakan cristianonak laykojj nuwaskänti, ni guerran nuwasipjjañapatakis khitkänti. Ukhamajja, jan walinaka ukat tʼaqhesiñanaka Diosan chhaqtayañapatakejj janiw horasäkänti.

Kunjamtï Diosan nayra servirinakapajj jan walinak tukjañapatak Jehová Diosar suyapkänjja, ukhamarakiw nayrïr patak maranakan jakir cristianonakajj Diosar suyapjjañapäna. Janiw uñisirinakapampi guerran nuwasiñatakejj amtapatak sarapjjañapäkänti. Jesusajj ukhamwa arkirinakapar yaticharakïna. Amuytʼañataki, arkirinakaparojj guerran nuwasipjjañamawa sasajj janiw yatichkänti, antisas akham sänwa: “Uñisirinakamarojj munapjjam, [...] Diosat mayirapipjjarakim” sasa (Mateo 5:44). Jerusalén markaru romanonakan ejercitopajj purinipkani ukhajja, ‘janiw nuwasipjjätati ni ukansa qheparapjjätati, jaltjjapjjätawa’ sasaw Jesusajj arkirinakapar säna, jupanakajj ukwa lurapjjäna (Lucas 21:20, 21).

Apóstol Pablojj akham qellqarakïna: “Jan ukhamat ukham lurjasipjjamti [...]. Qellqatanjja siwa: ‘Nayaruw waktʼitu mutuyaskañajja, nayarakiw phoqhaskäjja, siw Tatitojja’” sasa (Romanos 12:19). Jupajja, kuntï Levítico 19:18 ukat Deuteronomio 32:35 qellqatanakan siski ukwa aytaskäna, ukajj walja maranak nayraw arsusïna. Kunjamtï yatjjataniwayktanjja, Diosajj markaparojj guerran nuwasipkäna ukhajja, Jupaw uñisirinakapar atipjañapatakejj yanaptʼäna. Ukhamajja, Diosajj guerranak pachpak uñjaskatapwa, Pablon arunakapajj amuytʼayistu, mä arunjja, markapar arjjatañataki, tʼaqhesiñanaka ukat jan walinak chhaqtayañatakiw Diosajj guerranak askit uñjaskakïna. Ukampis nayra tiemponjamarakiw kunapachas ukat khitis guerran nuwasini ukjja, Jupa pachpa amtarakispäna.

Kunjamtï uñjaniwayktanjja, Diosajj janiw nayrïr patak maranakan jakir cristianonakarojj guerran nuwasipjjañapatak khitkänti. ¿Jichha tiempon kunjamarakïpachasa? ¿Diosajj mä qawqha jaqenakar guerran nuwasipjjañapatakejj khitarakiti? Jan ukajj ¿servirinakap laykojj jichha tiempon nuwasirakpachati? ¿Jichhürunakan kunjamsa Diosajj guerranak uñji? Uka jisktʼanakarojja, akjjar jutki uka yatichäwinwa qhanañchasiskani.

Kunjamsa jaqenakajj wal tʼaqhesipjje ukjja, Diosajj uñjaskiwa ukat tukjañwa amtaraki (Salmo 72:13, 14). ‘Jupajj tʼaqhesirinakarojj samarañ churani’ sasaw Bibliajj qhanañchi. ¿Kunapachas uk lurani? ‘Tatit Jesusajj chʼamani angelanakapampi jutkani ukapachaw Diosar jan katoqerinakar mutuyani, ukhamarak Tatit Jesucriston qhespiyasiñ arunakapar jan istʼirinakarusa.’ (2 Tesalonicenses 1:7, 8.) Ukajja, ‘Taqe chʼaman Diosan jachʼa urupanwa’ phoqasini, uka ururojj “Armagedón” sat sutimpiw Biblian uñtʼasiraki (Apocalipsis 16:14, 16).

Armagedón guerran nuwasipjjañapatakejja, Diosajj janiw jaqenakaru khitkaniti, jan ukasti, Jesusaru ukat angelanakaparuw jan wali jaqenakar chhaqtayañatak khitanini. Uka chʼamani angelanakaw tʼaqhesiñanak qʼal chhaqtayjjani (Isaías 11:4; Apocalipsis 19:11-16).

Diosajj kunjamtï guerranak uñjirïkäna ukajj jichhürunakan pachpakïskiwa. Jupajj tʼaqhesiñanaka ukat jan walinak chhaqtayañatakiw guerranak utjayi. Ukampis kunapachasa guerrajj utjani ukat khitisa ukan nuwasini ukanak Diosakiw amtaspa, kunjamtï nayrajj lurirïkäna ukhama. Yatjjatawayktan ukarjamajja, Diosajj jan walinak jutïr urun tukjañwa amtawayi, ukansti Jesusaw pʼeqtʼani. Ukhamajja, jichhürunakan guerranakajj utjki ukajj janiw Diosatakejj walïkiti.

Akham amuytʼañäni: pä jila sullkaw nuwasiñ qalltapjje, awkipajj janiw ukankkiti. Ukatwa awkipar telefonot jawsapjje. Maynïrejja, jupaw nuwasiñ qallti sasaw awkipar yatiyi, maynïristi, jupaw usuchjitu ukatwa nuwjta sasaw saraki. Panpachaniw awkimpi arjjatatañ suyasipki. Awkipajj panpachanir istʼasajja, jan nuwasipjjamti, purinï ukhaw uka toqet parlañäni sasaw jupanakar saraki. Uka jila sullkajja, mä ratojj istʼapjjewa ukampis wasitampiw nuwasiñ qalltapjje. Awkipajj purinjje ukhajja, jan istʼasipjjatapat panpachanitakiw wal colerasi ukat panpachaniruw cheqañcharaki.

Jichhürunakanjja, guerranakan nuwasipki uka markanakajj ukhamarakiw Diosaru yanaptʼa wal mayisipjje. Ukampis Diosajj janiw maynirus yanaptʼkiti. Bibliajj uka toqet akham siwa: “Janiraki ñanqhat ñanqha kuttʼayapjjamti; [...] jumanak purajj jan ukhamat ukham lurjasipjjamti” sasa (Romanos 12:17, 19). Diosajj jaqenakan Armagedón urukam ‘pacienciampi suyapjjañapwa’ munaraki (Salmo 37:7). Janiw markanak pura nuwasipjjañap munkiti, nuwasipjje ukhajja, Juparus jan istʼapkaspa ukhamwa uñji. Ukatwa, Armagedón guerran jupanakar qʼal tukjani, ukat guerranaksa wiñayatakiw aka oraqpachan chhaqtayjjani (Salmo 46:9; Isaías 34:2). Ukhamajja, taqe guerranakajja, Armagedón guerranwa qʼal tukusjjani.

Jehová Diosan Reinopanjja, janiw guerranakajj utj-jjaniti ukajj Diosan mä suma bendicionapawa. Jesusajj uka Reinot parlkasajja akham sänwa: ‘Reinomajj jutpan. Munañamasti luratäpan akapachanjja, kunjamatï alajjpachana luratäki ukhama’ sasa (Mateo 6:10). Diosan Reinopajj janiw guerranakak tukjkaniti, jan ukasti kunanakatï guerranak utjayki taqe ukanakwa chhaqtayani (Salmo 37:9, 10, 14, 15).a Cheqas cristianonakajj kuntï Diosan Reinopajj apankani uk phoqasiñap walpun suyasktanjja (2 Pedro 3:13).

Niyaw Diosan Reinopajj tʼaqhesiñanaksa jan walinaksa chhaqtayjjani ¿kunatsa ukham sistanjja? Bibliankir profecianakarjamajja, ‘qhepa urunakanwa’ jakjjtanjja (2 Timoteo 3:1-5).b Armagedón jachʼa chʼajjwäwejj niyaw purinini, uka qhepatsti Diosan Reinopaw aka oraqjjar apnaqjjani.

Armagedón guerranjja, khitinakatï “Tatit Jesucristosan qhespiyasiñ arunakapar jan is[tʼapki]” ukanakaw jiwarapjjani (2 Tesalonicenses 1:8). Ukampis Diosajj ‘janiw jaqenakan jiwapjjañap munkiti’, ni jan wali jaqen jiwañapsa munkarakiti (Ezequiel 33:11; 2 Pedro 3:8, 9). Ukatwa janïr uka uru purinkipan ‘Reinopat aka oraqpachan yatiyasiñap muni, ukhamat taqe markanakan yatipjjañapataki’ (Mateo 24:14; 1 Timoteo 2:3, 4). Jehová Diosan Testigonakapajj aka oraqpachanwa Diosan Reinopat yatiyasipki, uka toqew walja jaqenakajj Diosar uñtʼapjjaspa ukat Jesusan aruparjamas sarnaqapjjarakispa, ukhamatwa jutïrin wiñayatak jakasipjjaspa.