Wali kusisitätanwa Jehová Dios layku mirqʼsusitasatxa
1 Apóstol Pablox ‘mirqʼsusiñkamaw’ yatiyir saräna, ukat wali kusisitaw jikxatasïna (2 Cor. 12:15). Jichhürunakan ukhamarakiw walja jilat kullakanakax precursorjam wal irnaqtʼasipkaraki. Yaqhipanakax familiapan walja lurañanïpxiwa ukampis sapa semanaw yatiyir sarañataki tiempo apstʼasipxi. Yaqhipanakasti wali usutäkasinsa Diosan Apnaqäwipat yatiyir sarasipkakiwa. Ukham Jehová Dios layku mirqʼsusiri jilat kullakanak uñjañax wali kusiskañawa.
2 Jaqi masisar munasisa. Diosar munasisa, jaqi masisaru munasisa ukat Jehová Diosataki taqi chuyma irnaqasaxa, suma qʼuma chuymanïsnawa. Suma yatiyäwinak yatiyasaxa Pablox jakañapsa aptʼasïnwa, ukatwa wali kusisita akham säna: “Jichhasti nayax sapxsmawa, maynïritix jumanakat chhaqañar saraskan ukaxa, janiw khitis nayarux juchañchkitaspati” sasa (Hech. 20:24, 26; 1 Tes. 2:8). Yatiyir sarasinxa qhawqxay lurirjamästan ukhamarjamatï luraskañänixa janiw jaqin wilapat juchanïkañäniti (Eze. 3:18-21).
3 Yaqhanakar yanaptʼañatakitï chʼamachasiñänixa wali kusisitäñäniwa (Hech. 20:35). Mä jilatasax akham sänwa: “Jehová Diosataki jurnalpacha irnaqasaxa wali qaritaw arumax kuttʼanxta. Ukampisa wali kusisitätwa, jan khitins apaqkaña kusisiñ churitu, ukatwa Jehová Diosar wal yuspärta”.
4 Diosar munasisa. Alaxpachankir Jehová Dios awkisaru kusisiyañatakiw chiqansa mirqʼsustanxa. Diosar munatas laykuwa yatiyiris sartanxa arkirinakapar tukupxañapatakis yatichtanxa, ukhamatwa Diosan kamachinakap phuqasktanxa (1 Juan 5:3). Jan istʼañ munapkchi ukhasa wali kusisita Jehová Diosat yatiyir saraskaktanwa.
5 Jichha tiempox janiw samarañ tiempükiti. Cosecha apthapiñ tiempon jakasktanxa (Mat. 9:37). Mä yapuchirixa cosecha apthapiñ tiempox jan samartʼasaw irnaqi, kunattix tiempopax jukʼakiwa, achunakax tukusispawa. Ukhamaraki, jaqinakar apthapiñ tiempox jukʼakirakiwa. Qhipa urunakankxatas yatisaxa, jaqinakar yatiyir sarañataki chʼamachasiskakiñäni (Luc. 13:24; 1 Cor. 7:29-31).