Diosarux uñtʼañasawa

Diosan munasitapäñatakixa, juparux uñtʼañasawa. Munat masinakasax sutis yatipxiwa ukat sutisxa aytasipxapuniwa, ¿janich ukhamäkixa? Uka kikparakiwa Diosax muni sutip yatiñasa ukat sutipatpuni aytasiñasa. Diosax Jehová satawa (Salmo 83:18, NM; Mateo 6:9). Ukampisa, yatiñasawa kunanakas chuymapar kusisiyi ukat kunanakas chuymap ustʼayi, yatiñasarakiwa khitinakasa munasitanakapaxa ukat khitinakas jupar uñisirinakaxa. Mä munat masiruxa tiempompiw sum uñtʼtanxa, Bibliax siwa, Jehová Diosaru sum uñtʼañatakixa wakisiw tiempo apstʼasiñaxa (Efesios 5:15, 16).

Diosan munasitanakapaxa kunanakatix jupar kusisiyki ukanakwa lurapxi. Amuytʼañäni, munat masinakamarutï jan walinaka luräta ukat chuymapsa ustʼayäta ukhaxa, ¿munat masinakamäskakiniti? Janiwa. Uka kikparakiwa, Diosan munasitapäñatakixa, jupar kusisiykiri askinakwa lurañasa (Juan 4:24).

Janiw taqi yupaychäwinakaxa Diosan munasitapäñasatakix yanapkistaspati. Diosan wali munasita, Jesusaxa, pä thakitwa parläna. Mayasti jachʼa thakiwa, waljaninakaw uknam sarapxi. Uka thakisti jiwañar apiriwa. Maynir thakisti kʼullkʼuwa jukʼanikiwa uknam sarapxaraki. Uka thakixa wiñay jakañaru apiriwa. Ukhamasti, Diosan munasitapäñatakixa, yatiñasawa kawkïrisa chiqpach yupaychäwixa (Mateo 7:13, 14).