Kunjamsa Diosarux uñtʼsna

Biblia liyisawa Jehová Diosarux uñtʼsna. Nayrapachaxa, Diosax mä qhawqha chachanak chhijllatayna jupan amuyunakapa qillqapxañapataki. Uka qillqatanakax Biblia satawa. Jichhürunakanxa Biblia liyisawa Diosarux uñtʼsna. Jehová Diosan arunakapaniwa, ukatpi Diosan Arupjama uñtʼataxa. Diosax janiw kʼarïkiti, ukatwa kunatix Biblian qillqatäki ukxa chiqaw sisnaxa. “Diosax jani[puni]w kʼariskaspati.” (Hebreos 6:18.) Ukatpi, Diosan Arupax chiqapaxa (Juan 17:17).

Diosan taqi waxtʼanakapatxa Bibliawa jachʼa aski churäwipaxa. Mä munasiri awkisa wawanakaparu qillqat apaykaspa ukhamawa. Diosax kunjamsa aka Uraqxa jakasiñasataki sum kusipachaptayani uka amtapatwa yatiyistu. Sarakistuwa kunsa Diosax nayrapachax luräna, kunsa jichhürunakan luraski ukat kunsa jutïr urunakanxa lurarakini aski wawanakapatakixa. Jan waltʼäwinakaru atipjañsa ukat kʼuchik jakasiñatakisa Bibliaw yanaparakistani (2 Timoteo 3:16, 17).

Jehová Diosan Qhanañchirinakapaxa munasitanakapawa; Biblian yatichäwinakapa yatiqañamatakixa jupanakaw yanaptʼapxätamxa. Bibliat yatiqañ muntha sasaw jupanakarux säta. Janiw qullqxa mayipkätamti, inakiw yatichapxätamxa (Mateo 10:8). Ukatxa, cristiano tantachäwinakaparusa sararakismawa. Ukax yupaychañ utanakanwa apasi ukasti Tantachasiñ Utanak satawa. Uka tantachäwinakaru sarasaxa, jankʼakiw Diosatxa jukʼamp yatiqäta.

Diosarux luratanakapata amuyasawa uñtʼsna. Sañäni, Bibliax siwa: “Diosax alaxpacha, ukhamarak akapacha [uraqi] luräna” (Génesis 1:1). Kunapachati Jehová Diosax “alaxpacha” lurkäna ukhawa Inti lurarakïna. Ukhamaxa, ¿kunsa ukaxa Diosat yatichistu? Ukatxa yatiqtanwa Jehová Diosaxa wali chʼamanïtapa. Jupa sapakiwa ukham wal qhantʼiri Inti luririxa. Uñachayarakistuwa Jehová Diosax wali yatiñanïtapa; ukham juntʼuptayiri, luptʼiri, jan jiwkiri Inti lurañatakixa wali yatiñaxay munaschispaxa.

Jehová Diosan luratanakapaxa jupan munasiñapwa uñachayistu. Taqi muxsa achunakat amuytʼañäni. Jehová Diosaxa mä kasta muxsa achukwa churistaspänxa, jan ukax janiw maysa churkistaspänti. Ukampisa, taqi kasta, kunaymani uñtani, jachʼan jiskʼani muxsa achunakwa churistu. Ukhamatwa Jehová Diosax munasiñap uñachtʼayistu, ukat yatiqaraktanwa wali waxtʼasirïtapa, amuyirïtapa, suma Diosätapa (Salmo 104:24).