15 Yatichäwi

Jaqi masisaru yanaptʼañäni Diosan munañap lurañapataki

¿Yatiqatamat kunatsa yatiyañamaxa? (1)

¿Aka suma yatiyäwinakxa khitinakarus yatiyasma? (2)

¿Sarnaqäwimat kamsapxaspas yaqhanakaxa? (2)

¿Kunapachas tamamampi chika yatiyir sarxasma? (3)

1. Bibliatxa wali sumanak yatxtaxa. Ukanak yatiqxasaxa cristianjam sarnaqxañamawa (Efesios 4:22-24). Wiñay jakaña katuqañatakixa wali wakiskiriwa Bibliata yatxatañaxa (Juan 17:3). Jaqi masimaxa Bibliat yatiñaparakiwa qhispiñapatakixa. Chiqa cristianonakaxa taqiniw yatiyapxañapa. Ukwa Diosax mayistu (Romanos 10:10; 1 Corintios 9:16; 1 Timoteo 4:16).

2. Kuntï yatiqaskta ukatxa familiaranakamaru, munat masinakamaru, ukat irnaqir jan ukaxa yatiqir masinakamaruwa nayraqat yatiyasma. Munasiñampi ukat llampʼu chuymampiw yatiyañama (2 Timoteo 2:24, 25). Ak amtapuniñäni, jaqixa sarnaqatas wal uñchʼukistu kuntï sisktan ukat sipansa. Ukatwa sum sarnaqañamaxa, sum sarnaqatamatxa istʼapxätamwa (Mateo 5:16; 1 Pedro 3:1, 2, 16).

3. Inasa tiempompixa Jehová Diosan Qhanañchirinakapampi chika yatiyiri sarañatakixa mayitanak phuqxchïta. Nayraru sartañatakixa uk lurañaxa wali wakisiriwa (Mateo 24:14). Jaqi masimaru wiñay jakaña katuqañapataki ukat Jehová Diosan yupaychiriparu tukuñapataki yanaptʼasma ukhaxa, wali kusiskañapunïspawa (1 Tesalonicenses 2:19, 20).