Jilïr Irpirinakan Qillqanitapa

Munat jilat kullakanaka:

Sapa kutiw apóstol Pablox jilat kullakanakaparux yusparäna ukat munasiñapsa uñachtʼayarakïna. Amuytʼañataki, khä Roma markankir jilat kullakanakarux akham sasaw qillqäna: “Diosaxar sinti yuspagarta, jumanakan Diosar iyawsapxatamatsti taqi chiqanwa parlasi” sasa (Rom. 1:8). Chiqpachansa, kawkja markanaktï Roma markax apnaqkäna uka chiqanakanxa, uka jilat kullakanakan chʼullqi iyawsäwinïpxatapatwa ukhamaraki taqi chuyma yatiyapxatapatwa yatisïnxa (1 Tes. 1:8). Ukatpï Pablox uka jilat kullakanakarux wal munasïnxa.

Pabljamarakiwa jumanakat amtasisa Jehová Diosar wal yuspärapxta. Jumanakarux walpunwa munasipxsma janiw uk armapxañamäkiti. Ukhamarakiw Jehová Diosax sapa mayniruw munasipxtamxa. Jumanakax wali uñisita jikxatasipxsta ukhasa, Diosan arupat yatiyasipkaktawa. ¡Ukham jan axsarasa taqi chuyma luqtapxatamatxa Jehová Diosax walpun kusispachaxa! (Pro. 27:11.)

Anuario libronxa qhanpachwa uñjapxäta, kunjamsa Jesucristox ‘mä atipirjama mistuwayi jukʼampi atipjäwinaka atipjañapataki’ ukxa, ukat khitinakatix Jesusan arkirinakapar tukjañ munapki ukanakax janipuniw atipapkaniti (Apo. 6:2; Isa. 54:17).

Ukhamarakiw Filipos markankir cristianonakaruxa Pablox akham sas qillqarakïna: ‘Diosaruw yuspagarta jumanakax qhispiyasiñ arunaka yatiyañatak yanaptʼapxatamata’ sasa (Fili. 1:3-5). Jilïr Irpirinakaxa ukhamarakiw jumanakat sapxiristxa. 2006 septiembre phaxsit 2007 agosto tukuykamaxa, 6.691.790 yatiyirinakawa 1.431.761.554 horanak suma yatiyäwinak yatiyapxäna 236 jachʼa markanakana. ¡Suma yatiyäwinaka yatiyasiñapatakix walpunwa yanaptʼasipktaxa! Chiqpachansa, waranq waranqa jaqinakaw yanaptʼat uñjasipxi ukham yatiyapxatasatxa, taqi aka luräwixa Jehová Diosaruw jachʼañchi.

Tesalonicankir jilat kullakanakapat qhawqsa Pablox llakisïna uka tuqitwa akham sas qillqarakitayna: “Dios awkisan nayraqatapanxa jumanakatxa amtapxtwa [...] Tatit Jesucristosar suytʼañanxa chʼamamp saytʼapxatama[ta]” sasa (1 Tes. 1:2, 3). Chiqansa, jakäwisan jan waltʼäwinakax utjapunispawa, ukampis saytʼatäskakiñasawa. ¿Kuna jan waltʼawirus jumax saykataskta? ¿Usutäsin jan yatiyir saratamatcha wal llakisiskta? ¿Munat chachamati jan ukax munat warmimach jiwawayxi? (Pro. 30:15, 16.) Diosar jan iyawsirimpi janiw jaqichasïtati siw Bibliaxa, ¿uka kamachir jan pakintañ laykuti jichhakam jan casaraskta? (1 Cor. 7:39.) Qullqi tuqit pistʼañ tiemponkkasacha, ¿wawanakamar uywañataki chʼamachasiskta? Munat jilat kullakanaka kuna jan waltʼäwin uñjaskasasa ak amtapxapuniñamawa, jumanakatï Diosan Apnaqäwip taqi kunat sipansa nayrar uchasipkakïtaxa Jehová Diosax janiw “armaskaniti kuntix lurapkta” ukanakatxa, ukhamaraki munasiñanakama[t]sa”. Ukatpï sanipxsmaxa ‘aski lurañanxa jan qarjapxamti’ sasina (Heb. 6:10; Gál. 6:9).

Jichhasti, ¿kunas yanaptʼapxätam aguantaskakiñatakixa? Tesalonicankir cristianonakaruxa ‘Tatit Jesucristor suytʼañaw’ yanaptʼäna ukhamarakïspaw jumanakatakixa. Ukatpï Pabloxa, ‘qhispiyasiñ suytʼäwix’ cristianonakatakixa mä chʼullqi cascjamaw jan wali amtäwinakata, payachasiñanakat jarkʼaqañatakixa sasin sispachänxa (1 Tes. 5:8).

Chiqpachansa, ukham kusisiñampi aguantasaxa Jehová Diosan jachʼakankañap tuqit saytʼasipxatamatwa uñachtʼayapxta ukat Supayan qallasitaparusa saykatapxaraktawa. Jaqinakjamax kuna laykukis Diosar yupaychsna, ukat sinti jan waltʼäwinakan jikxatasisasa, ukat akapachax jan jankʼaki tukusitapatsa Diosat jankʼakis saraqtsna ukham sasaw Supayax qallasitayna. ¡Jumanakasa Supayax mä ñanqha kʼarisirïtapxa uñachtʼayapxarakismawa! Suytʼäwinakasax phuqaskani uka ururux sapurutjamaw jakʼachasisktanxa.

Kunjamtï apóstol Pablox jilat kullakanakaparux sum saytʼatasipkatapata, chullqi iyawsäwinïpxatapata, ukat yatiyañatakis yanaptʼapxatapata, sapa kuti chʼamañchkänxa uka kikparakiwa nänakax jumanakaru chʼamañchañ munapxsma, ukhamaraki wasitatwa jumanakarux walpunwa munasipxsma sasin sanipxsma. ¡Ukham suma luräwinaka lurasipkakiñäni!

Aka maranxa Jehová Diosax bendicionanakapsa jumanakxaru churaskakpanaya. Wali munatäpxtawa jilat kullakanaka.

Jilatanakama,

Jehová Diosan Qhanañchirinakapan Jilïr Irpirinakapa

[5, 6 jananaka]

Qillqt’asiñataki