Taqiniruw yanaptʼani
1 Bibliat apstʼata sarnaqäwinaka. Jehová Diosan Qhanañchirinakapan Bibliat apstʼat taqi qillqatanakapat sipansa, aka librox mayjawa, janiw mayninakjamäkiti. Aka librosti jachʼa letranakani, amuytʼkaya ukat 125 jila dibujonakani kunayman coloranakan suma lurtʼatawa. “Aka librox wali wakiskiripuniwa” sasaw Jachʼa Tantachäwin arstʼirinakax sapxäna. Ukatwa, Taman Librot Yatiqañataki tantachäwin aka librot yatxatañax wali askipunïnixa.
2 Dibujonakaniwa. Libron dibujonakapaxa wali askiw yatichañatakixa. Chiqpachansa, mä dibujoxa walja arunakat sipansa jukʼampi yatichi. California markankir mä awk taykax akham sapxiwa: “Wawajatak aka librot liytʼarapipxta ukhaxa dibujonak uñxattʼasax sum istʼapxitu”. Ukat “kunanakatï jan qillqatäki ukanakwa dibujonakax yatichi. Kelly wawajax libron sapa dibujonakapatxa sum qhanañchtʼapxitu. Chiqpachansa, kunjamsa wawajax uka dibujonak uñxattʼasax mäki uka sarnaqäwit amtasisax arstʼi ukax wal muspharayapxitu” sasa.
3 Jilïrinakataki. ¿Bibliat apstʼata sarnaqäwinaka sat libroxa jilïrinakamppachatakiw sisnati? Jïsa. ¿Kunatsa? Kunattix uka Bibliat apstʼat sarnaqäwinakax qalltat tukuykamax kunjamsa taqi kunas pasäna ukhamarjam qillqatawa. Pensilvania sat markankir mä warmix akham siwa: “Nayatakixa Bibliax qillqaskän uka tiemponakan kunas nayraqat pasatayna ukxarux kunanakampis pasarakitayna ukanak amuytʼañax wali chʼamänwa. Ukanak sum amuytʼañwa aka librox yanaptʼawayitu” sasa.
4 Chiqpachansa aka librox kuntï Biblian parlki ukanakat apstʼatawa, ukat khitinakatï walja maranak Bibliat yatxatasipki ukanakas inas armtʼasxapxarakchi. Indiana sat markankir 57 maran mä kullakax akham siwa: “Aka librox Biblia tuqit sum qhanañchtʼatapatxa walpun yuspärtxa. Amuytʼañataki, mä kullakan allchhipax mamaparux akham sasaw jisktʼatayna: ‘Bibliarjamaxa, ¿khitis paqallqu pichikanïnxa?’ sasa. Walikpun nayar jan uk jisktʼkitutix sasaw sistxa. Ukürutwa uka Bibliat apstʼat sarnaqäwitxa libron liyiñ qalltawayta, Bibliatsa thaqtaraktwa, ukat yaqhanakarus uk amuytʼapxañapatakix yanaptʼaraktwa, ukaw wal kusisiyitu” sasa (Jue. 16:13-19).