Bautisasiritaki qhep qhepa arunaka

Jilapartejja, Jehová Diosan Testigonakapan asambleanakapanwa bautisasipjje. Jupanakatak waktʼayata discurso tukuyarojja, arstʼir jilatajj saytʼasipjjañapatakiw bautisasirinakar mayi, ukjjarusti aka pä jisktʼanakar wali qhana arunakampi jachʼat jaysapjjañapatakiw mayiraki:

1. ¿Juchanakamat arrepentisjjtati, Jehová Diosar vidam katuyasjjtati, “Jesucristo toqew Diosajj salvistu” sasin confiyaraktati?

2. Bautisasisajja, Jehová Diosan Testigopätama ukhamaraki Diosan markapankjjatamwa uñachtʼayasktajja, ¿uk amuytati?

Uka jisktʼanakar taqenin istʼkata “jïsa” sasinjja, Jesusajj sacrificiot loqtasiwayki ukar confiyapjjatapa ukhamarak Jehová Diosar taqe chuyma katuyasipjjatapwa bautisasirinakajj uñachtʼayapjje (Rom. 10:9, 10). Ukampis bautisasiñ munirinakajja, janïräkipanwa oracionan Diosar mayisisajj uka jisktʼanakat lupʼipjjañapa. Ukhamatwa bautisasiñ urunjja, “jïsa” sasin taqe chuym sapjjani.

¿“Jumarukiw servïma, kuntï jumajj munkta uk lurañaw nayatakejj nayrankani” sasin Jehová Diosar vidam mä oracionan katuyasjjtati?

¿Bautisasiñatak wakichtʼatäjjatamti amuyasta?

¿Kunjam isinis maynejj bautisasiñapa? (1 Tim. 2:9, 10; Juan 15:19; Filip. 1:10).

‘Humilde chuymampi wali amuyumpiw’ isisiñasa, ukhamatwa ‘Dios chuymätas’ uñachtʼayañäni. Ukhamasti, bautisasirinakajj janiw jan walinak piensayirjam isinak uchasipjjañapäkiti. Isipajj janirakiw kuna letranakanïñapäkisa ni dibujonakanïñapäkisa, jan ukasti qʼomäñapawa, bautismor respetompi uñjatapwa uñachtʼayañaparaki.

Bautisasiñ horasanjja, ¿kunanak lurañas jan walïki? (Luc. 3:21, 22).

Jesusan bautisasitapajj wali yateqaskayawa. Bautismojj wali respetomp uñjatäñapajj kunja wakiskirisa ukjja, luratanakapampiw uñachtʼayäna. Ukhamajj bautismo horasanjja, mayninakar laruyirjama parlañasa, anatañasa, yaqha ukhamanak lurañas janiw walïkaspati. Uman tuyuñasa jan ukajj nadañas janirakiw walïkaspati. Umat mistjjasajja, bautisasirejj janiw jachʼañchasiñapäkiti, mä regalsa katoqkaspa ukhama. Bautisasiñ urojj wali kusiskañ uruwa, ukampis wali respetomp uñjatäñapawa.

Tantachäwinakar jan faltasis sarañasa jilat kullakanakamp chikachasiñasa, ¿kunjamsa Jehová Diosar wiñayataki serviñ arsuwaykta uk phoqañatak yanaptʼätamjja?

Bautisaskäta uka qhepatjja, ¿kunatsa Bibliat yatjjataskakiñatakisa predicaskakiñatakis tiempo apstʼasiñama?

ANCIANONAKATAKI EWJJTʼANAKA

Jan bautisata mä publicadoratï ancianonakar bautisasiñ munatap yatiyani ukhajja, “aka folleton páginas 12-53 ukan jisktʼanakajj utjki ukanakat yatjjatam” sasaw ancianonakajj jupar chʼamañchtʼapjjañapa. “Jan bautisat publicadorataki mä qhawqha arunaka” siski uka cheq liytʼañapatakiw mayipjjañaparaki (página 8). Ukanjja, ancianonakampi parlañatakejj kunjamsa bautisasiñ munirejj wakichtʼasiñapa ukaw qhanañchasi. ‘Ancianonakampi parlkasajja, qellqtʼasiwaykta uka notanaksa aka folletsa uñjjattʼasismawa’ sasaw qhanañchasiraki. Ancianonakampi janïr parlkasajja, janiw jisktʼanak yaqhampi uñakipañapajj wakiskiti.

Maynitï bautisasiñ munchi ukhajja, coordinador del cuerpo de ancianos jilataruw yatiyañapa. “Bautisasiñ munirinakataki jisktʼanaka” siski uka cheqat yatjjatkani uka qhepatjja, coordinadorajj ‘¿Jehová Diosar vidam oracionan katuyasjjtati? ¿Diosarus munañam luräjja sasin sisjjtati?’ sasaw jupar jisktʼani. Bautisasiñ muniritï Jehová Diosar vidap katuyasjjchejja, coordinadorajj “Bautisasiñ munirinakataki jisktʼanaka” siski uka cheqat bautisasiñ munirimpi yatjjatapjjañapatakiw pä ancianonakar mayiñapa. Jilatajja, mä ancianoruw aka folleton Parte 1 uk bautisasiñ munirimpi yatjjatañapatak mayiñapa, Parte 2 uk yatjjatañapatakejja, yaqha ancianoruw mayiñaparaki. Jutïr asambleajj kunapachas apasini uk anunciasiñapajj janiw wakiskapuniti.

Ancianonakajja, Parte 1 ukjja mä horana jan ukajj jukʼamp tiemponwa bautisasiñ munirimpejj yatjjatapjjaspa, Parte 2 ukampejj ukhamarakiw lurapjjaspa. Oracionampiw qalltasiñapa tukuyasiñaparaki. Janiw bautisasiñ munirisa ancianosa jankʼak tukuyañ munapjjañapäkiti. Jisktʼanak lurapkani uka ancianonakajja, jankʼakiw bautisasiñ munirimpejj tantachasipjjañapa.

Bautisasiñ munirinakampi juntuk tantachasiñat sipansa, sapa maynimp tantachtʼasiñaw jukʼamp askejja. Ukhamatwa ancianonakajj kunjamsa bautisasirinakajj sapa jisktʼar qhanañchapjje, bautisasiñatakis wakichtʼatäpjjeti janicha uk sum amuyapjjani. Bautisasiñ munki ukasa, jan ajjsarasaw kuntï amuyki uk ancianonakar yatiyani. Casarat chacha warminakarojja, panpachaniruw jisktʼasirakispa.

Bautisasiñ munki ukatï mä warmïchejja, ancianonakajj kawkjantï yaqhanakajj jupanakar uñjapkaspa ukampis jan istʼapkaspa ukanwa tantachasipjjañapa. Wakisini ukhajja, jisktʼanak lurkani uka ancianojj yaqha ancianompi, jan ukajj mä siervo ministerialampiw saraspa. Ukjja aka folletot kuna cheqatsa jisktʼasini ukarjamaw ancianojj amtañapa, kunjamtï akjjar jutki uka parrafon qhanañchaski ukhama.

Yaqhep congregacionanakanjja ancianonakajj jukʼanikïpjjewa. Uka congregacionanakanjja, suma wakichtʼata siervo ministerialanakaw “Cristianonakan creencianakapa” (Parte 1) siski uka cheqat bautisasiñ munirinakar jisktʼapjjaspa. “Diosan leyinakaparjam sarnaqaña” (Parte 2) siski uka cheqatjja, mä ancianopuniw jisktʼañapa. Congregacionantï wakichtʼat jilatanakajj jukʼanikïpjjchi ukhajja, superintendente de circuito jilataruw yatiyasispa, ukhamat jupajj yaqha congregacionankir ancianonakan yanaptʼap mayiñapataki.

Bautisasiñ muniritï minus maranïchi (menor de edad) ukhajja, ancianonakajj jisktʼanak lurapkani ukhajj awk taykapaw jupamp chikäpjjañapa. Awk taykapatï jan ukankañ puedipkani ukhajja, pä ancianonakaw jisktʼapjjañapa (jan ukajj mä ancianompi mä siervo ministerialampiw jisktʼapjjaspa, ukampis Parte 1 ukankir jisktʼanak jisktʼapkani ukhakiw ukajj lurasispa).

Bautisasiñ munirejj janis taqpachpun yatkchinejja, Biblian wakiskir yatichäwinakap sumti amuyaski janicha ukwa ancianonakajj uñjapjjañapa. Janiw ukakïkiti, Diosan leyinakaparojj kunjamsa uñji, Jehová Diosan markaparus wali respetompit uñji janicha ukwa ancianonakajj amuyapjjañaparaki. Bautisasiñ muniritï Biblian yatichäwinakap jan sum amuykchi ukhajja, jupar yanaptʼasipkakiñapatakiw ancianonakajj amtapjjani, ukhamat qhepat bautisasiñapataki. Awisajja, predicañajj jupatak kunja wakiskirisa uk uñjañatakisa, Diosan markapan ewjjtʼanakapar istʼaskiti janicha uk amuyañatakis tiempow munasispa. Sapa jisktʼar qhanañchañapatakejj qhawqha tiempos munasi ukjja ancianonakaw amtapjjañapa, ukhamat bautisasiniti janicha uk amuyañataki. Ukampis ak amtapjjapunim: taqpach jisktʼanakaw jisktʼasiñapa.

Aka folleton Parte 2 tukuyasajja, bautisasiñ munirejj wakichtʼatäjjeti janicha uk amtañatakiw jisktʼanak lurapkani uka ancianonakajj tantachasipjjani. Bautisasiñ munki ukajj liytʼasiriti janicha, qhawqsa yateqaspa ukat yaqha ukhamanakat amuyasaw ancianonakajj mä amtar puripjjani. Ak amtapjjapuniñäni, jaqenakajj Biblian wakiskir yatichäwinakap sum amuytʼapjjaspa, Jehová Diosarus taqe chuym munasipjjaspa ukaw jiwasatakejj jukʼamp wakiskirejja. Ancianonakan yanaptʼapampejja, bautisasipkani ukanakajj suma yatiyäwinak yatiyañatakejj wakichtʼatäpjjaniwa.

Jisktʼanak lurapkani uka ancianonakat mayniki jan ukajj panpachaniw bautisasiñ munki ukamp tantachasipjjani, ukhamat kuna amtarus puriwayapjje uk yatiyañataki. “Bautisasïtawa” sasin sapjjani ukhajja, aka folleton “Bautisasiritaki qhep qhepa arunaka” siski uka cheqwa jupamp uñakipapjjani (páginas 55-57). Bautisasiritï ¡Wiñayatakiw kusisit jakasisma! librot yatjjatañ jan tukuykchi ukhajja, bautisasjjani uka qhepat tukuyañkam yatjjataskakiñapatakiw ancianonakajj chʼamañchtʼapjjani. Bautisasirirojja, kuna fechansa bautisasini uk Registro de Publicador de la congregación ukaruw qellqantasini sasaw yatiyasiñapa. ‘Uka datonakajja, Jehová Diosan Testigonakapajj kunjamsa aka oraqpachan nayrar sarantasipki uk yatiñatakiw yanaptʼani, ukhamatwa Jehová Diosan serviripjamajj kuntï lurañapäki uk phoqani, ancianonakas jupar yanaptʼapjjarakini’ sasaw bautisasirirojj qhanañchtʼasiñapa. Ukatjja, jupan datonakapajj kunjamtï jw.org cheqan utjki uka “Política global de protección de datos personales de los testigos de Jehová” siski ukarjamaw apnaqasini sasaw bautisasirirojj yatiyasiñaparaki. Taqe ukanak yatiyañataki bautisasirimp tantachasipkäta ukajja, janiw tunka minutonakat jiläñapäkiti.

Jilatana jan ukajj kullakan mä mara bautisasitapatjja, pä ancianonakaw chʼamañchtʼañatakisa mä qhawqha ewjjtʼanak churañatakis jupamp tantachasipjjani. Jupanakat maynejja, predicañataki grupop uñjiri jilatäñapawa (superintendente de grupo). Bautisasiritï minus maranïchi ukhajja, ancianonakajj jupampi ukat bautisat awk taykapampiw tantachasipjjañapa. Ancianonakajj munasiñampi suma arunakampiw parlapjjañapa. Diosar serviñan kunjamsa nayrar sartaski uka toqetwa parlapjjaspa. Bibliat sapak yatjjataskakiñapataki, Biblia sapüru liyiñapataki, familiampi Bibliat yatjjataskakiñapataki, tantachäwinakar jan faltasis sarañapataki, Diosan arunakap yatiyaskakiñapatakiw ancianonakajj chʼamañchtʼapjjaspa (Efes. 5:15, 16). Bautisasiritï ¡Wiñayatakiw kusisit jakasisma! librot yatjjatañ jan tukuykchi ukhajja, mä jilatampi jan ukajj mä kullakampi tukuyañapatakiw ancianonakajj amtapjjani. Kunanakansa jukʼamp chʼamachasiñapa uka toqenakat wal ewjjsuñat sipansa, nayrar sartaskakiñapataki chʼamañchtʼapjjañapaw jukʼamp wakiskirejja.