¿Janit domingo urunakax yatiyir mistuñax wakiskaspa?
1. Kuntï Filipos markan Pablompi compañeronakapamp lurapkäna ukaxa, ¿kunsa jiwasar yatichistu?
1 Filipos markan jakasir judionakax niya taqpachaniw sábado urun samartʼapxirïna, Pablompi compañeronakapampix misionerjam sarapkäna ukhaw uka chiqan jikxatasipxäna. Ukat uka urun jupanakax samartʼapxarakispäna ukhax janiw khitis kʼumipkaspänti. Ukampis judionakan marka anqäxan Diosar mayisiñatak tantachtʼasipxatap yatisaxa, jupanakaruw yatiyir sarapxäna. Ukham lurapxatapatxa, Lidiaw bautisasïna, familiapamp kuna, ¡uk uñjasax wali kusisitapuniw uka yatiyirinakax jikxatasipxpachäna! (Hech. 16:13-15.) Jichhürunakanxa, domingonakaw waljanix samartʼapxaraki. Ukhamax ¿janit uka urux mä qhawqha horanak yatiyir sarañax wakiskaspa?
2. Domingo urunakan yatiyañasatakixa, ¿kuna jan waltʼäwinakarus Jehová Diosan markapax atipjawayi?
2 ¿Domingo urun yatiyañatakix kuna jan waltʼäwinakarus saykatasiwayi?: Khaya 1927 maranxa, domingo urun yatiyir mistsupxañapatakiw Jehová Diosan markaparux chʼamañchtʼasïna. Ukampis ukspachaw jarkʼat uñjasipxäna. Estados Unidos markanxa walja jilat kullakanakaw carcelan jistʼantat uñjasipxäna, ukat domingo urun samarañatak utjki uka ley pʼakintapxta, jaqinakaruw jan waltʼayapxta ukat jan permisoniw aljapxta sas kʼarintataw uñjasipxarakïna. Ukhamans jikxatasipkchïnxa, janiw ukhamak qhiparapkänki. Jan ukasti, 1930 maranakanxa uka jakʼankir tamanakat yatiyirinakax walja gruponakaw mä chiqar yatiyir sarapxañapatak khitatapxäna, ukax “campañas de las divisiones” sat sutimp uñtʼatänwa. Ukat awisax yatiyirinakax waljanipunipxänwa, ukat autoridadanakax katuntañ munasas janiw taqinir katuntapkänti. ¿Kuntï jilat kullakanakax domingonakan yatiyañasatak lurapxäna uk wali askirjamti uñjasktanxa?
3. ¿Kunatsa domingo urun yatiyir sarañax wali askipunïspa?
3 Yatiyañatakix mä suma urupuniwa: Waljaniw domingo urunakax irnaqäwipat samartʼapxi. Ukat khitinakatï yaqha yupaychäwinkapki jupanakas uka urux Diosat parlañ munapxarakispawa. Domingo urutï tamasax tantachaschixa, yatiyir sarañatakix suma isthaptʼatätanwa, ukhamax uka urun tantachäw nayra jan ukax tantachäw qhipat yatiyir sarañatak ¿janit amtksna? Wakisirjamächi ukhax kuna jukʼa manqʼanaks apasiraksnawa.
4. Domingo urunakan mä qhawqha horanak yatiyir mistsna ukhaxa, ¿kunsa jikxatsna?
4 Domingo urutï mä qhawqha horanak yatiyañäni ukhaxa, samartʼañatakix tiempox utjaskistaniwa. Ukat taqi kunat sipansa, ukham yatiyir saratasatxa wali kusisitaw jikxatasiñäni (Pro. 19:23). Ukat inas kunjamtï Pablox Lidiar jikxatkäna ukham maynir jikxataraksna. ¡Ukax wali kusiskañapunispawa!