Yatichañataki wakichäwinaka
Uraqpachanwa Jehová Diosan Qhanañchirinakaparux Bibliat yatichirinakat uñtʼasi.
BIBLIAT yatiqañaxa, Jehová Diosan Qhanañchirinakapatakix wali wakiskiriwa, uk uñjasax janis jupanakax yatiqañ utanakar sarañar yäqapkaspa ukham inas yaqhip jaqinakax amuyapxchispa. Ukampis janiw ukhamäkiti. Yatichirix yaqhanakar yatichañatakix jupaw nayraqat yatiqañapa ukat wakichtʼatäñaparakiwa. Ukatwa Jehová Diosan Qhanañchirinakapax yatiqañ utanakarus sarapkchisa, walja maranakaw Diosan markapan wakichtʼat yatichäwinakapat yanaptʼa katuqasipki. Uka wakichäwinakaxa amuyunsa sarnaqañansa yupaychäwinsa suman jikxatasipxañapatakiw Jehová Diosan Qhanañchirinakaparusa yaqhanakarus yanaptʼawayi.
Diosan Qhanañchirinakapax walja markanakanwa liyiñ qillqañ jan yatipki ukat jukʼak yatipki ukanakar yatichañ qalltawayapxi. Ukatakiw liyiñ qillqan yatichañatak wakichäwinak waktʼayapxi.
Nigeria markanxa, 1949 maranwa liyiñ qillqañ yatichäwix qalltasïna. Ukat 1961 maratakisti, Nigeriankirinakax waranq waranqanakaw ukham yatichäwinak uttʼayasitapatxa liyiñ qillqañ yatiqxapxäna, ukat 1962 marat 1994 marakamaxa, 25.599 jaqinakaw liyiñ qillqañ yatiqawayapxaraki. Ukat Nigeria markan mä encuesta luratatxa niya tunka maräxiwa, Jehová Diosan Qhanañchirinakapax sapa patakat llätun tunk jilaw liyiña qillqañ yatiqapxatayna, ukat uka markankirinakatsti sapa patakat chikatanikiw liyiñ qillqañ yatipxäna. Uka kikpa liyiña qillqaña yatichäwinakaxa Bolivia, Camerún, Zambia, Honduras uka markanakansa wakichtʼasirakïnwa.
Walja markanakanwa yatichañ tuqit autoridadanakax liyiñ qillqañ yatichañatak wakichäwinakarux wali wakiskirit uñjapxi. México markankir yatiqañ utanak uñjir mä autoridadax akham sasaw qillqatayna: “Ukham yatichapxatamatxa yuspärapsmawa, ukat aka marka apnaqirinakas ukhamarakiw yuspärtʼam sapxitu jan liyiñ qillqañ yatirinakaru yatichapxatamata [...;] ukham yatichäwinakaman nayrar sarantasipkakim sasaw sapxsma” sasa.
Yatiyañataki Diosan Yatichäwipa
Jehová Diosan Qhanañchirinakapatakix Bibliat yatichañax wali wakiskiripuniwa, ukatwa yaqhanakar sum yatichañatakix nayraqat yatxatañataki chʼamachtʼasipxi. Ukatakix aka Uraqpachan 103.267 tamanakanwa Yatiyañataki Diosan Yatichäwipa sat tantachäwin wal yatxatapxi. Qhanañchirinakasa ukat Bibliat yatiqirinakasa uka yatichäwirux qillqatäpxiwa, uka yatichäwinxa mayn maynirakiw mä jukʼa arstʼapxi. Ukxarux mä irpir chuymaniw khitinakatix arstʼapki ukanakarux iwxtʼaraki, ukhamat sum liytʼirïpxañapataki ukat arstʼirïpxañapatakisa. Ukat kawkïr wawanakatix liytʼañ yatxapxi ukanakaxa uka yatichäwirux qillqayasipxarakispawa, ukhamat jukʼampi yatiqañataki, ukat uka yatichäwixa yatiqañ utanakansa yaqha luräwinakansa yanaptʼarakiwa. Jehová Diosan Qhanañchirinakapan wawanakapax wali sum arstʼañ yatipxi sasaw yatiqañ utanakan yatichirinakax sapxaraki.
Maysatsti, Jehová Diosan Qhanañchirinakapan taqi tamanakaparuw Tantachasiñ Utanakapan mä biblioteca utjañapatakix chʼamachtʼasi, ukanxa Bibliat apstʼat qillqatanaka, libronaka ukat diccionarionakampiw utjañapa ukhamat jukʼamp yatxatañataki. Uka bibliotecaxa taqi khitinakatï Tantachasiñ Utar jutapki ukanakan yatxatapxañapatakiwa. Tamanakanxa liyipxañapatakiw chʼamachtʼasi, ukat familianakarusa utanakapan mä bibliotecanïpxañapatakiw chʼamachtʼasiraki, ukanxa Bibliat apstʼat kunayman libronakaw utjañapa ukhamat wawanakarus jilïrinakarusa yanaptʼarakini.
Yaqha yatichäwinaka
Jehová Diosan Qhanañchirinakapax yaqha yatichäwinak wakichapxaraki, ukanxa chacha warminakaruw misionerot irnaqtʼapxañapataki wakichtʼasi, ukat chachanakatakix yaqha wakichtʼäwinakaw utjaraki tamanakan sum sarayapxañapataki. Ukhamaxa, Jehová Diosan Qhanañchirinakapax yatiqañarux wali wakiskiritpun uñjapxi, ukwa aka wakichäwinakax uñachtʼayaraki.
[13 janan qhanañchäwipa]
Tamanakanxa liyipxañapatakiw chʼamachtʼasi, ukat familianakarusa utanakapan mä bibliotecanïpxañapatakiw chʼamachtʼasiraki, ukanxa Bibliat apstʼat kunayman libronakaw utjañapa
[12 janan fotopa]
Yatiyañataki Diosan Yatichäwipa sat tantachäwixa, yatiqirinakarux suma liytʼirïpxañapataki ukat suma arstʼirïpxañapatakiw yanaptʼi