Diosarus ukat Bibliarus jan iyawsapki ukanakarojj ¿kawkïr qellqatanakampis yanaptʼsna?
1. ¿Kunatsa yaqhepajj Kunsa yatichi sat librompi jan yatjjatañ munapkaspa?
1 Maynejj Jehová Diosan yupaychiripäñapatakejja, kuntï Bibliajj yatichi ukwa yatiñapa. Ukampis yaqhepajj janiw cristianöpkiti ukat Bibliarojj janiw Diosan Aruparjam uñjapkiti. Yaqhepasti janiw Diosan utjatap iyawsapkiti ni Bibliarus confiyapkiti. Jupanakajj Kunsa yatichi sat librot inas jan yatjjatañ munapkchiti, ukampis ¿Bibliat apstʼat kawkïr qellqatanakas yanaptʼaspa? Akjjar qhanañchaski uka yanaptʼanakajja, niya 20 markankir jilat kullakanakan arsutaparjamawa.
2. Diosajj janiw utjkiti sasin maynejj sistaspa ukhajja, ¿kunsa yatjjatañasa, ukat kunatsa?
2 Diosajj janiw utjkiti sapki ukanakar yanaptʼañataki. Diosajj janiw utjkiti sasin maynejj sistaspa ukhajja, kunatsa ukham amuyi uk yatiñaw wakisispa. ¿Jaqejj monot jutatawa siski uka kʼari yatichäwirut iyawspacha? ¿Ina chʼusat tʼaqhesitapatti, jan ukajj religionanakan Biblian yatichäwiparjam jan sarnaqapjjatapatti Diosar jan confiykpacha? ¿Diosar jan iyawsapki uka markatcha juti? Inas jupajj Diosan utjaskatap amuyaskchi, ukampis Diosar iyawsañajj janis wakiskaspa ukhamwa amuyaspa. Walja jilat kullakanakajja, akhamwa jisktʼañ yatipjje: “¿Ukhampunti amuyayäta?” sasa. Ukhamatwa kunatsa jupanakajj ukham amuyapjje uk yatipjje. Kuntï sapki uk sumwa istʼañasa. Kunatsa Diosan jan utjatap amuyapjje uk yatiñäni ukhajja, kunjamsa qhanañchtʼañäni ukat Bibliat apstʼat kawkïr qellqatanaksa chursna uks yatirakiñäniwa (Pro. 18:13).
3. ¿Kunjamsa jaqeru ukat kuntï amuyki uk respetatas uñachtʼaysna?
3 Qhanañchkañäni ukhajja, kuntï utanejj amuyki ukajj janis walïkaspa ukham janiw amuyayañasäkiti. Estados Unidos markankir sucursalat akham sasaw ewjjtʼanistu: “Kunarus iyawsani uk sapa mayniw amti ukat uk respetañasawa. Jupanakamp chʼajjwaskañat sipansa, amuytʼasipjjañapatakiw jisktʼañasa” sasa. Tamanak tumptʼir mä jilatajja, utanir sum istʼasinjja, akham sasaw jisktʼi: “¿Aka toqet jumajj amuytʼirïtati?” sasa. Ukat ukarjamaw qhanañchtʼi.
4. ¿Kunjamsa yaqhep jilat kullakanakajj budistanakar yatiyapjje?
4 Walja budistanakatakejja, Diosajj janis utjkaspa ukhamawa. Gran Bretaña markankir jilat kullakanakat yaqhepajja, Cómo hallar paz y felicidad duraderas sat folletompiw uka jaqenakar yatiyapjje. Ukat jupanakampi parlañ qalltasajja, ¿Existe un Creador todopoderoso? siski uka yatichäwitwa qhanañchtʼapjje. Ukjjarusti, “Una guía para toda la humanidad” siski uka yatichäwitwa qhanañchapjjaraki. Ukat wakischi ukhajja, Kunsa yatichi sat librot yatjjatañatakiw parltʼapjjaraki ukat akham sapjjewa: “Janis Diosan utjatap iyawskstajja, Bibliat yatjjatañamajj wali askïspawa, kunattejj suma ewjjtʼanakaniwa” sasa. Estados Unidos markankir mä jilatajj chino aru parlapki ukanwa precursorjam irnaqtʼaski, jupajj akham siwa: “Yatiyapkta uka jaqenakajj liyiñ wal munapjje. Kuna qellqatanaktï jaytawayapkta uk jankʼakiw liytʼasipjje, ukat kuttʼapjjerït ukhajj liytʼañ tukuyjjapjjeriwa. Ukampis kunjamsa Bibliat yatjjatasiñapa uk janiw sum amuyapkiti. Uk amuyasajj Suma yatiyäwinaka sat folletpunwa qalltan churirïta, uka folletojj jaqenakamp parltʼañatak luratawa” sasa. Estados Unidos markan chino aru parlir tamanak tumptʼiri mä jilatajja, nayraqat visitʼktan ukhajj Kunsa yatichi sat libromp yatichañ qalltasirakispawa sasaw saraki. Ukampis Diosat parlki uka 1 jaljat qalltañat sipansa, 2 jaljat parlañ qalltañaw wakisispa, kunattejj ukanwa Bibliajj kuna kasta librosa uk qhanañchi.
5. ¿Kunatsa paciencianïñajj wali wakiskirejja?
5 Maynejj janiw Diosarojj mäki iyawskaspati, ukhamajj paciencianïñasawa. Cheqas janiw may kuti parlatakejj Diosan utjatap iyawskaspati. Ukampis walja kuti visittʼataw jukʼat jukʼat Diosan utjatap amuyjjaspa, jan ukajj kunatsa mayninakajj Diosar iyawsapjje uksa amuyjjaspa.
6. ¿Kunatsa yaqhepajj Bibliat jan yatiñ munapkaspa?
6 Bibliat jan yatiñ munapki jan ukajj jan confiyapki ukanakar yanaptʼañataki. Yatiyktan ukhajja, waljaniw Diosar iyawstwa sasin sapjjestu, ukampis janiw Bibliarojj Diosan Aruparjam uñjapkiti, ukatwa kuntï Bibliajj siski uk jan yatiñ munapkiti. Ukham jaqenakajj jan cristianöpki uka markanakanwa utji, ukat Bibliajj cristianöpjjtwa sapki uka religionanakatakïkaspas ukham amuyapjje. Ukat cristianöpjjtwa sapki uka markanakansa, Biblian yatichäwinakap janiw askirjam uñjapkiti. Ukanakarojj ¿kunjamsa Bibliat yatjjatañ munapjjañapatak yanaptʼsna?, ukat Kunsa yatichi sat librompi yatjjatapjjañapatakis ¿kunjamsa yanaptʼsna?
7. Jaqenakan Bibliat yatjjatañ munapjjañapatakejj ¿kunjamatsa yanaptʼsna?
7 Grecia markankir sucursalat akham sasaw mä carta apayanipjjäna: “Bibliat jan yatiñ munapki ukanakarojja, kuntï Bibliajj siski uk uñachtʼayasaw yanaptʼsna. Ukwa walja jilat kullakanakajj amuyapjje, kunattejj Diosan Arupakiw jaqenakan chuymapar purtʼañatakejj chʼamani (Heb. 4:12). Cheqas waljanejja, Diosan sutip Biblian uñjasakiw Bibliat yatjjatañ munjjapjje” sasa. India markankir sucursalat akham sasaw qellqanipjjaraki: “India markankirinakajja, Bibliajj kuntï jakañata ukat jiwañat siski ukanakatwa yatjjatañ munapjje. Ukat uñisiñsa, yaqhachasiñsa Diosajj chhaqtayjjaniwa sasin Bibliajj siski uk yatiñajj jupanakatakejj wali askiwa” sasa. Walja jilat kullakanakajja, kunatï jaqenakar llakisiyki ukanakatwa parltʼapjje, ukhamatwa kuntï Diosan Reinopajj jan walinak chhaqtayañatak lurkani uk Bibliampi qhanañchapjje.
8. Religionanakan kʼarinak yatichapjjatap layku Bibliar jan askit uñjapki ukanakarojj ¿kamsnasa?
8 Religionanakan kʼarinak yatichapjjatap layku maynejj Bibliar jan askit uñjkchi ukhajja, kuntï jupanakajj yatichapki ukat lurapki ukanakajj janiw Bibliarjamäkiti sasaw qhanañchañasa. India markankir sucursalajj akham sasaw qhanañchäna: “Bibliajj janiw iglesianakankkiti, uk sumwa jaqenakar amuytʼayañasa” sasa. Ukat ¿Qué propósito tiene la vida? ¿Cómo descubrirlo? sat folleton 4 yatichäwipat yatjjatasajj wal muspharapjje, kunattejj ukanwa kunjamsa iglesianakajj Diosan Arup mayjtʼayaña ukat chhaqtayañ munapjjäna uk qhanañchi sasaw yatiyapjjarakïna. Brasilankir mä precursor jilatajj akham sasaw jaqenakamp parltʼi: “Waljanejja, wali amuyumpiw Bibliat yatjjatapjje, ukampis janiw kuna religionarus sarapkiti. ¿Janit jumajj ukham lurkarakisma? Ukajj jumatakejj wali askirakïspawa” sasa.
9. Maynitï Bibliat janiw yatiñ munkti sistani ukhajja, ¿kunatsa chʼamachasiskakiñasa?
9 Jehová Diosajj sapa maynin chuymapwa uñji (1 Sam. 16:7; Pro. 21:2). Ukat suma chuyman jaqenakaruw markapar apani (Juan 6:44). Jupanakat waljaniw Diosat jan yatipkänti ni Bibliatsa yatjjatapkänti. Ukampis Bibliat yatiyktan ukaw jupanakarojj ‘qhespiyatäpjjañapataki’ ukat ‘kunatï cheqäki uk uñtʼapjjañapatak’ yanaptʼawayi (1 Tim. 2:4). Ukhamajja, maynitï Bibliat janiw yatiñ munkti sistani ukhajja, janiw aynachtʼañasäkiti, chʼamachasiskakiñasawa. Bibliat apstʼat qellqatanak utjkistu ukanakat kawkïrits yatjjatañ munapjjaspa ukwa ajlltʼañasa. Ukat tiempompejj ¿Kunsa Bibliax chiqpachapuni yatichi? sat librompiw yatichjjaraksna.
[4 janan recuadropa]
Diosajj janiw utjkiti sapki ukanakarojj ¿kunjamsa yanaptʼsna?
• Kunatsa Diosajj janiw utjkiti sasin amuyi uk yatiñatakejja, akhamwa jisktʼañasa: “¿Ukhampunti amuyayäta?” sasa.
• Jaqejj monot jutatawa siski uka kʼari yatichäwirutï iyawschi ukhajja, aka qellqatanakampiw yanaptʼsna:
¡Despertad! revistan “¿Casualidad o diseño?” siski uka yatichäwinakampi
Las maravillas de la creación revelan la gloria de Dios sat videompi
Kunjamatsa wali kusisit jakassna sat folletonkir 4 yatichäwimpi, ukat ¿Es la vida obra de un Creador? ukat El origen de la vida. Cinco cuestiones dignas de análisis sat folletonakampi
• Ina chʼusat tʼaqhesitapat Diosar jan confiyjjchi ukhajja, aka qellqatanakampiw yanaptʼsna:
¿Existe un Creador que se interese por nosotros? sat libron 10 yatichäwipampi
¿Chiqapuniti Diosax sum jakasiñas munpacha? sat folleton 6 yatichäwipampi, ukat ¿Qué propósito tiene la vida? ¿Cómo descubrirlo? sat folleton 6 yatichäwipampi
• Diosan utjatap mä jukʼsa amuychini ukhajja, Kunsa yatichi sat libro chursna. Ukat 2 jaljapata jan ukajj kawkïr yatichäwitsa yatjjatañ munaspa uka yatichäwitwa yatjjatañ qalltsna.
[5 janan recuadropa]
Bibliar jan confiyapki ukanakar ¿kunjamsa yanaptʼsna?
• La vida... ¿cómo se presentó aquí? ¿Por evolución, o por creación? sat libron 17 ukat 18 yatichäwinakapampi.
• Biblian aski yatichäwiparjam sarnaqañajj kunja wakiskirisa ukwa qhanstayañasa. Ukatakejj aka qellqatanakampiw yanaptʼsna:
¡Despertad! revistan “Ayuda para las familias” siski uka yatichäwinakampi
La Biblia: el poder que ejerce en su vida sat videompi
Diosan apayanit suma yatiyäwinaka sat folletonkir 9 ukat 11 yatichäwinaka, ukat Kunjamatsa wali kusisit jakassna sat folleton 2 yatichäwipampi
Kawkhanakantï jaqenakajj Bibliat jan yatiñ munapki uka cheqanakanjja, kuntï yatiyktan ukajj kawkit apsutasa uk qalltan visitʼkasajj janiw qhanañchañajj wakiskaspati
• Kunjamsa Biblian profecianakapajj phoqasi ukwa qhanañchtʼañasa. Ukatakejj aka qellqatanakampiw yanaptʼsna:
La Biblia: historia exacta, profecía confiable sat videompi
Kunjamatsa wali kusisit jakassna sat folleton 3 yatichäwipampi 7, 8 tʼaqanakata
• Bibliajj kunanakatsa yatichi uk yatjjatañ munani ukhajja, Kunsa yatichi sat librompiw yatichañ qalltsna.
[6 janan recuadropa]
“Janiw Diosajj utjiti” sasin sapjjestaspa ukhajj ¿kamsnasa?
• Akham sasaw jisktʼsna: “Diosajj cheqapun utjaskatap amuyañatakejj kunas yanaptʼawayitu uk ¿yatiñ munasmati?” sasa. Ukatjja, Razonamiento librot 87 janat 89 janakamaw mä qawqha wakiskir yatichäwinak qhanañchtʼsna. Ukat kawkïr qellqatas yanaptʼawayistu uk aparapiñatakiw jupampi amtawaysna.
• Akham sasaw jisktʼsna: “Diosajj cheqapuni utjaspa ukhasti, ¿kunjam Diosäñapsa munasma?” sasa. Ukham jisktʼatajja, Diosajj jan yaqhachasiri, khuyapayasiri ukat cheqapar uñjirïñapawa sasaw jilat partejj sapjje. Ukatjja, Bibliampiw Diosajj ukham Diosawa sasin qhanañchsna. (Ukatakejj Kunsa yatichi sat librot 1 jaljapat 6 tʼaqat yatjjatañ inas wakischispa.)
“Janiw Bibliat yatiñ munkti” sasin sapjjestaspa ukhajj ¿kamsnasa?
• Akham sasaw sissna: “Waljaniw ukham amuyapjje. Yaqhepatakejja, kuntï Bibliajj siski ukat kuntï cientificonakajj yatjjatapki ukampejj mayj mayjawa, jan ukajj Biblian ewjjanakapajj janiw jichhürunakatakïkiti sasaw sapjje. ¿Jumajj Biblia liytʼtati? [Kamsanisa ukwa istʼañasa. Ukat Kunjamatsa wali kusisit jakassna sat folleton 3 yatichäwipat 1, 2 tʼaqanakat qhanañchtʼasajja, uka folletwa churaraksna.] Ukat Bibliajj kuna suma ewjjtʼanakanisa uk yaqha uruw aka folletomp qhanañchtʼirisma” sasa.
• Jan ukajj akhamwa saraksna: “Waljaniw ukham sapjjetu. Ukampis ¿Biblian kawkïr jiskʼa tʼaqanakapas yanaptʼawayitu uk uñachtʼayirismati? [Job 26:7 jan ukajj Isaías 40:22 liytʼäta, ukanwa Bibliajj ciencia toqet cheq parlatap qhanañchi.] Biblianjja familianakatakejj suma ewjjtʼanakaw utjaraki. Ukanakat maya uñachtʼayañatak yaqha uruw kuttʼanirista” sasa.
• Jan ukajj akhamwa saraksna: “Walik ukham qhanañchtʼistajja. Ukampis Diosatï jaqenakatak mä libro qellqaspäna ukhajja, ¿kunanak qellqatäñaps munasma?” sasa. Ukat kuntï siskani ukarjamaw Bibliampi qhanañchsna.