Jukʼamp suma yatiyirïñataki chʼamachasiskakiñäni
1. Jukʼamp sum yatiyañatakejj ¿kawkïr nayra cristianonakat yateqasiñatakis chʼamachasiñasa?
1 Cristianonakajj suma yatiyirïñatakejj chʼamachasiskakiñasawa. Ukatwa Jesusajj arkirinakapar jukʼamp sum yatiyapjjañapatak wakichtʼäna (Luc. 9:1-5; 10:1-11). Aquila ukat Priscila chacha warmejja, ukhamarakiw Apolos chacharojj “Diosan thakipjjatjja jukʼamp suma qhana amuytʼayapjjarakïna” (Hech. 18:24-26). Timoteojj walja maranakas Diosan arunakap yatiyjjchïnjja, apóstol Pablojj jukʼamp suma yatichirïñatak chʼamachasiskakiñapatakiw ewjjtʼäna, ukhamat nayrar sartaskatap “taqeni uñjapjjañapataki” (1 Tim. 4:13-15). Jiwasajj walja tiempos Diosan suma yatiyäwinakap yatiyjjstanjja, mä arunjja, Tatirur esclavjam sirvjjstanjja, jukʼamp sum yatiyañatakejj chʼamachasiskakiñasawa.
2. Mayninakat yateqasiñatakejj ¿kuns lursna?
2 Mayninakat yateqasipjjañäni. Jukʼamp suma yatiyirïñatakejj mayninakatwa yateqasiñasa (Pro. 27:17). Ukhamajj yatiykasajja, kunjamsa yatiyir masisajj yatiyaski uk sum uñjañasa. Ukat experienciani jilat kullakanakaruw yanaptʼa mayiñasa, ewjjtʼapkistani ukhajj sumwa istʼañasaraki (Pro. 1:5). Bibliat jukʼamp yateqañ munapki ukanakar kuttʼaña, Bibliat yatichañ qalltaña jan ukajj yaqha ukhamanak lurañajj ¿chʼamjamati? Ukhamächi ukhajja, grupo uñjir jilataru jan ukajj yaqha experienciani jilat kullakaruw yanaptʼa mayiñasa. Ukat qollan ajayojj ukhamarakiw jukʼamp sum yatiyañatak yanaptʼistaspa. Ukhamajja, oracionanakasan mayisiñasapuniwa (Luc. 11:13).
3. Jan yanaptʼa maykata ewjjtʼapjjestani ukhajja, ¿kunsa lurañasa?
3 Jan yanaptʼa maykata ewjjtʼapjjestani ukhajja, janiw chuym ustʼayasiñasäkiti (Ecl. 7:9). Antisas Apolos chachjamaw altʼat chuymampi taqe yanaptʼanak katoqtʼasiñasa ukat yuspärtʼañasaraki. Cheqas ukham lurañaw jukʼamp askejja (Pro. 12:15).
4. ¿Kunatsa jukʼamp suma yatiyirïñatakejj chʼamachasiskakiñasa?
4 Nayrar sartatasajj Diosaruw jachʼañchani. Jukʼamp suma yatiyirïpjjañapatakejja, Jesusajj arkirinakaparojj uva alin layminakapäpkaspas, mä arunjja, ramanakapäpkaspas ukham amuytʼayäna. Nayaw uva alitjja, jumanakajj ramanakäpjjtawa ukat Awkejjarakiw ‘jukʼampi achupjjañamatakejj’ khuchurapjjtam sasaw sarakïna (Juan 15:2). Uva yapuchir mä jaqejja, uva alinakap jukʼamp achunïñapwa muni, Jehová Diosajj ukhamarakiw ‘lakasampi yupaychasa’, mä arunjja, arunakap jukʼamp sum yatiyañatak chʼamachasiñas muni (Heb. 13:15). Jukʼamp suma yatiyirëjjañäni ukhajj ¿kuna askinaksa jikjjatañäni? Jesús pachpaw akham sistu: “Awkejjajj jachʼachatawa kunapachatejj jumanakajj walja achupkta ukkhajja” sasa (Juan 15:8).