¿Biblian suma yatiyäwinakapajj Diosatpunt jutpacha?

1. ¿Khitin arunakapas Biblian qellqatajja?

Mä suma yatiyäwiw Biblian utji, wiñayatakiw Aka Oraqen jakasiñäni sasaw qhanañchi (Salmo 37:29). Bibliajja, 66 libronakaniwa ukat 40 chachanakarakiw qellqapjjäna, jupanakarojj Diosaw ajllitayna. Moisesaw nayrïr phesqa libronak qellqawayi, ukat jichhakamajj niya 3.500 maranakaw pasawayjje. Ukat qhep qhep librojja, apóstol Juanaw qellqawayi, ukhat jichhakamajj 1.900 maranakaw pasawayjjaraki. Ukat Biblian qhanañchaski uka amuyunakajja Diosan amuytʼayatawa. Jupaw Biblia qellqerinakarojj qollan ajay toqnam yatiyäna (2 Samuel 23:2). Ukhamajj Diosan amuyunakapwa qellqapjjäna janiw jupanakan amuyupakikänti. Ukhamajja, Bibliajj Diosan apayanitawa. 2 Timoteo 3:16 ukat 2 Pedro 1:20, 21 liytʼäta.

¿Bibliajj khitin amuytʼayatasa? sat video uñtasma.

2. Bibliajj taqe kuns cheq parli sasajj ¿kunatsa sissna?

Bibliajj Diosan apayanitawa, uka toqet janipuniw pächasksnati, ukat kunatï jutïrin paskani ukanakjja, jaqenakat sipansa Bibliakiw sum qhanañchistojja (Josué 23:14). Taqe chʼaman Diosakiw ukham luraspajja. Isaías 42:9 ukat 46:10 liytʼäta.

Mä librotï Diosan apayanitächejja, wali wakiskirïñapawa. Bibliajj walja arunakar jaqokipatäsinjja, millón millonaw lakirasiwayi. Nayra librökchisa, ciencia toqet parlki ukhajja, cheqapwa qhanañchi. Ukat 40 qellqerinakapajja, janiw may may parlapkiti.a Maysa toqetjja, sapa janapanwa kunja munasirisa Jehová Diosajja uk uñachtʼayi, ukat jichhürunakanjja ukhamarakiw jaqenakan jakäwinakapan yanaptʼaski. Ukatwa walja jaqenakajj Bibliajj Diosan arupapuniw sasin sapjje. 1 Tesalonicenses 2:13 liytʼäta.

Bibliajj confiykañ librowa, ¿kunatsa ukham sissna? sat video uñtasma.

3. ¿Kuna toqetsa Bibliajj parli?

Bibliajj suma aski yatiyäwinakaniwa. Diosajj kunja suma amtanis jaqenakataki uka toqet parli. Kunjamsa jaqejj mä paraison sum jakasiñ aptʼasiwayi ukat kunjamsa Diosajj wasitat mä suma paraisor aka Oraq tukuyjjarakini ukanaks qhanañcharakiwa. Apocalipsis 21:4, 5 liytʼäta.

Diosan arupanjja, leyinaka, kamachinaka ukat ewjjtʼanakaw utjaraki. Ukat kunjamsa Jehová Diosajj jaqenakar uñjatayna uka toqetsa parlarakiwa, ukanakaw Diosajj kunja munasirisa uk amuytʼañ yanaptʼistu. Ukhamajj Bibliaw Jupar uñttʼañataki yanaptʼistu. Ukhamarak kunjamatsa Diosan amigopasna uks yaticharakistuwa. Salmo 19:7, 11; Santiago 2:23 ukat 4:8 liytʼäta.

4. ¿Biblia sum amuytʼañatakejj kunas yanaptʼistaspa?

Bibliat sum amuytʼapjjañapatakejja, Jesusajj mä jiskʼa tʼaqat aytkasinjja uka toqet qhanañchirïna. Aka folletojja, niya ukham wakichatarakiwa ukhamat Biblian yatichäwinakap sum amuytʼañatak yanaptʼistani. Lucas 24:27, 45 liytʼäta.

Diosan apayanit suma yatiyäwinakat yatjjattʼañajj jumatakejj wali askïniwa. Ukampis yaqhep jaqenakajj janis wakiskirïkaspa ukham amuyapjje, ukat yamas yaqhanakajj colerasipjjew uka toqet parlatajja. Ukampis jan aynachtʼamti. Bibliarjamajja, khitinakatï Diosat yateqapki ukanakakiw wiñayatak jakasipjjani. Juan 17:3 liytʼäta.