LECCIÓN 10

Modulación

Hechos 16:28

¿KUNSA LURAÑAMA? Kuntï yatichañ munkta uk istʼirinakan amuyapjjañapatakisa, chuymar purtʼañapatakisa janiw mä igualak parlañamäkiti, jan ukasti jachʼata, jiskʼata, ratuki, kʼachata ukhamwa parlañama.

¿KUNJAMSA UK LURASMA?

Jachʼataraki jiskʼataraki parltʼam. Wakiskiri yatichäwinak qhanañchañatakisa, istʼirinakar chʼamañchtʼañatakis jachʼatwa parlañama. Diosan juchañchir arunakapjja, jachʼatwa arsuñamaraki. Llakisiñ arunaka, ajjsarayir arunak parlkäta ukhajja, jiskʼatakwa parlañama. Atencionamp istʼayasiñ munkäta ukhajja nayraqatajj jiskʼatakwa parlañama, qhanstayañ munkäta ukjja jachʼatwa parlañamaraki.

Janiw jachʼatakpun parlañamäkiti, ukham lurasajj istʼirinakarus toqjkasma ukhamäspawa. Janirakiw sinti jachʼatsa ni sinti jiskʼatsa parlañamäkiti, ukham lurasma ukhajja janiw istʼjjapjjeristamti.
Parlatam mayjtʼayam. Jaqenakajj kusisitäpki jan ukajj llakitäpki ukhajj kunjamsa parlapjje ukhamwa parltʼañama.
Kʼachataraki ratukiraki parltʼam. Taqe chuyma parlaskatam amuyapjjañapatakejja, ratukiw parltʼasma. Mä wakiskir yatichäwit parlañ munkäta ukhasti, kʼachatakwa parltʼarakisma.

Kʼachat parlkäta ukhajja, janiw mä akatjamat ratuk parlañ qalltañamäkiti. Ukham lurasajj istʼirinakaruw sustjasma. Janirakiw sinti ratuk parlañamäkiti, ukham lurasma ukhajja, janiw istʼirinakajj kuntï siskäta uk amuyapkaniti.