¿Jesusan discipulopäñajj kunjamasa?

Fariseonakan mä jilïripan utapanwa Jesusajj manqʼäna, ukatjja suma yatichäwinakatwa parläna. Jesusajj Jerusalenar saraskakïnwa, walja jaqenakaw arkapjjarakïna. ¿Kunatsa arkapjjäna? Jan waltʼäwinak utjkipansa, ¿cheqpachapunit Jesusan arkiripäñ munapjjpachäna?

Thak sarkasinjja, Jesusajj akham sänwa: “Maynitejj nayan ukar jutchi, ukatjja awkiparusa, taykaparusa, warmiparusa, wawanakaparusa, jilanakaparusa, kullakanakaparusa, pachpa jakañaparus [jan uñiskchi] ukhajja, janiw nayan discipulojäkaspati” sasa (Lucas 14:26, qhanañchäwi). Ukham sasinjja, ¿Jesusajj kamsañsa munäna?

Jesusan arkirinakapajj cheqpachapunis familianakapar uñisipjjañapäkaspa ukham janiw sañ munkänti. Jan ukasti arkirinakapajj Jesusaruw jukʼamp munasipjjañapäna. Janiw jichhak casaraskäna uka jaqer uñtasitäpjjañapäkänti, uka jaqejj manqʼäwir invitatajj janiw sarañ munkänti (Lucas 14:20).

Ukatjja ‘pachpa jakañaparusa’ uñisiñapawa sasaw säna. Uka arunakajja, discipulopajj pachpa jakañapar munasiñat sipansa Jesusaruw jukʼamp munasiñapa sañwa munaraki, discipulopätap laykojja jakañap aptʼasiñsa janiw ajjsarañapäkänti. Ukhamasti Jesusan discipulopäñatakejja, maynejj sum amuytʼasiñapänwa, janiw aleq ukhamatak amtañapäkänti.

Jesusan discipulopajj kunayman jan walinakana, arknaqata ukhamaw uñjasispäna. Jesusajj sänwa: “Maynitejj nayan discipulojäñ munchejja, tʼaqesiñ lawap qʼepjjarusin nayar arkitpan, janitejj ukhamäkaspajja, janiw nayan discipulojäkaspati” sasa (Lucas 14:27). Cheqansa Jesusan mä cheqpach discipulopajja, Jesusjam tʼaqesiñjja janiw ajjsarañapäkänti, enemigonakapampis jiwayataw uñjasiñapäna.

Ukhamasti Jesusan discipulopäñatakejj sum amuytʼasipjjañapa. Uk qhanañchañatakejj Jesusajj mä uñachtʼäwitwa parläna, jupajj sänwa: “Jumanakat maynejj mä uta lurañ munaspa ukhajja, ¿janit nayraqatajj qontʼasisin qhawqhas munasini uk amuytʼkaspa, ukhamat tukuyañatakejj utjaniti janicha uk yatiñatakejja? Jupatejj ukhamak cimiento uchantani, ukatjja janirak tukuyirjamäkani ukhajja uñjirinakajj taqeniw jupat larusipjjani” sasa (Lucas 14:28, 29). Ukhamasti Jerusalenar Jesusampi sarapkäna uka jaqenakajja, janïrakipänwa suma discipulopäñ amtapjjañapäna. Uka toqetjja Jesusajj yaqha uñachtʼäwimpiw qhanañchaskakïna akham sasa:

“Mä reyejj yaqha reyimpi guerran nuwasir sarki ukhajja, ¿janit nayraqatajj qontʼasisin yaqhanakamp aruskipkaspa, ukhamat tunka waranqa soldadonakampejj pä tunka waranqa soldadonakamp jutir reyirojj atipaspati janicha uk yatiñataki? Ukhamarus jan atipirjamäkani ukhajja, mayni reyin jayankkipanwa jupajj embajadoranakapar khitani, sumar mantjjañäni sasin mayipjjañapataki” sasa. Sumpach qhanañchañatakejja Jesusajj sänwa: “Amtapjjapunim. Janitï jumanakat maynejj taqpach utjirinakap apanukkani ukhajja, janiw nayan discipulojäkaspati” sasa (Lucas 14:31-33).

Ukham sasinjja Jesusajj janiw jupamp chika sarapkäna uka jaqenakaruk siskänti. Jan ukasti khitinakatï Cristot yateqapjje ukanakajja, uka ewjjtʼarjamaw lurapjjañaparaki. Mä arunjja Jesusan discipulopäñatakejja, maynejj taqe kunatï jupan utjki uk jaytañatakisa pachpa jakañap aptʼasiñatakisa wakichtʼatäñapawa. Uka toqetjja maynejj sum amuytʼañapa, Diosarus yanaptʼa mayiñaparakiwa.

Ukatjja Jesusajj Qollun Yatichkäna uka pachpatwa mayampi parläna. Discipulonakaparojj sänwa: “Jumanakaw aka oraqen jayupäpjjtajja” sasa (Mateo 5:13). Ukham sasinjja, Jesusajj kunjamtï jayojj aychan jaya tiempo aguantañapataki jan tukusiñapataki yanaptʼkejja, ukhamarakiw discipulonakapajj Diosar servisipkakiñapataki, jan walinak jan lurapjjañapataki jaqenakar yanaptʼapjje sañwa munpachäna. Jesusan jiwañapajj jakʼankjjänwa, ukatwa akham säna: “Cheqansa jayojj wali sumawa. Jayutï chʼapaqaptaspa ukhajja, ¿kunampirak pachpa jayur jayuñchasispasti?” sasa (Lucas 14:34). Jesusar istʼapkäna uka jaqenakajja, uka tiempon utjkäna uka yaqhep jayojj laqʼanïtap laykojj jan sumätap yatipjjänwa, ukatwa uka jayu jan añcha apnaqapkänti.

¿Kunsa yatichañ munäna? Machaq discipulonakapasa walja maranak discipulopäjjapjjäna ukanakasa, Jesusar arkaskakiñatakejj chʼamachasipjjañapänwa, ukwa Jesusajj sañ munaskäna. Jupanakatï aynañchtʼapjjaspäna ukhajja, janiw khitirus yanaptʼapkaspänti, chʼapaq jayur uñtatäpjjarakispänwa, jaqenakasa jupanakat larusipjjaspänwa. Dios nayraqatanjja jan serviri ukhamäpjjaspänwa, yamas sutipsa jiskʼachapjjaspänwa. Ukhamar purtʼasiñajj janipuniw walïkaspänti, ukatwa Jesusajj akham säna: “Khititejj jiñchunïki ukajj istʼpan” sasa (Lucas 14:35).