LECCIÓN 7

Kunatï cheqäki ukak yatichaña

Lucas 1:3

¿KUNSA LURAÑAMA? Istʼirinakan sum amuyapjjañapatakejja, confiykañ qellqatanakatwa yatichañama.

Confiykañ qellqatanak liytʼam. Kuntï siskäta ukajj Bibliarjamäñapawa, ukat wakiskani ukhajj Bibliatwa liytʼañamaraki. Ciencia toqeta, mä noticiata, mä experienciata, jan ukajj yaqha toqet parlañ munkäta ukhajja, kuntï siskäta ukajj cheqati janicha uk sumwa yatjjatañama.
Qellqatanak jan mayjtʼayamti. Mä texto qhanañchkäta ukhajja, kunsa Jehová Diosajj uka texton yatichañ muni ukwa amuytʼañama. Yatichatamajj Bibliarjamäñapawa, ukat ‘suma phoqeri amuyasir esclavojj’ apayanki uka qellqatanakarjamäñaparakiwa (Mat. 24:45). Biblia toqet jan parlki uka qellqatanakat yatichkäta ukhajja, kuntï siski uk janiw mayjtʼayañamäkiti, ukat kuna amtampis qellqerejj uk qellqäna uk sum yatjjatañama.

Kunanakatï pasawaykäna ukanakat parlkäta, jan ukajj numeronakat (cifras) parlkäta ukhajja, kunatï cheqäki ukwa parlañama. “Mä qhawqha jaqenaka” siski ukhajja, janiw “walja jaqenaka” sañamäkiti. “Awisakiwa” siski ukhajja, “sapa kutiwa” sasin janiw sañamäkiti. “Inasa” siski ukhajja, janiw “ukhamapuniwa” sañamäkarakiti.
Sum amuytʼapjjañapatak yanaptʼam. Mä texto liytʼasasa, jan ukajj yaqha qellqat liytʼasas wali amuyumpiw istʼirinakar jisktʼañama. Jan ukajj mä uñachtʼäwimpiw jupanakpachpa amuytʼapjjañapatak yanaptʼañama.