LECCIÓN 8

Uñachtʼäwinakampi yatichaña

Mateo 13:34, 35

¿KUNSA LURAÑAMA? Wakiskir puntonak yatichañatakisa, istʼirinakan jukʼamp yatiñ munapjjañapatakisa, fácil amuykañ uñachtʼäwinakampiw yatichañama.

Amuykañ uñachtʼäwinak ajllim. Jesusat yateqasisajja, kunanaktï istʼirinakajj uñtʼapki ukanakampiw wakiskir yatichäwinak yatichañama. Mä uñachtʼäwimp yatichkäta ukhajja, janiw istʼirinakar pantjasiyirjam yaqha toqenakat parlañamäkiti. Uñachtʼäwimajja, kuntï yatichañ munkta ukatakjamäñapawa, ukhamatwa istʼirinakajj uka toqet sum amuytʼapjjani.

Amuytʼasirïñamawa. Kunanakas juma jakʼan utji ukanakatwa amuytʼañama, Bibliat apstʼat qellqatanakatwa liytʼañama, suma arstʼirïpki ukanakatwa yateqasiñamaraki. Kawkïr uñachtʼäwinakas arstʼañatak yanaptʼiristam ukanak qellqtʼasisajj imasiñamarakiwa.
Istʼirinakatakjam wakichtʼasim. Istʼirinakajj kunanaksa lurañ yatipjje, kunanaksa yatiñ munapjjaspa ukanakwa amuytʼañama. Uñachtʼäwimajj janiw khitirus chuym ustʼayañapäkiti, ni phenqʼasiyañapäkisa.
Kunsa yatichañ munta uk qhanañcham. Wakiskir yatichäwinak (ideas principales) qhanañchañatakikiw uñachtʼäwinakamp yatichañama. Kunsa yatichañ munta ukwa istʼirinakajj amtapjjañapa, janiw uñachtʼäwik amtapjjañapäkiti.