Jesusan sepulturap chʼusaki uñjasajja, ¡warminakajj wal sustjasipjjpachäna! María Magdalenajj “ukatwa Simón Pedron ukaru ukhamarak Jesusan munat mayni discipulopan” ukaru, mä arunjja apóstol Juanan ukar tʼijukam saräna (Juan 20:2). Ukampis sepulturan quedasir warminakajj mä angelaruw uñjapjjäna, sepultura manqhanjja “janqʼo isin istʼata” yaqha angelaw utjarakïna (Marcos 16:5).

Uka pä angelanakat akham sasaw maynejj säna: “Jan ajjsarapjjamti. Lawar chʼakkatat jiwayatäkäna uka Jesusar thaqasipkatamjja nayajj yatisktwa. Jupajj janiw akankjjeti, jaktayatäjjewa, kunjamtï jupajj siskäna ukhama. Jutapjjam, kawkinkkäntï cuerpopajj uk uñjapjjam. Jichhajj jankʼak sarasin jupan discipulonakapar yatiyanipjjam, akham sasa: ‘Jesusajj jiwatanak taypit jaktayatäjjewa, jichhajj Galilearuw jumanak nayra saraski’” sasa (Mateo 28:5-7). Ukhamasti jupanakajj “wali sustjata, wali khatattʼasisaw” discipulonakar yatiyañatak tʼijukam sarapjjäna (Marcos 16:8).

Mariajj Pedrompir Juanampiruw jikjjatäna, wali qaritaw akham sasin yatiyarakïna: “Tatituruw sepulturat apasjjapjjatayna, janiw kawkir uchapjjatapsa yatipkti” sasa (Juan 20:2). Pedrompi Juanampejj tʼijukamaw sarapjjäna. Juanajj ratuk tʼijusajj nayraqat sepulturar purïna, manqha uñantasajj telanakak uñjäna, ukampis janiw mantkänti.

Pedrojj ratukiw purisajj manqhar mantäna, ukanjja linot lurat telanaka Jesusan pʼeqepar uskkäna uka telampik uñjäna. Juanajj mantasaw kuntï Mariajj siskäna uk creyïna. Jesusajj nayratpachsa jaktañapat jupanakar parlkchïnjja, janiw maynis amuykänti (Mateo 16:21). Jan sum amuyasajj utanakaparuw sarjjapjjäna. Ukampis kuttʼanisajja Mariajj sepulturaruw quedasïna.

Ukañkamasti mayni warminakajj discipulonakar thaqeriw sarasipkäna, ukhamat Jesusajj jaktayatäjjewa sasin yatiyañataki. Tʼijukam sarasipkäna ukhajja, Jesusaw jupanakar jikjjatasajj akham säna: “¡Suma urukïpan!” sasa. Jupanakajj “jupan kayupat katuntasipjjäna, jupa nayraqatanwa altʼasipjjarakïna”. Jesusajj sarakïnwa: “¡Jan ajjsarapjjamti! Jilanakajar yatiyir sarapjjam, Galilear sarapjjañapataki, ukanwa jupanakamp jikisëjja” sasa (Mateo 28:9, 10).

Nayraqatajja, kunapachatï terremotojj paskäna angelanakas uñstapjjäna ukhajja, sepultur uñjaskir guardianakajj wal “khatatipjjäna, jiwatäpkaspas ukhamäpjjänwa”. Waliptasajja markaruw sarapjjäna, “kunanakatï paskäna taqe ukanakwa jilïr sacerdotenakar yatiyapjjäna”. Sacerdotenakajj judionakan jilïr irpirinakapampiw parlakipapjjäna. Jupanakajj soldadonakar walja qollqe churañwa amtapjjäna, ukhamat kunatï paskäna uk imtʼañataki ukhamaraki ak sapjjañapataki: “Arumajj ikisipkayäta ukhaw discipulonakapajj jutasin cuerpop lunthatsupjjatayna” sasa (Mateo 28:4, 11, 13).

Romano soldadonakatejj uñjañatak uttʼayatäkasin ikisipkchïnjja, castigotjja jiwayapjjasapänwa. Ukatwa sacerdotenakajj jupanakar akham sapjjäna: “Gobernadoratï ukanak istʼani ukhajja, nanakaw jupamp parlasipkäjja, janiw kunat llakisiñanakamas wakiskaniti” sasa (Mateo 28:14). Soldadonakajj qollqe katoqasisaw kunjamtï sacerdotenakajj sapkäna ukham lurapjjäna. Ukhamasti Jesusan cuerpop lunthatsupjjatayna sasin sapkäna uka kʼari arunakajj taqe judionak taypinwa yatisirakïna.

María Magdalenajj sepulturan jachaskakïnwa. Manqha uñantañatak altʼasisajja, ¡janqʼot isthapit pä angelanakaruw uñjäna! Kawkjantï Jesusan cuerpopajj uchatäkäna ukan qontʼata, maynejj pʼeqe toqena, maynirak kayu toqena. “Warmi, ¿kunatsa jachaskta?” sasaw jisktʼapjjäna. Mariajj sarakïnwa: “Tatitujaruw apasjjapjjatayna, janirakiw kawkir uchapjjatapsa yatkti” sasa. Qhepa toqer uñtasajja, yaqhampiruw jupajj uñjäna. Jupasti kuntï angelanakajj jisktʼapkäna uka kikparak jisktʼäna, ukjjarojj jisktʼaskakïnwa: “¿Khitirus thaqaskta?” sasa. Huerta uñjir jaqëkaspas ukham amuyasajja, akham sasaw Mariajj säna: “Tata, jumatï akat apasjjstajja, sitaya, kawkirus uchanta, ukhamat nayajj apasjjañajataki” sasa (Juan 20:13-15).

Mariajj jaktayat Jesusampis parlaskchïnjja, uka horasajj janiw Jesusätap amuykänti. Ukampis “¡María!” säna ukhakiw arup uñtʼasajj Jesusätap amuyäna. Mariajj wali kusisitaw “¡Rabboni!” sarakïna. Ukajj “¡Yatichiri!” sañ muni. Jesusajj niyas alajjpachar makatañampëjjaspa ukhamaw jupat wal katuntasïna. Ukatwa Jesusajj jupar akham säna: “Jan nayar katjjäsistati. Janïraw nayajj alajjpachankir Awkin ukar makatkti. Antisas jilatanakajan ukar saram, akham sasaw jupanakar säta: ‘Nayajj Awkijan ukaruw makataskta, jumanakan Awkimäkis ukaru, nayan Diosajäkis ukaru, jumanakan Diosamäkis ukaruraki’ sasa” (Juan 20:16, 17).

Ukhamajj kawkjantï apostolonakajj mayni discipulonakamp tantachatäsipkäna ukaruw Mariajj tʼijukam saräna, akham sasa: “¡Tatituruw nayajj uñjta!” sasa. Kuntï mayni warminakajj yatiyapkäna, ukhamarak jupajj uka toqet yatiyäna (Juan 20:18). Ukampis jupanakatakejj “jan amuytʼasisas parlapkaspa” ukhamanwa (Lucas 24:11).

Domingo 16 de nisán urojja, discipulonakapajj wali llaktʼatäsipkänwa. Kunatsa Jesusan sepulturapajj chʼusakïpacha uk janiw sum amuyapkänti (Mateo 28:9, 10; Lucas 24:11). Uka urunjja, Cleopasampi yaqha discipulompiw Jerusalenat Emaús sat markar sarasipkäna, Jerusalenat 11 kilometronak sarañankänwa.

Sarkasajja kunanakas pasatayna ukanakat parltʼasisaw sarasipkäna. Ukhamaruw mä jan uñtʼatajj jupanakar jikjjatäna. Jupanakarojj jisktʼarakïnwa: “¿Kuna toqenakatsa jumanakajj thak sarkasajj parlasipkta?” sasa. Cleopasajj akham sarakïnwa: “¿Forasterjamat jumajj Jerusalenan sapak jakta, kunanakatï uka markan akürunakajj paski ukanak janit yatkta?” sasa. “¿Kunanakarak pasisti?” sasaw jupajj säna (Lucas 24:17-19).

Jupanakajj sapjjarakïnwa: “¿Kunanakatï Nazareno Jesusampejj paski uk janit yatkta? [...] Nanakajj jupaw Israel markar salvañatakejj ajllitäpacha sasaw suyasipkayäta” sasa (Lucas 24:19-21).

Cleopasampi maynimpejj kunas uka urun pasäna ukanak yatiyapjjäna. Jupanakajj kunjamsa warminakajj Jesusan sepulturap chʼusak uñjapjjatayna, kunjamsa angelanakajj Jesusan jakaskatap warminakar yatiyapjjatayna ukanakwa sapjjäna. Sepulturar sarasinjja, yaqhanakajj “kunjamtï uka warminakajj sapkataynajja ukhampunwa jikjjatapjjatayna”, uksa yatiyapjjarakïnwa (Lucas 24:24).

Uka pä discipulonakajj kunatsa ukanakajj pasäna uk janiw amuyapkänti. Ukhamasti jan uñtʼat jaqejja, kuntï discipulonakajj amuyapkäna uk cheqañchänwa, jan ajjsarasaw jupanakar akham säna: “¡Jan amuytʼasiri, jan creyiñ munir jaqenaka! ¡Janiw jumanakajj profetanakan arunakapsa creyipktati! ¿Janit Criston ukanak tʼaqesiñapajj wakiskänjja, ukhamat jupar jachʼañchasiñapataki?” sasa (Lucas 24:25, 26). Ukatjja kawkïr Qellqatanakatejj Cristot parlki ukanakampiw qhanañcharakïna.

Qheparusti kimspachaniw Emaús markar jakʼachasisipkäna. Discipulonakajj wal uka jaqen arunakap istʼañ munapjjäna, ukatwa akham ruwtʼapjjäna: “Nanakamp chik akan quedasim, wali jaypʼöjjewa, niyaw arumäjjani” sasa. Jupajj iyaw sasaw ukan quedasïna, cena manqʼasipjjarakïna. Jan uñtʼat jaqejja Diosar yuspärasaw tʼantʼa pachjasajj jupanakar churäna, ukhakiw jupanakajj Jesusätap amuyasipjjäna, ukampis jupajj chhaqtawayjjänwa (Lucas 24:29-31). Ukhamasti jupanakajj janiw Jesusan jakaskatapat pächasjjapjjänti.

Uka pä discipulonakajj wali kusisitapuniw uk pasipan parlasipjjäna, akham sasa: “Kunapachatï jupajj thak jutkasin parlkistäna, Qellqatanakatsa qhanañchkistäna ukhajja, ¿janit chuymasajj nakkistänjja?” sasa (Lucas 24:32). Jerusalenar kuttʼasajja, apostolonakampiru mayni discipulonakampiruw jikjjatapjjäna. Cleopasampi mayni discipulompejj Jesusat janïra yatiyapkäna ukhaw yaqhanakajj akham sapjjäna: “¡Cheqapuniw Tatitojj jaktayatäjjatayna, Simonarus uñstataynawa!” sasa (Lucas 24:34). Ukatjja kunjamsa Jesusajj jupanakar uñstarakïna ukwa yatiyapjjäna. Jïsa, jupanakas Jesusaruw uñjapjjarakïna.

Jichhasti Jesusajj taqeniruw mä utan uñstäna. Ukampis ukajj janiw cheqaw sañjamäkänti, jupanakajj judionakar ajjsarañat wali llawintasitäsipkänwa. Ukhampachasa Jesusajj jupanak taypin saytʼatäskänwa, sumatakwa sarakïna: “Sumankañajj jumanakan utjpan” sasa. Jupanakajj wal sustjasipjjäna, nayra tiemponjamaw “mä espiriturus uñjapkaspa ukham amuyapjjäna” (Lucas 24:36, 37; Mateo 14:25-27).

Jesusajj jan mä espiritütap uñachtʼayañatakejja amparanakap kayunakap uñachtʼayäna, ukhamat jañchi cuerponïtap amuyapjjañapataki, akham sasa: “¿Kunatsa sustjasipjjta, kunatsa chuymanakaman pächasipjjta? Amparanaksa kayunaksa uñjapjjeta, nayätwa. Llamktʼapjjeta, uñjapjjam, mä espiritojj janiw jañchinïkiti ni chʼakhanïkisa. Kunjamtï jumanakajj uñjapktajja, nayajj jañchinïtwa, chʼakhanirakïtwa” sasa (Lucas 24:36-39). Jupanakajj wal kusisipjjäna, musparapjjarakïnwa, janiw cheqaw sañjamäkänti.

Jesusapunïskatap creyipjjañapatakejj akham sasaw jupanakar jisktʼäna: “¿Janit kuna manqʼas jumanakan utjki?” sasa. Mä chawlla kanka katoqtʼasisajj manqtʼasïnwa. Ukat akham sasaw sarakïna: “Jumanakamp chikäskayäta ukhajja, taqe kunanakatï Moisesan Leyipansa, Profetanakan Qellqatanakapansa, Salmonakansa nayjjat qellqatäki ukanakajj phoqasiñapapuniwa sasaw nayajj parlapjjayäsmajja” sasa (Lucas 24:41-44).

Jesusajj Cleopasampiru jupamp chik sarkäna uka discipulompirojj Qellqatanak amuyapjjañapatakiw yanaptʼäna. Jichhajja khitinakatï tantachtʼatäsipkäna ukanakaruw yanaptʼarakïna. Jupanakarojj sänwa: “Qellqatanakajj akham siwa, Cristojj tʼaqesiñapänwa, kimsïr urunwa jiwatanak taypit jaktaniñaparakïna. Ukatsti sutipjjaruw Jerusalenat qalltasin taqe markanakan arrepentisiñat yatiyasiñapäna, ukhamat perdonatäpjjañapataki. Ukatjja jumanakaw ukanakat qhanañchapjjäta” sasa (Lucas 24:46-48).

Tomás apostolojj janiw ukan tantachasitäkänti, kunatsa jan ukankkäna uk janiw yatktanti. Jutïr urunakanjja, wali kusisitaw mayninakajj “¡Tatituruw uñjapjjta!” sasin yatiyapjjäna. Tomasejj sarakïnwa: “Janitï nayajj clavonakan pʼiyjat amparanakap uñjkä, janirak clavonakan pʼiyjatäki ukar lukʼanaj loqantkä, janirak chʼillaparus amparajamp loqantkä ukhajja, janipuniw creykäti” sasa (Juan 20:25).

Kimsaqallqo urunak qhepatjja, discipulonakajj mayampiw punku llawintasisin tantachasipjjäna. Jichhajj Tomasejj ukankjjänwa. Jesusajj jañchi cuerponiw jupanak taypir saytʼasïna, akham sasaw aruntarakïna: “Sumankañajj jumanakan utjpan” sasa. Tomás apostolon ladopar saytʼasajja, juparojj akham sänwa: “Lukʼanamampi amparanakaj llamktʼita, amparanakajsa uñjarakita, amparamampi chʼillajar loqantam. Jan jukʼamp pächasimti, jan ukasti creyiñamawa” sasa. Tomasejj jachʼat akham säna: “¡Nayan Tatituja, nayan Diosaja!” sasa (Juan 20:26-28). Jichhajj janiw pächasjjänti, jupatakisti Jesusajj chʼamani mä espiritöjjänwa, Jehová Diosan khitanitarakïnwa.

Jesusasti “¿uñjatam laykukit jumajj creyta?” sasaw jupar säna. Ukatjja “khitinakatï jan uñjkasin creyipki ukanakajj kusisipjjpan” sasaw sarakïna (Juan 20:29).