1. ¿Kun yatiñatakis profecianakajj yanaptʼistu?

KUNAS akat mä jukʼarojj Diosan markapar pasani ukajj Biblian qellqatawa. Profecianakajja kunanakas akat mä jukʼarojj pasani uk yatiñatakiw yanaptʼistu, kunatï paskani ukajj jan walinakanwa uñjasiyistani. Oraqpachan wali chʼamani yaqhep gobiernonakajj kunanaksa lurapjjani uk amuyañatakiw mä profeciajj yanaptʼistu. Uka profeciajj Daniel libron 11 capitulopan qellqatawa. Ukanjja, norte toqenkir reyimpita sur toqenkir reyimpitwa parli, panipajj wal chʼajjwapjjaraki. Uka profeciat niya taqpachaw phoqasiwayjje. Ukhamasti faltki ukajj phoqasirakiniwa, janiw ukat pächasktanti.

2. Génesis 3:15; Apocalipsis 11:7; 12:17 textonakarjamajja, ¿Daniel libron qellqata profecía sum amuyañatakejj kunanaksa amtañasa?

² Daniel capítulo 11 ukan qellqata profecía sum amuyañatakejja, kawkïr gobiernonakatï Diosan markapar jan waltʼayapkäna uka gobiernonakat parlaskatapwa amtañasa. Diosan markapajj oraqpachan utjki uka jaqenakat sipansa jukʼanikïpjjewa, ¿ukhamajj kunatsa uka gobiernonakajj Diosan markapar jan waltʼayañ munapjje? Supayampi jupan apnaqata akapachampejja, Jehová Diosana Jesusana servirinakapar chhaqtayañwa munapjje (Génesis 3:15; Apocalipsis 11:7; 12:17 liytʼañataki). Daniel libron qellqata profeciajja, Diosan Arupankir mayni profecianakampejj igualäñapawa. Cheqas Daniel libronkir profecía sum amuyañatakejja, Bibliankir yaqha profecianakampiw igualtʼayañasa.

3. 1) ¿Kunsa aka yatichäwin yatjjataskañäni? 2) ¿Kunsa akjjar jutki uka yatichäwin yatjjataskarakiñäni?

³ Aka yatichäwinjja, Daniel 11:25-39 textotwa yatjjataskañäni. 1870 marat 1991 marakamajj kawkïr markanakas norte toqenkiri ukhamarak sur toqenkiri reyinakäpjjäna ukwa yatjjataskarakiñäni. Ukatjja Danielan profeciapat mä cheqa jan nayrjam amuyjjañatakejj kuna razonanakas utji ukwa uñjarakiñäni. Jutkani uka yatichäwinsti, Daniel 11:40-12:1 textonakatwa yatjjatañäni. Uka textonakan qellqata profeciajja, 1991 marat Armagedón guerrakamajj kunanakas pasani uka toqetwa parli, ukanakwa sumpach qhanañchaskañäni. Aka yatichäwimpi jutïr yatichäwimp yatjjatkasajja, “Tukuya tiempon jupanakkam chʼajjwir pä reyinaka” sat recuadro uñjjattʼañaw wakisini. Ukampis nayraqatajja, uka profeciajj pä reyinakat parlki uka reyinakajj kawkïr markanakäpjjänsa uk yatiñaw wakisi.

¿NORTENKIR REYISA SUR TOQENKIR REYISA KHITINAKÄPJJES UK KUNJAMATSA YATSNA?

4. Kawkïr markanakas norte toqenkiri ukhamarak sur toqenkiri reyinakäpjje uk yatiñatakejja, ¿kuna kimsa toqet amuytʼañas yanaptʼistu?

⁴ Qalltanjja, Israel markat norte cheqankir markanak apnaqkäna uka reyiruw ‘norte toqenkir rey’ sasïna, sur cheqankir markanak apnaqkäna uka reyirusti ‘sur toqenkir rey’ sasirakïnwa. ¿Kunjamatsa uk yattanjja? Mä angelajj akham sasaw Daniel profetar säna: “Kunatejj akat qheparu marka[ma]mpejj paskani ukanak qhanañchiriw jutsma” sasa (Dan. 10:14). 33 mara Pentecostés urukamajja, Israel markaw Diosan markapänjja. Ukampis uka qhepatjja, Jesusat jan jitheqtiri discipulonakapaw Diosan markapäjjäna. Ukhamasti Daniel capítulo 11 ukan qellqata profeciajj janiw israelitanakat parlkiti, jan ukasti Criston discipulonakapatwa parlaski (Hech. 2:1-4; Rom. 9:6-8; Gál. 6:15, 16). Ukhamarusa norte toqenkir reyejj janiw mä markakïkänti, tiempompejj yaqha markanakaw norte toqenkir reyïpjjäna, sur toqenkir reyimpejj ukhamarakiw pasäna. Ukhamäkchïnsa uka reyinakajj aka kimsa toqenakan igualakïpjjänwa: Maya, Diosan markapar uñisipjjapunïnwa. Paya, Diosan markapar tʼaqesiyasaw cheqpach Diosar uñisipjjatap uñachtʼayapjjäna. Kimsa, uka reyinakajj wali chʼamani markäñatakiw jupanakkam nuwasipjjäna.

5. Khä 100 marat 1870 marakamajja, norte toqenkir reyimpi sur toqenkir reyimpejj utjänti janicha uk qhanañchtʼam.

⁵ Khä 100 mara qhepatjja, cheqpach cristianonakan congregacionaparojj falso cristianonakaw mantapjjäna. Jupanakajja, Diosan Arup qʼewjayasajj kʼari yatichäwinakwa yatichapjjäna, cheqa yatichäwinakjja imantapjjarakïnwa. Uka tiempot 1870 marakamajja, Diosar serviri mä organizacionajj janiw utjkänti. Falso cristianonakajj jan wali qorar uñtasitaw jiltapjjäna, ukatwa khitinakas cheqpach cristianonakäpjje uk yatiñajj chʼamäna (Mat. 13:36-43). ¿Kunatsa uk yatiñajj wali wakiskirejja? 100 marat 1870 marakam utjkäna uka gobiernonakat janiw mayas norte toqenkiri jan ukajj sur toqenkiri reyinakäpkaspänti. Uka maranakanjja, Diosar serviri mä organizacionajj janiw utjkänti, ukhamajj janiw Diosan markapar jan waltʼayapkaspänti.b Norte toqenkir reyisa sur toqenkir reyisa, 1870 mara qhepatwa uñstapjjäna. ¿Kunatsa ukham sistanjja?

6. ¿Kunapachas Diosan markapajj wasitat uñstäna?

⁶ Diosan markapajja, 1870 marat aksaruw wasitat uñstäna. Uka maranjja, Charles Russell jilatampi yaqha jilatanakampiw Bibliat yatjjatañ qalltapjjäna. Profeciajj siskäna ukarjamajja, jupanakajj mä khitar uñtasitaw ‘thaki wakichapjjäna’ ukhamat Cristojj Reyjam apnaqañapataki (Mal. 3:1). Ukhamasti, Jehová Diosan cheqpach servirinakapajj khitinakäpjjänsa ukajj qhanaw amuyasjjäna. Uka tiemponjja ¿Diosan markapar jan waltʼayiri gobiernojj utjpachänti? Uk yatjjatañäni.

¿KAWKÏR MARKAS SUR TOQENKIR REYEJJA?

7. Primera Guerra Mundial qalltjjäna ukhakamajja, ¿kawkïr markas sur toqenkir reyïna?

⁷ Gran Bretaña markajja, 1870 maratakejj walja markanakwa apnaqjjäna, ejercitopas suma wakichtʼatarakïnwa. Daniel profetajja, uka markajj kimsa wajjranakar atipjiri mä jiskʼa wajjrampi sasiwa sasaw säna, uka kimsa wajjranakajja Francia, España, Países Bajos uka markanakänwa (Dan. 7:7, 8). Primera Guerra Mundial qalltjjäna ukhakamajja, Gran Bretaña markaw sur toqenkir reyïna. Uka tiempotakejja, Estados Unidos markajj taqpach markanakat sipansa wali qollqeni markänwa, Gran Bretaña markampiw mayachtʼasirakïna.

8. ¿Qhepa urunakan kawkïr markas sur toqenkir reyejja?

⁸ Primera Guerra Mundial tiemponjja, Estados Unidos markampi Gran Bretaña markampejj ejercitonakapwa mayachtʼapjjäna. Ukhamatwa uka pä markajj wali chʼamani markanakar tukupjjäna. Kunjamtï Daniel profetajj siskänjja, “mä jachʼa chʼamani ejercitompi, ukhamaraki walja soldadonakamp[wa]” tantachthapipjjäna (Dan. 11:25). Aka qhepa urunakanjja, Estados Unidos markampi Gran Bretaña markampiw sur toqenkir reyïpjje.c Ukampis ¿kawkïr markas norte toqenkir reyïnjja?

¿KHITIS NORTE TOQENKIR REYEJJA?

9. 1) ¿Kunapachas norte toqenkir reyejj mayamp uñstäna? 2) ¿Kunjamsa Daniel 11:25 textojj phoqasïna?

⁹ Norte toqenkir reyejja, 1871 maranwa mayamp uñstäna. Uka mara nayrakiw Russell jilatampi yaqha jilatanakampejj Bibliat yatjjatañatak mä grupo uttʼayapjjäna. 1871 maranjja, Otto von Bismarck chachajj walja markanakwa mayachtʼäna, ukhamatwa Imperio alemanajj wali chʼamanir tukurakïna. Guillermo I (primero) chachaw uka markan reyipäjjäna, uka gobierno pʼeqtʼañapatakejj Bismarck sat chacharuw uttʼayarakïna.d Mä qhawqha maranak qhepatjja, Alemaniajj wali chʼamani markäjjänwa. África toqenkir markanaka Pacífico toqenkir markanakwa apnaqäna, ukatjja Gran Bretaña wali chʼamani marka contraw saytʼasirakïna (Daniel 11:25 liytʼañataki). Alemaniajj suma wakichtʼata mä jachʼa ejercitonëjjänwa, ukampis Gran Bretaña markaw jukʼamp jachʼa ejercitonïna. Primera Guerra Mundial ukanjja, Alemania markajj uka ejercitopampiw enemigonakap contra nuwasïna.

10. ¿Kunjamsa Daniel 11:25b, 26 textonkir profeciajj phoqasïna?

¹⁰ Ukatjja, Daniel profetajj kunas Alemaniampiru jachʼa ejercitopampirojj pasani ukwa arsurakïna. Norte toqenkir reyejj aynachtʼaniwa sarakïnwa. ¿Kunatsa aynachtʼani? Profeciajj akham sänwa: “Jupajj [engañataw] uñjasini [...]. Khitinakarutejj jupajj pachpa mesapan manqʼañataki jawsaykäna, ukanakaw juparojj aynachtʼayapjjani” sasa (Dan. 11:25b, 26a). Daniel tiemponjja, reyin yanapirinakapakiw reyin ‘mesapat manqʼapjjerïna’ (Dan. 1:5). ¿Uka profeciajj khitinakatsa parlaskäna? Imperio alemanan wali munañani jaqenakatwa parlaskäna, jupanakat yaqhepajj militaranakäpjjänwa, reyin yanapirinakapäpjjarakïnwa. Kuntï uka jaqenakajj lurapkäna ukajja, tiempompejj reyiruw aynachtʼayäna ukhamatwa Alemaniajj jan pachpa chʼamanëjjänti.e Profeciajja, ‘Alemaniajj ayñachtʼaniwa’ sasakejj janiw siskänti, jan ukasti sur toqenkir reyimpi guerrar mantasajj kunas pasani ukwa qhanañcharakïna. Nortenkir reyit akham sänwa: “Ejercitopasti tʼunjataw uñjasirakini, soldadonakapatsti waljanirakiw jiwarapjjani” sasa (Dan. 11:26b). Kunjamtï profeciajj siskänjja, Primera Guerra Mundial ukanjja alemán ejercitojj atipjataw uñjasïna, waljaniw jiwarapjjarakïna. Uka guerranpunwa walja jaqenakajj jiwarapjjäna.

11. Primera Guerra Mundial nayrajja, ¿kunsa norte toqenkir reyimpi sur toqenkir reyimpejj lurapjjäna?

¹¹ Primera Guerra Mundial nayrajja, kunsa norte toqenkir reyimpi sur toqenkir reyimpejj lurapjjañapäna uka toqet akham sasaw Daniel profetajj säna: “Panpacha reyiw purapat ñanqha lurasiña amtäwimpikipuni pachpa mesaru qontʼasipjjani” sasa (Dan. 11:27, 28). Ukatjja, norte toqenkir reyejj ‘wali utjirinakanïniwa’ sasaw sarakïna. Ukajj ukhamapuniw pasäna. Alemaniampi Gran Bretaña markampejj suman jakasiñatwa parlapjjäna, ukampis ukajj kʼarïnwa. ¿Kunatsa? 1914 maranwa guerrajj qalltäna. Uka marat nayra maranakanjja, Alemaniajj wali qollqeni markäjjänwa, mä markakiw jupat sipansa jukʼamp qollqenïna. Kunjamtï Daniel 11:29, 30a texton qellqata profeciajj siskänjja, Alemaniajj sur toqenkir rey contraw nuwasïna, ukampis atipjataw uñjasïna.

PANPACH REYIW DIOSAN MARKAPAR JAN WALTʼAYAPJJE

12. Primera Guerra Mundialanjja, ¿kunsa norte toqenkir reyisa sur toqenkir reyisa lurapjjäna?

¹² Panpacha reyinakaw 1914 marat aksarojj jukʼamp chʼajjwapjjäna, Diosan markaparus jukʼampwa jan waltʼayapjjäna. Sañäni, Primera Guerra Mundial ukanjja, Diosan servirinakapajj janiw guerrar sarañ munapkänti, ukatwa Alemaniasa Gran Bretañasa jupanakar jan waltʼayañatak arknaqapjjäna. Estados Unidos markansti Diosan markapar pʼeqtʼapkäna ukanakaruw carcelar llawintapjjarakïna. Ukajj Apocalipsis 11:7-10 texton qellqata profeciarjamaw phoqasïna.

13. Norte toqenkir reyejj ¿kunsa 1933 marat aksarusa Segunda Guerra Mundialansa luräna?

¹³ Norte toqenkir reyejja 1933 maratwa Diosan markaparojj jan waltʼayäna, yamas Segunda Guerra Mundial tiemponjja jukʼampiw Diosan markapar jan sinttʼasis tʼaqesiyäna. Nazi partidojj Alemanian apnaqjjäna ukhajja, Hitler chachampi jupar yanapirinakampejj predicacionwa jarkʼapjjäna. Mä 1.500 Diosan servirinakaparuw jiwarayapjjäna. Walja waranqaniruw campos de concentración ukanakar apayapjjarakïna. Ukajj Daniel profetan arunakaparjamaw phoqasïna. Nortenkir reyejj ‘templorojj ñanqhachaniwa’, ‘sapa uru sacrificio loqtasiñäki uksti suytʼayarakiniwa’ sasaw Danielajj säna, ukham sasinjja, predicación jarkʼapjjaniwa sañwa munaskäna (Dan. 11:30b, 31a). Nazi partido pʼeqtʼiri Hitler chachajja, ‘Alemaniat Diosan markap chhaqtayawa’ sasaw juramentomp arsüna.

YAQHA REYIW NORTE TOQENKIR REYËJJÄNA

14. Segunda Guerra Mundial qhepatjja, ¿khitis norte toqenkir reyëjjäna? Uk qhanañchtʼam.

¹⁴ Segunda Guerra Mundial pasatatjja, Unión Soviética comunista gobiernow Alemaniat walja markanak aparäna. Ukhamatwa uka gobiernojj norte toqenkir reyëjjäna. Unión Soviética gobiernojja, nazi partidonkirinakjamarakiw khitinakatï markar istʼañat sipansa Diosar adorapkäna ukanakar jan waltʼayapjjäna.

15. Segunda Guerra Mundial qhepatjja, ¿kunsa norte toqenkir reyejj luräna?

¹⁵ Segunda Guerra Mundialajj tukuyjjäna uka qhepatjja, norte toqenkir machaq reyejja, mä arun Unión Sovieticampi jupar yanapiri markanakampejj Diosan markaparuw jan waltʼayapjjäna. Apocalipsis 12:15-17 textojja, ukham jan waltʼayapjjatapajj mä “jawirar” uñtasitawa sarakiwa. Kunjamtï uka profeciajj siskänjja, norte toqenkir reyejj predicación jarkʼäna, Diosan servirinakapat walja waranqaniruw yaqha markar apayarakïna. Cheqas qhepa urunakanjja, norte toqenkir reyejj jukʼampiw Diosan markapar jan waltʼayañatak arknaqäna, ukampis janipuniw predicación chhaqtaykänti.f

16. ¿Kunjamsa Unión Sovieticajj Daniel 11:37-39 texton qellqat profecía phoqäna?

¹⁶ (Daniel 11:37-39 liytʼañataki). Uka texton qellqata profeciarjamajja, uka reyejj janiw ‘nayra awkinakapan Diosaparojj’ respeto uñachtʼaykänti. ¿Kunjamatsa uk luräna? Unión Sovieticajj religionanak qʼal chhaqtayañwa munäna. Ukatwa mä ley apsüna, uka leyirjamaw ‘Diosajj janiw utjkiti’ sasin escuelanakan yatichjjapjjäna. Unión Sovieticajja, ¿kunjamsa ‘chʼam churir satäki uka diosar’ jachʼañchäna? Ejercitop jukʼamp chʼamanir tukuyañatakisa armas nucleares ukanak lurayañatakis walja qollqwa gastäna, ukhamat wali chʼamanïñataki. Tiempompejja, norte toqenkir reyisa sur toqenkir reyisa walja millón jaqenak jiwarayañatakejj walja armamentonakanëjjapjjänwa.

PÄ ENEMIGONAKAW MAYACHTʼASIPJJE

17. ¿‘Taqe kun tukjir mä ajjtaskañäki’ ukajj kunasa?

¹⁷ Norte toqenkir reyimpi sur toqenkir reyimpejja, mayachtʼasisaw ‘taqe kun tukjir mä ajjtaskañ’ uñstayapjjäna (Dan. 11:31, TNM). Uka ‘ajjtaskañajja’ Organización de las Naciones Unidas ukawa.

18. ¿Kunatsa Organización de las Naciones Unidas ukarojj ‘taqe kun tukjir ajjtaskañäki’ ukawa sasin Bibliajj qhanañchi?

¹⁸ Profeciarjamajja, ¿kunatsa Organización de las Naciones Unidas ukarojj ‘ajjtaskañäki’ ukawa sasin sispacha? Uka organizacionajja, ‘oraqpachan sumankañwa utjayäjja’ sasaw arsu, ukampis Diosan Reinopakiw uk luraspa. ¿Kunatsa ‘taqe kun tukjiri’ sasin saraki? Kunattejj uka organizacionaw taqpach falso religionanakar tukjani (“Tukuya tiempon jupanakkam chʼajjwir pä reyinaka” sat recuadro uñjjattʼäta).

¿KUNATSA TAQE UKANAK YATIÑAJJ WALI WAKISKIRI?

19, 20. 1) ¿Kunatsa Daniel profetan profeciap yatjjatañajj wali wakiskiri? 2) ¿Kunsa akjjar jutki uka yatichäwin yatjjataskañäni?

¹⁹ Taqe kunatï nayrajj pasawayki ukanak mayampi yatjjatañajj wali wakiskiriwa, ¿kunatsa? Kuntï Daniel profetajj norte toqenkir reyimpita sur toqenkir reyimpita arskäna ukajja, 1870 marat 1991 marakamaw jilaparte phoqasiwayjje. Ukhamasti uka profeciat faltki ukajj phoqasirakiniwa, ukar confiyañatakiw ukanakat yatjjatañajj yanaptʼistu.

²⁰ Unión Soviética ukajj 1991 maranwa chhaqtawayjje. Ukhamajj ¿jichha tiempon khitis norte toqenkir reyejja? Akjjar jutki uka yatichäwinwa uka jisktʼar qhanañchaskañäni.

1, 2. ¿Kuna toqenakatsa aka yatichäwin yatjjataskañäni?

AKAPACHAN qhep qhepa urunakapanwa jakasktanjja sañatakejj nayrat sipansa walja pruebanakaw utji. Jehová Diosampi Jesucristompejja, niyaw Reino contra saytʼir gobiernonakarojj qʼal tukjapjjani. Janïr uk paskipanjja, norte toqenkir reyimpi sur toqenkir reyimpejj jupanakkamaw chʼajjwasipkakini, Diosan markaparus jan waltʼayasipkakiniwa.

² Aka yatichäwinjja, Daniel 11:40-12:1 textonakankir profecianakatwa yatjjataskañäni. Jichhürunakan kawkïr markanakas norte toqenkir reyejja ukwa yatjjatarakiñäni, ukatsti ‘Jehová Diosaw jan walinakan uñjaskañäni ukhajj yanaptʼistani’ sasin kunatsa confiysna ukwa yatjjataskarakiñäni.

NORTE TOQENKIR REYIW MAYAMP UÑSTI

3, 4. ¿Khitis jichhajj norte toqenkir reyëjje, kunatsa ukham sistanjja?

³ Unión Soviética ukajj 1991 maranwa chhaqtjjäna, qhepatjja uka gobiernompi apnaqata markanakan jakiri Testigonakajj “mä jukʼa yanapwa” katoqapjjäna, mä arunjja librew Diosar sirvjjapjjäna (Dan. 11:34). Unión Sovieticampi apnaqata markanakanjja, jilat kullakanakajj jan khitin jarkʼataw predikjjapjjäna, ukhamatwa mä jukʼa tiemponak walja waranqa jaqenakajj Diosar serviñ qalltapjjäna. Ukampis tiempompejja Rusia markampi jupar yanapiri markanakampiw norte toqenkir reyëjjapjje. Kunjamtï nayrïr yatichäwin yatjjataniwayktanjja, mä markajj norte toqenkir reyïñapataki jan ukajj sur toqenkir reyïñapatakejj aka kimsanakwa luri: 1) Diosan markaparuw uñisi, 2) luratanakapampiw Jehová Diosampiru markapampiru uñisitap uñachtʼayi, 3) jupanakkamaw atipasiñ munapjje.

⁴ ¿Kunatsa Rusia markampi jupar yanapiri markanakampiw norte toqenkir reyejja sasin sistanjja? Kimsa toqet uk uñjañäni: 1) Uka markampi apnaqata lugaranakanjja walja waranqa jilat kullakanakaruw jan waltʼayañatak arknaqapjje, predicañsa jarkʼapjjaraki. 2) Luratanakapampiw Jehová Diosampiru markapampiru uñisipjjatap uñachtʼayapjje. 3) Gran Bretaña, Estados Unidos markanakajj sur toqenkir reyïpjjewa, jupanakar atipañatakiw norte toqenkir reyejj wal chʼamachasiraki. Kunsa Rusia markampi jupar yanapiri markanakampejj lurapjje, kunjamsa uka luratanakapajj norte toqenkir reyïpjjatap uñachtʼayi ukwa yatjjatañäni.

PÄ REYINAKAJJ CHʼAJJWASIPKAKIWA

5. ¿Kuna tiempotsa Daniel 11:40-43 textonkir profeciajj parlaski, kunas uka tiempon pasani?

⁵ (Daniel 11:40-43b liytʼañataki). Uka texton qellqat profeciajja, kunas tukuya tiempon pasani uka toqetwa parlaski. Uka versiculonakanjja norte toqenkir reyimpi sur toqenkir reyimpi chʼajjwapki uka toqetwa jukʼamp parli. Daniel profetajj akham sarakïnwa: ‘Tukuy tiemponsti sur toqenkir reyejj mä jan waltʼäwinwa norte toqenkir reyimpejj uñjasini’ sasa (Dan. 11:40, TNM).

6. ¿Kunjamatsa norte toqenkir reyimpi sur toqenkir reyimpi chʼajjwasipkakitap yattanjja?

⁶ Norte toqenkir reyimpi sur toqenkir reyimpejja, oraqpach apnaqañatakiw jupanakkam chʼajjwapjje. Sañäni, Segunda Guerra Mundial qhepatjja Unión Sovieticampi jupar yanapiri markanakampejj Europa cheqankir markanakat jilaparte apnaqañwa qalltapjjäna. Ukatwa sur toqenkir reyejj yaqha markanakampi mayachtʼasisajj ejercitop jachʼaptayäna, ukajj Organización del Tratado del Atlántico Norte (OTAN) satawa. Uka pä reyinakajja wali chʼamani ejercitonïñatakiw walja qollqe gastapjjäna. Ukatsti África, Asia, América Latina cheqanakan guerrajj utjkäna ukhajja, jupanakar yanapiri markanakaruw uka pä reyejj yanapapjjäna, ukhamatwa uka pä reyejj guerrankapjjarakïna. Aka qhepa maranakanjja, Rusia markampi jupar yanapir markanakampejj oraqpachan wali chʼamaniruw tukuwayapjje. Ukhamarakiw sur toqenkir reyimpejj computadoranak taypejj guerrankapjje. ‘Computadoranak toqew qollqe aptʼasiyañ munitu, gobiernojar aynachtʼayañwa munaraki’ sasaw uka pä reyinakajj jupanakkam juchañchasipjje. Ukhamarusa kunjamtï Daniel profetajj siskänjja, norte toqenkir reyejj Diosan markapar jan waltʼayaskakiwa (Dan. 11:41).

NORTE TOQENKIR REYEJJ ‘SUMA ORAQERUW’ MANTI

7. ¿Kunas Suma Oraqejja?

⁷ Daniel 11:41 textonjja, norte toqenkir reyejj ‘Suma Oraqeruw’ manti siwa. ¿Kunas Suma Oraqejja? Nayra tiemponjja, Israel markaw “taqe markanakat sipansa jukʼampi suma” oraqe sasin uñtʼatäna (Ezeq. 20:6). Uka markanwa Jehová Diosar adorasïna, ukatwa Suma Oraqe satänjja. Ukampis 33 mara Pentecostés urut aksarojja, uka Suma Oraqejj janiw mä lugaräjjänti. ¿Kunatsa? Jehová Diosan markapajj janiw mä lugarankkiti, jan ukasti oraqpachankiwa. Ukhamajja “Suma Oraqe” sasajj kunanaktï Diosan markapajj lurki uka toqetwa parlaski, mä arunjja, predicacionata tantachäwinakata, yaqha ukhamanakatwa parlaski.

8. ¿Kunjamatsa nortenkir reyejj Suma Oraqer mantäna?

⁸ Qhepa urunakanjja norte toqenkir reyejj walja kutiw Suma Oraqer mantawayi. Sañäni, Alemaniankir nazi partidojj norte toqenkir reyïkäna ukhajja, yamas Segunda Guerra Mundial utjkäna ukhajja, Diosan servirinakapar arknaqasa jiwarayasaw Suma Oraqer mantäna. Segunda Guerra Mundial qhepatjja Unión Sovieticaw norte toqenkir reyëjjäna, jupajj Diosan markapar arknaqasa, jupanakar yaqha markar apayasaw Suma Oraqer mantarakïna.

9. Aka qhepa urunakanjja, ¿kunjamsa Rusia markampi jupar yanapiri markanakampejj Suma Oraqer mantapjje?

⁹ Aka qhepa maranakanjja, Rusia markampi jupar yanapir markanakampejj Suma Oraqeruw mantapjjaraki. ¿Kunjamsa? 2017 maranwa Rusia markajj predicañsa tantachasiñsa Jehová Diosan Testigonakapar jarkʼañ qalltawayi, yaqhep jilat kullakanakarus carcelaruw llawinti. Bibliat apstʼat qellqatanaksa, ukhamarak Machaq Mundon Jakirinakataki (Traducción del Nuevo Mundo) sat Biblia jarkʼawayi. Ukatsti Rusia markankir sucursalsa, Tantachasiñ Utanaksa, Salón de Asambleas sat utanaksa katuntasipjjewa. Ukanak uñjasawa, Oraqpachan Jilïr Irpirinakajj ‘Rusia markampi jupar yanapir markanakampejj norte toqenkir reyïpjjewa’ sasin 2018 maran sapjjäna. Jehová Diosan servirinakapajj janiw gobiernonak contrajj saytʼktanti, janirakiw yaqha gobierno utjañapatakis apoyktanti, ni gobiernojj jan wal luristu ukhas ukham lurktanti. Jan ukasti, Biblian utjki uka ewjjtʼar istʼasaw “reyinakataki, taqe apnaqerinakataki” Diosat mayiraptanjja, yamas uka gobiernonakajj Diosar serviñ jarkʼapjjaniti janicha uk amtañampïsipki ukhajja jukʼampwa jupanakatak mayiraptanjja (1 Tim. 2:1, 2).

¿NORTE TOQENKIR REYEJJ SUR TOQENKIR REYIROJJ CHHAQTAYANITI?

10. ¿Norte toqenkir reyejj sur toqenkir reyir chhaqtayaniti janicha uk yatiñatakejj kunas yanaptʼistu?

¹⁰ Daniel 11:40-45 texton utjki uka profeciajj norte toqenkir reyitwa jukʼamp parli. Ukhamasti ¿‘norte toqenkir reyiw sur toqenkir reyir chhaqtayani’ sañti muntanjja? Janiwa. Kunapachatï Jehová Diosampi Jesusampejj taqe aka oraqenkir gobiernonakar Armagedón guerran tukjkani ukhakamajja, sur toqenkir reyejj utjaskakiniwa (Apoc. 19:20). ¿Kunjamatsa uk yattanjja? Daniel, Apocalipsis libronakan qellqata profecianakajj kamsisa uk uñjañäni.

11. ¿Daniel 2:43-45 texton qellqata arunakajj kamsañsa muni? (Nayrïr paginankir dibujo uñjjattʼäta).

¹¹ (Daniel 2:43-45 liytʼañataki). Daniel profetajj kunayman metalanakat lurata mä estatua jaqetwa parli. Uka estatuan sapa partepajja, Diosan markapar jan waltʼayiri mä gobiernompi sasiwa. Hierrompita ñeqʼempita lurata kayunakapajja, qhepïr gobiernompi sasiwa, uka gobiernojj Gran Bretaña ukhamarak Estados Unidos markanakawa. Profeciarjamajja, Diosan Reinopajj aka oraqenkir taqe gobiernonakar chhaqtaykani ukhakamajja, Gran Bretaña ukhamarak Estados Unidos wali chʼamani markanakajj utjaskakiniwa.

12. ¿Salvaje animalan paqallqöri pʼeqepajj khitimpi sasisa, kunatsa uk yatiñajj wali wakiskirejja?

¹² Apóstol Juanajja, Diosan markapar jan waltʼayapkäna uka wali chʼamani gobiernonakatwa parlaraki. Profeciarjamajja, uka gobiernonakajj paqallqo pʼeqeni mä salvaje animalampi sasiwa. Paqallqöri pʼeqepajj Gran Bretaña ukhamarak Estados Unidos markanakawa. Uk yatiñajj wali wakiskiriwa, kunattejj janiw yaqha pʼeqempejj utj-jjeti. Cristompi alajjpachankir ejercitonakapampejj salvaje animalampiru paqallqöri pʼeqepampiru tukjapkani ukhakamajja, uka paqallqöri pʼeqejj gobernaskakiniwa (Apoc. 13:1, 2; 17:13, 14).c

¿KUNSA AKAT MÄ JUKʼAROJJ NORTE TOQENKIR REYEJJ LURANI?

13, 14. ¿Khitis “Magog markankiri Gog” sasin uñtʼatajja, kunatsa Diosan markapar chhaqtayañ munaspa?

¹³ Ezequiel libronkir mä profeciajja, qhepa urunakan kunas norte toqenkir reyirusa sur toqenkir reyirusa pasaspa uk amuyañatakiw yanaptʼistu. Amuyatajja, Ezequiel 38:10-23; Daniel 2:43-45; 11:44-12:1; Apocalipsis 16:13-16, 21 textonakankir profecianakajj mä pachpa tiempota, ukhamarak mä pachpa toqetakwa parlasipki. Ukhamächi ukajj akanak pasañapwa suysna.

¹⁴ Wali tʼaqesiñ tiempojj qalltkani ukat qheparojja, ‘oraqpachankir reyinakajj’ mayachtʼasipjjaniwa (Apoc. 16:13, 14; 19:19). Bibliarjamajja uka mayachtʼat markanakajj ‘Magog markankir Gog’ sasin uñtʼatawa (Ezeq. 38:2). Uka mayachtʼat markanakajj Diosan markap contraw sartapjjani, qʼal chhaqtayañwa yantʼapjjarakini. ¿Kunatsa ukham lurañ munapjjpachäni? Uka toqet parlasajja, apóstol Juanajj mä visionanwa Diosan enemigonakapjjar wali jachʼa granizonak purintir uñjäna. Uka jachʼa granizonakajja, inas Testigonakajj Jehová Diosan juchañchir arunakap yatiyapkani ukächini. Magog markankir Gog sasin uñtʼatäki ukajja, inas juchañchir arunak istʼasajj Diosan markapar qʼal chhaqtayañatak sartchini (Apoc. 16:21).

15, 16. 1) ¿Kuna toqenakatsa Daniel 11:44, 45 textojj parlaskpacha? 2) ¿Kunas norte toqenkir reyirusa Magog markankiri Gog sasin uñtʼatäki uka mayni markanakarus pasani?

¹⁵ Testigonakajj Jehová Diosan juchañchir arunakap yatiyapkani ukasa, enemigonakapajj Diosan markapar qʼal chhaqtayañatak qhep qhepa kutin sartapkani ukasa, inas kuntï Daniel 11:44, 45 (liytʼañataki) texton parlki uka pachpächi. Uka textonjja, Daniel profetajj akham sänwa: “Inti jalsu toqeta, ukhamaraki [norte] toqenakatwa yatiyäwinakajj [norte toqenkir reyir] purinirakini, uka yatiyäwinakasti juparojj wali thoqtasiyarakini; ukhamasti jupajj sinti coleratapuniw misturakini, walja jaqenaka jiwarayañ chuymampiraki” sasa. Amuyatajja, “walja jaqenaka” sasajj Jehová Diosan servirinakapatwa parlaskpacha.d Daniel profetajj inas gobiernonakajj Diosan markapar chhaqtayañatak qhep qhepa kutin sartapkani uka toqet parlaskchi.

¹⁶ Nortenkir reyimpi mayni gobiernonakampi Diosan markap contra sartapkani ukhajja, Taqe Chʼamani Diosajj wal colerasini, ukhamatwa Armagedón guerrajj qalltani (Apoc. 16:14, 16). Ukapachaw nortenkir reyin “jiwañapa horasajj purinirakini, janirakiw khitis jupar yanaptʼirejj utjkaniti” (Dan. 11:45). Ukhamarakiw Magog markankiri Gog sasin uñtʼata mayni markanakajj qʼala tukjatäpjjani.

17. 1) ¿Daniel 12:1 texton parlki uka Miguel angelajj khitisa? 2) ¿Kunsa Jesusajj luraski, kunsa jutïrin lurarakini?

¹⁷ Daniel 12:1 (liytʼañataki) textonkir profeciajja, kunjamsa norte toqenkir reyirusa mayni gobiernonakarusa qal tukjasini, kunjamsa jiwasajj salvatäñäni ukanakwa jukʼamp qhanañchi. ¿Uka textonkir arunakajj kamsañsa muni? Cristo Jesús Reyisan yaqha sutipajj Miguel satawa. Jupajj 1914 marat aksaruw Diosan markaparojj ‘arjjataski’, uka maraw Diosan Reinopajj alajjpachan uttʼayasïna. Akat mä jukʼaruw Jesusajj ‘uñstanini’, mä arunjja Armagedón guerranwa enemigonakapar tukjani. Kunjamtï Daniel profetajj siskänjja, uka guerranwa ‘llakisiña horasajj’ tukuyani. Juan profetajj Apocalipsis libron qellqkäna ukarjamajja uka horasajj ‘wali tʼaqesiñ’ tiempo satawa, uka tiempojj Armagedonanwa tukuyani (Apoc. 6:2; 7:14).

¿SUTISAJJ “LIBRON” QELLQATÄPACHATI?

18. ¿Kunatï jutïrin paskani ukarojj kunatsa jan ajjsarañasäki?

¹⁸ Wali tʼaqesiñ tiemponjja, Jehová Diosampi Jesusampiw servirinakapar salvapjjani sasaw Daniel profetasa apóstol Juanasa sapjjäna. Ukhamasti kunatï jutïrin paskani ukar janiw ajjsarañasäkiti. Danielajj khitinakan sutinakapatï “libron” qellqatäki ukanakaw salvatäpjjani siwa (Dan. 12:1). Ukhamasti, ¿sutisajj “libron” qellqatäñapatakejj kunsa lurañasa? Diosan Corderoparu, mä arunjja Jesusar confiyataswa uñachtʼayañasa (Juan 1:29). Diosar vidas katuyasisajj bautisasiñasawa (1 Ped. 3:21). Ukatsti Diosan Reinopar yanaptʼañatakejj Jehová Diosar uñtʼapjjañapatakiw jaqenakar taqe chuyma yanaptʼañasa.

19. ¿Kunsa jichha tiempon lurañasa, kunatsa ukham lurañasa?

¹⁹ Jichhaw Jehová Diosampiru markapampiru jukʼamp confiyañatakejj wal chʼamachasiñasa. Jichharakiw Diosan Reinopar yanaptʼañasa. Ukanak lurañäni ukhajja, Diosan Reinopajj norte toqenkir reyimpiru sur toqenkir reyimpir chhaqtaykani ukhajj salvatäñäniwa.

Aka recuadron parlki uka profecianakat yaqhepajja, kunanakas mä pachpa tiempon pasäna ukwa qhanañchi. Taqe uka profecianakajja, “tukuya” tiempon jakaskataswa uñachtʼayistu (Dan. 12:4).

• 

  

  Textonaka: Apoc. 11:7; 12:13, 17; 13:1-8, 12.

  Profecía: “Salvaje animalajja” 3.000 jila maranakaw jaqenakarojj munañapar apnaqe. Tukuya tiemponjja, paqallqöri pʼeqepaw usuchjat uñjasi. Qhepat uka pʼeqepajj waliptjjewa, ukatjja oraqpachankir jaqenakaw salvaje animalar arkapjje. Supayajj uka salvaje animalampiw “warmin wawanakapat jiltʼkäna ukanakamp nuwa[si]”.

  Phoqasïwipa: Uma Juicio pasatat walja gobiernonakaw uñstäna, jupanakajj Jehová Dios contraw saytʼapjjäna. 3.000 jila maranakatjja Gran Bretaña wali chʼamani markajj aynachtʼataw Primera Guerra Mundialan uñjasïna. Ukampis Estados Unidos markajj jupampi mayachasjjäna ukhaw wasitat chʼamanëjjäna. Tukuy tiemponjja, Supayajj taqpach gobiernonakampiw Diosan markapar arknaqaski.

• 

  Textonaka: Dan. 11:25-45.

  Profecía: Tukuya tiemponjja, norte toqenkir reyejj sur toqenkir reyimpiw wali chʼamani markäñatakejj jupanakkam nuwasipjje.

  Phoqasïwipa: Alemaniajj Gran Bretaña markampi Estados Unidos markampiw nuwasïna. 1945 maranjja Unión Sovieticampi jupar yanapir markanakampiw norte toqenkir reyëjjapjjäna. 1991 maranjja Unión Sovieticajj chhaqtjjänwa, tiempompisti Rusia markampi jupar yanapir markanakampiw norte toqenkir reyëjjapjjarakïna.

• 

  Textonaka: Is. 61:1; Mal. 3:1; Luc. 4:18.

  Profecía: Jehová Diosajj khitaparuw thak wakichañapatak khitanïna, ukhamat Jesucristojj Diosan Reinopan apnaqañapataki. Khitampi sasipki uka jaqenakajja “pobrenakar suma yatiyäwinak” yatiyañwa qalltapjjäna.

  Phoqasïwipa: 1870 marat aksaruwa Charles Russell jilatampi mayni jilatanakampejj Bibliat yatjjatapjjäna, ukhamat kunsa Bibliajj yatichi uk qhanañchañataki. 1881 maranwa Diosan arunakap predicañajj kunja wakiskirisa uk amuyapjjäna. Ukatsti akham pʼeqeñchäwini yatichäwinakwa apsupjjäna: “1.000 predikirinakaw munasi”, ukhamarak “Predicapjjañapatak ajllitanaka”.

• 

  Textonaka: Mat. 13:24-30, 36-43.

  Profecía: Mä jaqew yapupar trigo satanti. Ukatsti enemigopaw uka pachpa yapur jan wali qora satjjataraki. Jan wali qorajj trigompi chika jilasajj trigor chhaqtayiwa. Cosecha tiemponwa jan wali qorampi trigompejj jaljasjje.

  Phoqasïwipa: 1870 marat aksarojja, khitinakas cheqpach cristianöpjje, khitinakas falso cristianöpjjaraki ukajj jukʼat jukʼatwa suma qhanäjje. Tukuy tiemponjja, cheqpach cristianonakampi falso cristianonakampejj janiw chikäjjapjjeti.

• 

  Textonaka: Dan. 2:31-33, 41-43.

  Profecía: Hierrompi ñeqʼempi lurat kayunakajja, kunayman metalanakat lurata estatuan kayunakapawa.

  Phoqasïwipa: Ñeqʼejja Gran Bretaña, Estados Unidos markanakampi apnaqat jaqenakäpjjewa, jupanakajj uka gobiernonak contraw sartapjje. Ukhamätap laykuw uka markanakajj pisi chʼamäjjapjje, janiw hierro metaljam chʼamanëjjapjjeti.

• 

  

  Textonaka: Mat. 13:30; 24:14, 45; 28:19, 20.

  Profecía: ‘Trigojj’ apthapisjjewa, “manqʼa imañ” utaruw imasjjaraki, ukatsti ‘uywirejj utapan servirinakapar’ uñjañapatakiw ‘suma phoqeri amuyasir esclavor’ uttʼayi. ‘Reinon suma yatiyäwinakapajj oraqpachanwa yatiyañ’ qalltasi.

  Phoqasïwipa: 1919 maranwa Diosan markapar uñjañapatakejj ‘suma phoqeri amuyasir esclavor’ uttʼayasi. Ukhat aksaruw Estudiantes de la Biblia sasin uñtʼatäpkäna ukanakajj jukʼamp predicapjjäna. Jichhürunakanjja Jehová Diosan Testigonakapajj pä pataka jila markanakanwa predicapjje, waranqa arunakat sipansa jukʼamp arunakanwa Bibliat apstʼat qellqatanak lurapjjaraki.

• 

  Textonaka: Dan. 12:11; Apoc. 13:11, 14, 15.

  Profecía: Pä wajjrani salvaje animalajja, mayni “salvaje animalar uñtasit mä estatua lurapjjañapatakiw” jaqenakar chʼamañchi, ukatsti uka estatuaruw ‘samana churi’, mä arunjja jakañ churi.

  Phoqasïwipa: Gran Bretaña, Estados Unidos wali chʼamani markanakaw Sociedad de Naciones sat organización utjañapatakejj chʼamañchapjjäna. Yaqha markanakajj jupanakar yanaptʼapjjarakïnwa. Norte toqenkir reyejja, 1926 marat 1933 marakamaw uka organización taypinkäna. Diosan Reinopar jachʼañchañat sipansa jaqenakajj Sociedad de Naciones sat organizacionaruw jachʼañchapjjäna, qhepatsti Organización de las Naciones Unidas ukaruw jachʼañchapjjaraki.

• 

  

  Textonaka: Dan. 8:23, 24.

  Profecía: Mä jan wali reyejj “taqe kunsa jan amuykañjamwa tʼunjani”.

  Phoqasïwipa: Gran Bretaña, Estados Unidos markanakajj walja jaqenakwa jiwarayapjjäna, walja jan walinakwa lurapjjarakïna. Sañäni, Segunda Guerra Mundial ukanjja, Estados Unidos markajj enemigopäpki uka markanakat mayaruw pä bombas atómicas phallayäna.

• 

  Textonaka: Dan. 11:31, TNM; Apoc. 17:3, 7-11.

  Profecía: Tunka wajjrani “llijkir wila” salvaje animalajj wali manqha pʼiyatwa mistu, jupasti kimsaqallqöri reyiwa. Daniel libronjja uka reyit parlkasajj ‘taqe kun tukjiri, ajjtaskañawa’ siwa.

  Phoqasïwipa: Sociedad de Naciones sat organizacionajj Segunda Guerra Mundialanwa chhaqtjjäna. Uka qhepatjja, Organización de las Naciones Unidas (ONU) ukaw uñstarakïna. Kunjamtï jaqenakajj Diosan Reinopar jachʼañchañat sipansa Sociedad de Naciones sat organizacionar jachʼañchapkänjja, ukhamarakiw ONU sat organizacionar jachʼañchapjje. ONU sat organizacionaw religionanak contra saytʼani.

• 

  

  Textonaka: 1 Tes. 5:3; Apoc. 17:16.

  Profecía: “Suman jakasiñampi jan ajjsaras jakasiñampiw utj-jje” sasaw marka apnaqerinakajj sapjje. Ukatsti “tunka wajjranakasa salvaje animalasa”, “prostituta” warmi contraw sartapjje ukatsti jiwayapjjarakiwa. Uka pasatatjja taqe markanakaw tukjatäpjje.

  Phoqasïwipa: “¡Suman jakasiñampi jan ajjsaras jakasiñampiw utj-jje!” sasaw marka apnaqerinakajj sapjjani. Ukatsti ONU sat organizacionar yanaptʼir markanakajja, taqpach falso religionanakwa chhaqtayapjjani. Ukhamatwa wali tʼaqesiñ tiempojj qalltani. Uka tʼaqesiñ tiempojja, Jesusajj Supayan apnaqata akapachar Armagedonan tukjkani ukhaw tukuyani.

• 

  Textonaka: Ezeq. 38:11, 14-17; Mat. 24:31.

  Profecía: Gog sasin uñtʼatäki ukaw Diosan markap contra sartani. Ukatsti angelanakajj ajllitanakaruw “jawsthapipjjani”.

  Phoqasïwipa: Norte toqenkir reyejja, mayni gobiernonakampiw Diosan markap contra sartapjjani. Mä qhawqha tiempotjja, aka oraqenkasipki uka ajllitanakajj alajjpachar jawsthapitäpjjaniwa.

• 

  Textonaka: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Profecía: ‘Mä janqʼo caballjjar’ qonjjatatäki ukajja, Gog sasin uñtʼatäki ukampiru ejercitopampiru qʼal tukjasaw “atipjäwip” phoqachi. “Salvaje animalajja” ‘nakhir qotar’ jaqontataw uñjasi, jachʼa estatuajj qʼala tʼunjataw uñjasiraki.

  Phoqasïwipa: Jesusajj Diosan Reinopan reyipawa, jupaw Diosan markapar salvani, 144.000 ajllit cristianonakampi angelanakampi mayachtʼasisaw markanakar qʼal tukjarakini, mä arunjja Supayan apnaqata taqe gobiernonakaruw chhaqtayani.