¿TAQE KUN JILJJATTATAPAT KUNS LURSNA?

Kunatï utjkistu ukampikejj kusisitäñasawa

Kunanakapatï utjki ukanakamp kusisit jakasirinakajj sumakiw jakasipjje. Mä akatjamat kunas mayjtʼi ukhajja, ukarjam jakañajj jupanakatak janiw chʼamäkiti.

¿KUNATS IMPORTANTEJJA?

Jessica Koehler psicologajj akham siwa: ‘Kusisitak jakasipjje ukanakajj janiw envidiasiñamp apayasipkiti, janiw facilak aynachtʼapkarakiti’ sasa. Ukatwa jupanakajj jukʼamp kusisita jan estresat jakasipjje. Kusisit jakasirinakat jila partejj jukʼa utjirinikïpjjewa, jupanakatakejj qollqet sipans familianakapataki amigonakapatak tiemp apstʼasiñaw jukʼamp importantejja.

“Jiwasantejj manqʼasa isisa utjaskchistojja, ukanakampejj kusisitakïskañäniwa” (1 Timoteo 6:8).

¿KUNSA LURSNA?

Janiw mayninakamp igualayasiñasäkiti. Jukʼa utjirinikïstan ukat wali utjirinïpki ukanakamp igualayasiñäni ukhajja, janiw kusisitäjjsnati, envidiasjjaraksnawa. Ukampis qollqenjamäpki ukanakajj walja manunakanïsipkaspawa, ukatwa jan igualayasiñasäkiti. Senegal markankir Nicole warmejj akham siwa: “Cheqpach kusisitäñatakejj janiw walja cosasanak necesitkti. Mayninakajj walja utjirinïsipkpansa, kunatï utjkitu ukanakampik kusisitayä ukhajj sumakiw jakasëjja” sasa.

Akwa lursna: Wali qollqenïpjjatapsa jila alani yänakanïpjjataps Internetar apkatapki ukanak jan uñchʼukiñäniti.

“Maynin waljas utjaskpan, janiw ukanakajj jupar jakañ churkaspati” (Lucas 12:15).

Yuspärasirïñasawa. Yuspärasir jaqenakajja, kunanakapatï utjki ukanakampejj kusisitakiw jakasipjje, janirakiw jukʼamp yänakanïñs thaqapkiti. Haití markankir Roberton sat chachajj akham siwa: “Mayninakajj kunjamsa familiajarusa nayarus munasiñampi ukat khuyaptʼayasiñamp uñjawayapjjetu ukanakat lupʼiñatakiw tiempo apstʼasta. Ukatjja ukham lurapjjatapat jupanakarojj qhawqsa yuspärta ukwa sarakta. Kimsaqallqo marani wawajarus kuntï katoqki ukanakat yuspärasiriñwa yaticharakta” sasa.

Akwa lursna: Kunanakatsa sapür yuspärsna ukanak mä cuadernoruw qellqtʼassna. Sañäni, familiasan sum jakasitasata, cheqpach amigonakanïtasata, kʼumarätasat yuspärañatakiw qellqtʼassna, ukat intin wali sum qhantʼas jalantatapat yuspärañatakis qellqtʼasiraksnawa.

“Kusisit chuymani jaqejja sapüruw kusisit jakasi” (Proverbios 15:15).

Awisajja kunanakatï jiwasan utjkistu taqe ukanakamp kusisitakïñajj chʼamakiwa. Ukampis chʼamachasitasajj janiw inamayäkaniti. Jiwasatï kunatï utjkistu ukanakamp kusisit jakasiñänejja, sumakiw jikjjatasiñäni, uk janiw qollqemp alksnati.