Tukuyañataki

AKA folletojja, Jehová Diosan Testigonakapajj kunanakarus creyipjje uk janiw taqpach qhanañchkiti. Jan ukasti mä qhawqhanakakwa qhanañchi. Ukat Testigonakan wawanakapajj kunatsa escuelan mayjäpjje uks sumwa qhanañcharaki.

Testigonakajja wawanakapan Diosar serviñan jukʼamp nayrar sartapjjañapatakiw wal chʼamachasipjje, ukham lurapjjatapajj wawanakaparojj yaqha lurañanakans yanaptʼarakiwa. Testigonakan wawanakapajj Bibliat yateqapjje ukat ukarjam sarnaqapjje ukhajja kusisitaw jakasipjje, jan walinakar saykatañas janiw jupanakatak chʼamäkiti. Janiw ukakïkiti, Biblian ewjjtʼanakaparjam sarnaqañajj escuelan suma yateqerïñataki ukat suma jaqëñatakiw yanaptʼaraki.

Jehová Diosan Testigonakapajj jakäwitakejj kunas wakisi uk sum amuytʼasipjje, ukatwa yateqañarojj wali wakiskirit uñjapjje. Ukhamajja, kawkhakamay jumar yanaptʼañjamächi ukhakam yanaptʼañatakiw chʼamachasipjje. Ukatjja, Testigonakajj oraqpachanwa utanakapansa, tantachasipki uka Salonanakans wawanakaparojj sum yateqapjjañapatak chʼamañchtʼasipkakini.