12 Yatichäwi
Jakäwsa wilsa Diosjam uñjapxañäni
¿Jakäwi kunjam uñjañasasa? (1) ¿Purakankaskir wawa jiwayañax walïskpachati? (1)
¿Chijir jan puriñataki kunjamsa cristianonakax sarnaqapxi? (2)
¿Animalanakaru jiwayañaxa walïskpachati? (3)
¿Kuna luräwinakasa jakäwiru jan respetatasxa uñachtʼayi? (4)
¿Diosan kamachinakapaxa kamsisa wila tuqitxa? (5)
¿Ukax wila uchayasiñamppachatakiti? (6)
1. Jehová Diosaw jakañ churirixa. Taqi kunatï jakki ukaxa Diosan uchatawa (Salmo 36:9). Jakañaxa Jehová Diosatakix wali valoraniwa, taykan purakapankaskiri wawasa ukhamarakiwa. Uka wawaru jiwayañaxa janiw Diosatakix walïkiti (Éxodo 21:22, 23, NM; Salmo 127:3).
2. Chiqa cristianonakaxa akatjamata chijir purtʼañatxa amuyasipxiwa. Jan chijir puriñatakixa utapsa autopsa sum uñakipapxi (Deuteronomio 22:8). Diosan yupaychirinakapaxa janiw anattʼañ laykuki jakañ aptʼirjam sarnaqapkiti. Ukhamaxa maynit maynikam usuchjasis anatañanakanxa janiw anatapkiti. Kunatï nuwasiñar wiytki ukanakatxa jithiqtapxiwa (Salmo 11:5; Juan 13:35).
3. Taqi kun luriri Diosatakixa animalanakan jakäwipasa wali valoranirakiwa. Manqʼañataki, isisiñataki, chijinakata usunakata jarkʼaqasiñataki, ukanakatakikiw mä cristianox animalanak jiwayaspa (Génesis 3:21; 9:3; Éxodo 21:28). Ukampis animalanak usuchjañasa jan ukax anatas jiwayañasa janiw walïkiti (Proverbios 12:10).
4. Cristianonakaxa janiw cigarro chʼamupxañapäkiti, janiw coca akhullipxañapäkiti ni jan wali qullanakampisa qulljasipxañapäkiti. Ukanakax janiw walïkiti, kunattixa 1) ukaruw yatinuqtayaspa, 2) usuntayaspawa, ukatxa 3) qʼañu luräwinakawa (Romanos 6:19; 12:1; 2 Corintios 7:1). Aka jan walinaka armañax wali chʼamäspawa, ukampisa Jehová Diosar kusisiyañ munasaxa armañasawa.
5. Wilasti Diosatakix wali valoranirakiwa. Almaxa, mä arunxa, jakäwixa wilankiw siw Diosaxa. Ukhamaxa wil manqʼañaxa janiw walïkiti. Wilanpacha aycha manqʼañaxa janirakikiw walïkiti. Mä uywatï jaychjat jiwchi jan ukax sipitjat jiwchi ukhaxa uka aycha manqʼañaxa janiw walïkiti. Mä animalatï lanzampi jan ukax fusilampi jiwayatächi ukhaxa manqʼañatakix jankʼakiw wil apsuñasa (Génesis 9:3, 4; Levítico 17:13, 14; Hechos 15:28, 29).
6. ¿Wil uchayasiñax janit walïki? Jehová Diosax wilat jithiqtapxam siwa. Ukhamaxa janipuniw kuna tuqitsa yaqhan wilap uchayasiñasäkiti ni jiwasan imat wilassa kutintayasiñasäkiti (Hechos 21:25, MT). Ukhamasti chiqa cristianonakaxa janiwa wil uchayasipkiti. Ukampisa jan wilani yaqha kasta qullanakxa iyaw sapxiwa. Jakañwa munapxi, ukampisa janiw Diosan kamachinakap pʼakintasa jakañ munapkiti (Mateo 16:25).
[25 janan fotonakapa]
Diosaru kusisiyañatakix janiw wila uchayasiñasäkiti, jan wali lurañanakatsa jithiqtañasawa ukat chijir puriñatsa amuyasiñasawa