Diosan yatichäwinakapax taqinimp sum jakasiñwa yanaptʼistu
BIBLIAN yatichäwinakapax janis jichha tiempo jaqinakatakix askïxaspa ukham jaqinakax amuyapxi. Ukampisa, India marka apnaqiri Mohandas K. Gandhi ukat Leo Tolstoy uka wali uñtʼat jaqinakasa wali sumwa Biblian yatichäwinakapata ukat Jesusan Wali Uñtʼat Arstʼäwipan yatichkäna ukanakatsa parlapxäna. ¿Kunatsa uka jaqinakax kuntï Bibliax sarnaqañ tuqit yatichki ukanakat wal muspharapxpachäna?
Kunattix uka Wali Uñtʼat Arstʼäwixa Diosatakjam sum sarnaqañasatakiw chʼamachistu: llampʼu chuymani, khuyapayasiri, ukham suma jaqïñatakiw yanaptʼistu, ukatxa kunatix chiqäki uk munapxam sarakiwa. Ukatxa janiw jaqir jiwayañakix juchäkiti, jan uksti jaqi masir uñisiñas jucharakiwa; janiw wachuq juchakix jan walïkiti, jan wali amuyunakas jucharakiwa sasaw yatichi. Maysa tuqitxa, aliqataki divorciasiñax janiw walïkit sasaw yaticharaki, kuna laykutix familiarux tukjiwa ukat wawanakarus tʼaqhisiyarakiwa. Akham sarakistuwa: ‘Uñisirinakamarus munapxam, pisinkirinakarux yanaptʼapxam, jan jaqi masirux juchañchapxamti, kunjamtix mayninakan uñjatäñ munapktaxa ukham yaqhanakar uñjapxarakim’ sasa. Taqinis uka iwxtʼanakarjam sarnaqsna ukhaxa wali askipunïspawa. Mä markantï uka iwxtʼanakar phuqasispa ukhaxa, taqi kunas wali sumäspawa.
Uka tuqitxa, Jehová Diosan Qhanañchirinakapax Biblian kamachinakaparjamaw sarnaqapxi. Kunjamtï Diosan Arupax yatichkixa ukarjamaw jaqichasiñsa uñjapxi; wawanaksa sum yatichapxi, ukat familian mayachtʼat jakasiñ tuqitsa amuyapxaraki. Ukham mayachtʼat suma familianakax kawkintï jakapki uka chiqansa wal yanaptʼapxi, ukat markpachatakis wali askirakiwa. Ukampis kunapachatï familianakax aynachtʼxapxi, jan ukax qʼañu luräwinakax familianakan utjxi ukhaxa, wali chʼamani jachʼa markanakas aynachtʼapxarakiwa. Ukhamasti, Jehová Diosan Qhanañchirinakapax walja jaqinakaru, jan ukax walja familianakar Diosan kamachinakaparjam sarnaqañ yanaptʼapxaspa ukhaxa, janiw lunthatasiñas jiwayasiñasa, jan ukax qʼañu luräwinakas añcha utjkaspati.
Ukat mä jan waltʼäwiw taqi markanakan utjaraki, ukasti yaqha kasta jañchininakar uñisiñawa. Uka tuqitxa apóstol Pedrox akham sänwa: “Chiqpachanwa amuyta, Diosatakix taqi casta jaqis mayakïtapa. Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” sasa. Ukxaruxa, apóstol Pablox akham sarakïnwa: “Jupankxasinxa janiw utjkxiti judiosa, griegosa, esclavosa, libresa, chachasa ni warmisa. Cristo Jesusar mayachatäxasinsti taqi jumanakax mayakïxapxtawa” sasa (Hechos 10:34, 35; Gálatas 3:28). Ukhamwa Jehová Diosan Qhanañchirinakapax amuyapxi. Sañäni, Uraqpachan kunjamas yatiyasiski uk uñjañataki utjki uka utansa sucursalanakansa kunayman jaqinakaw irnaqapxi, ukat tamanakansa taqi kasta jaqinakaw utjaraki, ukampis mä familiakïpkaspas ukhamaw sum apasipxi.
Africanxa yaqhip markanakanxa chʼaxwapxakipuniwa. Ukat Jehová Diosan Qhanañchirinakapax uka markanakanwa jachʼa tantachäwinak lurapxaraki, ukampis jupanakax janiw chʼaxwapkiti, jan ukasti wali mayachtʼataw manqʼtʼasipxi, mä utaruki qurpachasipxi. Ukhamaw Diosar mä wawaki yupaychapxi, uk uñjasax autoridadanakax wal muspharapxi. Amtañäni, mä jachʼa tantachäwiw Nueva York markanxa apasïna, ukarux yaqha markanakat kunaw sarapxäna, niya pä pataka phisqa tunka waranqaniw tantachasipxäna, uka jachʼa tantachäwi uñjasaxa kunjamas chiqpach cristianonakax mayachtʼata jakasipxaspa uka tuqitwa mä periodiconxa parli (Ámsterdam News, agosto 2, 1958 New York City).
Akham uka periodiconx parli: “Taqi chiqanwa chʼiyar jañchininakasa, janqʼu jañchininakasa, inti jalsu tuqinkirinakasa, pisinkirinakasa, qamirinakasa uñjasïna, ukatxa wali kusisitaw purapat wali sum parltʼasipxäna. [...] 120 jachʼa markanakat jutat Jehová Diosan Qhanañchirinakapaxa, wali mayachtʼataw Diosar suman yupaychawayapxi, ukat uk lurañax janiw chʼamäkataynati, ukwa Estados Unidos markan jakasir jaqinakarux uñachtʼayawayapxi. [...] Ukhamasti jaqinakax wali sumaw mayachtʼata irnaqapxaspa jan ukax jakasipxaspa, ukwa uka jachʼa tantachäwix uñachtʼayi” sasa.
Jichhürunakanxa, Diosan kamachinakapax janiw askïxiti sasaw jaqinakax sapxi, ukampis ¿kuna yaqha kamachinakas jaqinakar yanaptʼaspa? Amuytʼañäni, mä markan taqini Diosan kamachinakaparjam sarnaqapxaspa ukhaxa, taqi kunas wali sumäspawa. Ukatxa, uka yatichäwinakaw ‘taqi markanakata, kunayman janchini, ukhamarak taqi kasta parlani’ jaqinakarux yanaptʼani, Diosan Apnaqäwipampi apnaqata aka Uraqin jakasiñataki (Apocalipsis 7:9, 10).
[23 janan qhanañchäwipa]
Taqi kasta jaqinakaw mayachtʼata irnaqapxi
[24 janan qhanañchäwipa]
Biblian yatichäwinakaparjama sarnaqañaxa wali askiwa. ¿Kuna yaqha yatichäwiraki jichhürunakkamasti jaqinakar yanaptʼisti?