Kunaymanitwa Diosan arunakapat yatiyapxi

CRISTIANONAKAX taqi markankir jaqinakaruw Jesusan ‘arkiripar tukuyapxañapa’, ukampis janiw munkir jan munkir tukuyapxañapäkiti. Jesusax “suma yatiyäwinak [yatiyiriw jutäna]”, “llakitanakaru chuymachañataki” (Mateo 28:19, MT; Isaías 61:1, 2; Lucas 4:18, 19). Jehová Diosan Qhanañchirinakapax niya ukhamarakiw Bibliat suma yatiyäwinakampix yaqhanakar chuymachapxaraki. Ezequiel sat nayra profetjamarakiw “jan wali [luräwinak] layku wali llaktʼatäsipki ukanakaru” thaqhapxi (Ezequiel 9:4).

Jan walinak uñjasin wali llaktʼatäpki ukanakar jikxatañatakixa utat utwa sarapxi. Ukhamatwa taqi jaqinakar purtʼañataki chʼamachasipxi, Jesusax aka Uraqinkkäna ukhaxa “jachʼa markanakana, ukhamarak jiskʼa markanakanwa sarnaqäna Diosan arunakap yatichasa, ukhamarak Diosan reinopat parlasa”. Nayrïr arkirinakapax ukhamarakiw lurapxirïna (Lucas 8:1; 9:1-6; 10:1-9). Jichhürunakanxa, Jehová Diosan Qhanañchirinakapax niya ukhamarakiw taqi utanakar purtʼañataki chʼamachasipxi, ukhamata jaqinakampi kuna llakinakatsa jan ukax Uraqpachan kunanakas pasaski ukanakat mä jukʼa parltʼañataki. Ukat maranxa walja kutiw kuttʼañjamächi ukhaxa kuttʼapxi. Qalltanxa Bibliatwa mä pä chiqa jaqinakataki liytʼarapipxi, ukat kunapachatï maynix jukʼamp yatxatañ munirjamäki ukhaxa, mayampi kuttʼañatakiw amtapxi, ukhamata jukʼampi parltʼasiñataki. Ukatxa Biblianaka jan ukax Bibliat apstʼat kunayman qillqatanak jaytasaw sarapxaraki, ukat inakiw Bibliat jaqinakar utanakapan yatichapxaraki. Jichhakamax walja millón jaqinakaruw jan ukax familianakaruw Bibliat jan qullqi mayisa yatichasiski.

Ukatxa Tantachasiñ Utanakanwa Diosan Apnaqäwipat ‘suma yatiyäwinakax’ sapa semanan jukʼampi yatichasiraki. Mä tantachäwinxa taqinitakiw mä arstʼäwix utji, ukanxa kunanakas jichhax pasaski, ukat kun lurañas wakisi uka tuqinakatwa sum qhanañchasi, ukxarusti Bibliat jan ukax mä profeciat jukʼamp sum amuytʼañatakiw Yatiyañataki sat revistampi yatiqasiraki. Ukatxa Bibliat yatxattʼañataki sat mä wakichäwimpiw yaqha tantachäwix qalltaraki, ukatsti khitinakatix suma yatiyäwinak apapki ukanakar wakichañatakiw sum yatichasiraki, uka tantachäwi tukuyañatakix kunjamsa uka chiqan qamasir jaqinakarux Bibliat yatichapxaspa uka tuqinakatwa sum amuytʼapxaraki.

Uka tantachäwinakarux khitis saraskakispawa. Taqinitakis wali askiwa, ukat janiw khitirus qullqix mayiskiti. Bibliax akham siwa: “Thaqhañasaw maynit maynikam kunjäman yanaptʼasiñasataki munasiñanïñasataki, ukhamarak suma luräwinak uñachtʼayasa. Janirakiw tantachäwinakar janix sarañasäkiti kunjämtix yaqhipanakax jan sarapkiti ukhama, jan ukasti maynit mayniruw wayttʼasiñasa, Tatitun jutäwipa jakʼankxatapa yatisinsti jukʼampïñapawa” sasa. Chiqpachansa sapakix utan Bibliat yatxatasksnawa ukampis tantachäwir sarañax wali askiwa, ukwa Bibliax akham qhanañchi: “Kunjamtix hierroxa yaqha hierrompi liqʼjasa ariptayataxa, ukhamarakiw jaqix jaqi masipampi suma amuytʼayataraki” sasa, uka arunakax jaqi pura chʼamañchasiña sañ muni (Hebreos 10:24, 25; Proverbios 27:17).

Jehová Diosan Qhanañchirinakapaxa kun lurkasas jan ukax kawk sarkasas Diosan arunakapatxa yatiyapxapuniwa. Uta jakʼankirinakampisa, autot sarkasinsa jan ukax avionat sarkasinsa mä jukʼsa parltʼapxapuniwa, ukat awisax wali jaypacharakiw irnaqir masinakampis jan ukax amigonakampis wali sum parltʼapxi. Jesusax ukhamwa jaqinakarux yatiyarakïna: quta lakan sarnaqkasasa, qullu parkin quntʼatäkasasa, jayanak sarkasas jan ukax botet sarkasas, kawkir sarkasasa wali sumwa yatichirïna. Ukat sinagoganakan jan ukax templon yatichañsa janirakiw armaskänti. Mä arunxa, jan inaktʼasaw taqi chiqanakan Diosan arunakapatxa yatichirïna. Jehová Diosan Qhanañchirinakapax niya ukham lurañatakirakiw wal chʼamachasipxi (1 Pedro 2:21).

SUM SARNAQASAW YATICHAPXARAKI

Ukhamaw kunayman tuqit Diosan arunakapat yatichapxi, ukampis jan walinak lurapxaspa ukhaxa, inamayaw yatichapxaspa. Janiw walïkit sasin jan walinak luraskaraksna ukhaxa janiwa walïkaspati. Chiqansa, ukhamatwa walja jaqinakax Bibliat jan kunsa yatiñ munapkiti. Ukampis Bibliax janiw kuna juchanïkisa. Amtapxañäni, khä urunakanxa fariseonakas ley yatichirinakas Hebreo Aruta Qullan Qillqatanakxa yatipxänwa, ukampis jan walinak lurapxäna, ukatwa Jesusax jupanakar kʼari chuyman jaqinaka sänxa. Moisesax katuqkäna uka Leyinakat yatichapxäna, ukampis Jesusax akham sasaw arkirinakapar amuytʼayäna: “Jumanakax jupanakarux jaysapxamaya, lurapxarakim kuntix sapktam taqi ukanaka. Ukampis jan jupanakjamax lurapxamti, jupanakasti may arsupxi ukatsti yaqrak lurapxi” sasa (Mateo 23:3). Walja arunakamp yatichañat sipansa cristianjama sum sarnaqañaw jukʼamp askixa. Ukatpï Diosar jan yupaychir chachan warminakarux akham amtayasixa: “Inas kawkïri chachas jan Tatitur iyawskchi ukax jumanakan sarnaqäwinakam tuqi Tatitutaki jikxatatäñapataki jan kuna arumpisa, jan ukasti jumanakan suma sarnaqatam uñjasaki” sasa (1 Pedro 3:1, 2).

Ukhamasti Jehová Diosan Qhanañchirinakapax kuntï yatichapki ukanak lurasarakiw jaqinakarux Diosan arunakapatxa yatiyañ munapxi. Ukatxa, kunjam ‘uñjatäñtï munapki ukhamarakiw taqinirus uñjapxaraki’ (Mateo 7:12). Ukat janiw cristiano masinakaparuki ukham sum uñjapkiti, jan ukasti familiaranakarusa, uta jakʼan qamirinakarusa, munat masinakarus wali sum uñjapxaraki. Chiqansa, jupanakax pantjasirïpxarakiwa, ukampis taqi chuymaw yaqhanakan askipa thaqapxi. Ukhamasti janiw suma yatiyäwinakaki yatiyapkiti, jan ukasti yanaptʼirjamächi ukhaxa wali sum yanaptʼapxi (Santiago 2:14-17).

[19 janan fotopa]

Hawai

[19 janan fotopa]

Venezuela

[19 janan fotopa]

Yugoslavia

[20 janan fotonakapa]

Tantachasiñ Utanakaxa Bibliat yatxatañataki suma lurtʼatawa

[21 janan fotonakapa]

Jehová Diosan Qhanañchirinakapaxa taqinimpiw sum apasiñ munapxi, kunjamtï yatichapki ukhama