22 YATICHÄWI
¿Kunjamsa jumajj suma yatiyäwinak predicasma?
Biblian cheqa yatichäwinakap yatjjatasajja, “taqeniw akanak yatipjjañapa” sasajj inas jumajj amuysta. Cheqas ukhamapunïskiwa, taqeniw suma yatiyäwinak yatipjjañapa. Ukampis jumajj kuntï yateqaskta uk yaqhanakar parlañajj inas ajjsarañjamächi. Aka yatichäwinjja kunas jan ajjsarirïñatakisa, Biblian suma yatichäwinakap yaqhanakar parlasin kusisitäñatakis yanaptʼiristam ukanakatwa yatjjatañäni.
1. ¿Kunjamsa uñtʼatanakamarojj kuntï yateqaskta uka toqet parlasma?
Jesusan discipulonakapajj akham sapjjänwa: “Kunanaktï nanakajj uñjapkta, istʼapkarakta ukanakat parlañ janiw amuktʼapkiristti” sasa (Hechos 4:20). Jupanakajj cheqa yatichäwinakjja wali valoranitwa uñjapjjäna, ukatwa uka toqet taqenir parlañ munapjjäna. ¿Jumajj jupanakjamarakit jikjjatasta? Ukhamächi ukhajja, kunanaktï yateqkta ukanak familiaranakamaru amigonakamar parlañatak chʼamachasim (Colosenses 4:6 liytʼäta).
Akanakwa lurasma
Mä familiaramamp parlkasajja, Biblia toqet parlañatakejj inas akham sischisma: “Aka semanajj nayajj akwa yateqta” sasa.
Mä amigomajj usuntatäkani jan ukajj wali llakitäkani ukhajja, chʼamañchtʼkir mä texto jupatakejj liytʼarapisma.
Trabajir masinakamajj kunjamäsktasa sasin jisktʼapkätam ukhajja, Bibliat yateqkasasa jan ukajj congregacionansa kunsa yateqta ukwa parltʼasma.
Amigonakamarojja kunjamsa Internetan jw.org cheqar mantapjjaspa ukwa yatichasma.
Bibliat jumamp chika yateqapjjañapatakejj yaqhanakaruw invittʼasma, jan ukajj kunjamsa jw.org cheqnam Bibliat yateqañatak mä curso mayipjjaspa ukwa yatichasma.
2. ¿Kunatsa congregacionankir jilat kullakanakamp predicañatak chʼamachasiñama?
Jesusan discipulonakapajja janiw uñtʼapkäna ukanakarukejj suma yatiyäwinak yatiyapkänti. Jesusajja ‘panin paninwa jupa nayraqat khitäna, ukhamat khitkäna taqe uka markanakan’ yatiyapjjañapataki (Lucas 10:1). Ukham suma organiztʼat predicasajja, walja jaqenakaruw suma yatiyäwinak yatiyapjjäna. Ukhamarusa jupanakajj juntuk predicasajj wali kusisitäpjjänwa (Lucas 10:17). ¿Janit jumajj congregacionankir jilat kullakanakamp predicañ munkarakisma?
JUKʼAMP YATJJATAÑÄNI
Kunas jan ajjsaras predicañatakisa, suma yatiyäwinak yatiykasin kusisitäñatakis yanaptʼiristam ukanakatwa jichhajj yatjjatañäni.
3. Jehová Diosaw yanaptʼaskätam
Predicañ munapki ukanakat yaqhepanakajja, mayninakajj jupat kamsapjjanisa juparojj istʼapjjaniti janicha ukanakatwa llakisipjje.
¿Jumajj kuntï yateqkta uka toqet mayninakamp parlañ ajjsararaktati? ¿Kunatsa ukham amuyta?
VIDEO uñtasajja aka toqetwa parltʼapjjäta:
Uñtktan uka videorjamajja, ¿kunas wayn tawaqonakarojj jan ajjsarañatak yanaptʼäna?
Isaías 41:10 liytʼasajja aka toqetwa parltʼapjjäta:
Predicañ ajjsarayaskäta ukhajja, ¿kunatsa orasiñamajj wakisispa?
¿Yatiyätati?
Jehová Diosan Testigonakapäjjapjje ukanakat waljanejja, nayrajj predicañ wal ajjsarayasipjjäna. Amuytʼañataki, Sergey chachajj janis kunatak walïkaspa ukhamwa amuyasïna, ukatwa yaqhanakamp parlañajj jupatakejj chʼamäna. Ukampis jupajj Biblia estudiañwa qhepat qalltäna. Jupajj akham siwa: “Nayajj ajjsarayaskchiyätsa, kuntï yateqkayäta uk mayninakar yatiyañatakiw chʼamachasiyäta. Yaqhanakar Bibliat parlañajj wal chʼamañchtʼitäna, Biblian yatichäwinakaparus jukʼampiw confiyayäta” sasa.
4. Respetompiw mayninakar parlañama
Maynir janïr predickasajja, janiw kunsa jumajj säta ukak amuytʼañamäkiti, jan ukasti kunjamsa säta uksa amuytʼañamarakiwa. 2 Timoteo 2:24; 1 Pedro 3:15 liytʼasajja aka toqetwa parltʼapjjäta:
Mayninakamp Biblia toqet parlkasajja, ¿kunjamsa uka textonakarjamajj lurasma?
Inas juman yaqhep familiaranakamasa jan ukajj amigonakamas jumamp jan acuerdöpkchiniti, ukampis ¿kunsa jumajj lurasma? ¿Kunsa jan lurañamäkaraki?
Akar creyiñamaw wakisi sañat sipansa, ¿kunatsa jupanakarojj respetomp parlañajj wakiskirejja?
5. Suma yatiyäwinak predicañajj kusisiyistuwa
Jehová Diosajja suma yatiyäwinak predicañapwa Jesusar mayïna. ¿Kunjamsa Jesusajj uka lurañar uñjäna? Juan 4:34 liytʼasajja aka toqetwa parltʼapjjäta:
Suma manqʼanakajj jakañataki kusisitäñatakiw yanaptʼistu. Suma yatiyäwinak yatiyañajja, mä arunjja Diosan munañap lurañajj manqʼar uñtatawa sasajj ¿kunatsa Jesusajj säna?
¿Suma yatiyäwinak yatiyasajj jumajj kusisitarakïsmati? ¿Kunatsa ukham amuyta?
Akanakwa lurasma
Chika semanan apaski uka tantachäwinjja, kunjamsa predicañ qalltasma uk yateqañatak chʼamachasim.
Chika semanan apaski uka escuelan mä asignación katoqañatakejja, kun lurañamas wakisi uk yatichirimar jisktʼasim. Uka asignacionanakajja, kuntï yateqkta ukanakat yaqhanakamp parlañatak suma wakichtʼatäñatakiw yanaptʼätam.
Jan istʼañ munapki ukanakajj kun sañsa yatipjje, jan ukajj kamsasas jisktʼasipjje ukatak wakichtʼatäñatakejja, aka libron “yaqhepanakajj akham sapjjewa” siski uka cheqampiw yanaptʼayasisma.
YAQHEPANAKAJJ AKHAM SAPJJEWA: “Kamisaraki, ¿kunjamäsktasa? ¿Kunsa jumajj luraskta?” sasa.
¿Ukham satajj kunjamsa kuntï Bibliat yateqkta ukanakat parlasma?
¿KUNSA YATEQAWAYTAN?
Suma yatiyäwinak yaqhanakar yatiyañajj kusisiyistuwa. Uk lurañajj chʼamäkaspas ukhamäspawa, ukampis janiw ukhamäkiti.
Amtañataki
¿Kunas suma yatiyäwinak yatiyañatakejj yanaptʼiristam?
¿Kunjamsa respetomp mayninakar yatiysna?
¿Kunas jan ajjsarañatak yanaptʼiristam?
JUKʼAMP YATJJATAÑAMATAKI
Internetan jw.org cheqar mantañatak tarjetampejja, kunjamsa facilak yatiyasma uk pusi toqet yatjjatam.
Internetan jw.org cheqar apir tarjetanakamp yatiyañataki (1:43)
Kunanakas suma yatiyäwinak predicañatakejj yanaptʼiristam uk yatjjatam.
“¿Diosat yatichañatak wakichtʼatätati?” (Yatiyañataki septiembre 2020)
Jiskʼa wawanakarojj kunas jan ajjsaras predicañatak yanaptʼaspa uk videon uñtam.
Jehová Diosar jan uñtʼapki uka familiaranakamarojj kunjamsa Bibliat parlasma uk yatjjatam.
“Jan cristianöpki uka familiaranakan chuymanakapar kunjams purtʼsna” (Yatiyañataki marzo 15, 2014)