34 YATICHÄWI
¿Kunjamsa Jehová Diosar munasitas uñachtʼaysna?
¿Bibliat yatjjatasajj Diosarojj jukʼampis jakʼachaskasma ukhamti amuyasta? ¿Jupampejj jukʼamp suma amigöñ munasmati? Ukhamächi ukhajja ak amtañamawa, Jehová Diosatï jupar munasitam uñjani ukhajj jukʼampwa munasïtam, cuidarakïtamwa. ¿Kunjamsa jupar munasitam uñachtʼayasma?
1. ¿Kunjamatsa Diosar munasitas uñachtʼaysna?
Jehová Diosar istʼas sarnaqtan ukhajja, jupar munasitaswa uñachtʼaytanjja (1 Juan 5:3 liytʼäta). Ukampis jupar istʼañasatakejj janiw obligkistuti. Jan ukasti juparut istʼañäni janicha uk sapa mayni amtañaswa muni. ¿Kunatsa ukham sistanjja? Jehová Diosajj jupar ‘taqe chuyma istʼañaswa’ muni (Romanos 6:17). Mä arunjja, jupar munasiñat istʼsna ukwa muni, janiw obligatak jupar istʼañas munkiti. Jehová Diosarojja kunatï gustki uk lurasa, kunatï jan gustki ukanak jan lurasaw munasitas uñachtʼaysna. Aka libron 3, 4 seccionanakapajj uka amtampi lurtʼatawa.
2. ¿Kunatsa Jehová Diosar munasitas uñachtʼayañajj chʼamakïspa?
“Cheqap sarnaqer jaqen jan waltʼäwinakapajj waljawa” (Salmo 34:19). Taqeniw jan pantjasiñatakejj chʼamachastanjja. Ukhamarus inas awisajj qollqet pistʼata, yaqhanakamp ina chʼusat tʼaqesiyata, jan ukajj yaqha ukham jan walinakan uñjasirakstan. Jan walinakan uñjasisajja, kun lurañastï Jehová Diosajj munki uk lurañajj chʼamakïspawa, jupar jan istʼañaw facilakïspa. Ukampis kuntï Jehová Diosajj maykistu uk lurañatak chʼamachastan ukhajja, taqe kunat sipansa jupar munasitaswa uñachtʼaytanjja. Ukatjja jupat jan jitheqtataswa uñachtʼayaraktanjja. Ukham luratasatwa jupajj jan jaytjkistaniti, janirakiw apanukkistaniti (Salmo 4:3 liytʼäta).
JUKʼAMP YATJJATAÑÄNI
Jehová Diosar istʼas sarnaqañajj kunatsa wali importantejja, jupat janipun jitheqtañatakejj kunas yanaptʼistaspa uka toqenakatwa jichhajj yatjjatañäni.
3. Supayajj kʼarinakwa jumjjat parli
Job librorjamajja Supayajj kʼarinakwa Job chachat parläna, ukampis janiw Job contrakejj ukham parlkänti, jan ukasti khitinakatï Jehová Diosar serviñ munapki ukanak contras kʼarinak parlarakïnwa. Job 1:1 ukat 1:6-2:10 liytʼasajja aka toqetwa parltʼapjjäta:
Supayan arunakaparjamajja, ¿kuna laykukis Job chachajj Jehová Diosar servïna? (Job 1:9-11 uñjjattʼapjjäta).
¿Kuna kʼarinaksa Supayajj taqe jaqenakatsa jumatsa parli? (Job 2:4 uñjjattʼapjjäta).
Job 27:5b liytʼasajja aka toqetwa parltʼapjjäta:
¿Kunjamsa Job chachajj Jehová Diosar cheqapun munasitap uñachtʼayäna?
Jehová Diosar munasitapjja, jupat jan jitheqtasaw Job chachajj uñachtʼayäna.
Jehová Diosar munasitasjja jupat jan jitheqtasaw uñachtʼaysna.
4. Jehová Diosan chuymap kusisiyam
Proverbios 27:11 liytʼasajja aka toqetwa parltʼapjjäta:
Diosar istʼas jumajj sarnaqta ukhasa suma amtanakar purta ukhasa, ¿kunjamsa Jehová Diosajj jikjjataspacha? ¿Kunatsa ukham amuyta?
5. Jumajja Jehová Diosarojj jan jitheqtasaw servisma
Jehová Diosarojj munastanwa, ukatwa jupjjat yaqhanakarojj parlaraktanjja. Jan walinakan uñjaskasas jupat jan jitheqtatas laykuw yatiyaskaktanjja. VIDEO uñtasajja aka toqetwa parltʼapjjäta:
¿Jehová Diosat yaqhanakamp parlañajj jumatakejj chʼamakiti?
Uñtktan uka videorjamajja, ¿kunas Grayson chacharojj jan ajjsarirïñatak yanaptʼäna?
Kunanaktï Jehová Diosajj munaski ukanakar munastan ukhasa, kunanaktï jupajj uñiski ukanakar uñistan ukhas jupar jan jitheqtas serviñajj jukʼamp facilakiwa. Salmo 97:10 liytʼasajja aka toqetwa parltʼapjjäta:
Kunanaktï jichhakamajj yateqkta ukarjamajja, ¿Diosajj munaski ukanakat mä qhawqhanakajj kunanakasa? ¿Jupajj uñiski ukanakat mä qhawqhanakajj kunanakarakisa?
Kunatï walïki ukar munasiñatakisa kunatï jan walïki ukar uñisiñatakisa, ¿kunas jumarojj yanaptʼiristam?
6. Jehová Diosar istʼañajj yanaptʼistuwa
Jehová Diosar istʼañajj yanaptʼapunistuwa. Isaías 48:17, 18 liytʼasajja aka toqetwa parltʼapjjäta:
¿Jehová Diosajj kunatï jiwasatak walïki uk sum yati sasajj kunatsa sasma? ¿Kunatsa ukham amuyta?
Bibliat yatjjatañasa cheqpach Diosar uñtʼañasa, ¿kunjamsa jichhakamajj yanaptʼawaytam?
YAQHEPANAKAJJ AKHAM SAPJJEWA: “Kuntï nayajj lurkta ukajj janiw Diosarojj importkiti” sasa.
Kuntï lurktan ukajj Jehová Diosarojj kusisiyaspawa jan ukajj llakisiyaspawa, ¿ukhamätap kawkïr textompis qhanañchasma?
¿KUNSA YATEQAWAYTAN?
Jehová Diosar munasitamjja jupar istʼasa, jan walinakan uñjaskasas jupat jan jitheqtasaw uñachtʼayasma.
Amtañataki
¿Kunsa jumajj Job chachan sarnaqäwipat yateqasma?
¿Kunjamsa Jehová Diosar munasitam uñachtʼayasma?
¿Kunas Jehová Diosat jan jitheqtañatakejj yanaptʼiristam?
JUKʼAMP YATJJATAÑAMATAKI
Jehová Diosampita congregacionampit jan jitheqtañatakejj kunas yanaptʼiristam uk yatjjatam.
Diosajj jupar jan jaytjirirojj janirakiw jaytjkaniti (16:49)
Supayajj jaqenak contrajj kuna kʼarinaksa parläna uk yatjjatam.
Wawanakajj kunjamsa Jehová Diosar munasipjjatap uñachtʼayapjjaspa uk videon uñtam.
¿Wayn tawaqonakajj kunjamsa Jehová Diosat jan jitheqtañatakejj masinakapamp jan apayasipkaspa?