Bolivia markat qillqanita

Pisinkkasas kusisitaw jakasi

JICHHAK nayrar sartaski uka markanakanxa walja maranakaw misionerjam yatiyta, ukampis pisin jakañarux janiw jichuntañjamäkiti ukat jan mä suytʼäwini jaqinakar uñjañas llakisiñjamawa. Ukham tʼaqhisiñanakan jankʼaki tukusxañap munta. Chiqas uka tʼaqhisiñanaksa jan waltʼañanaksa Jehová Diosan Apnaqäwipakiw tukjani. Jan waltʼañanakasa tʼaqhisiñanakas utjkchixa, Diosan Aruparjama sarnaqapki ukanakax wali kusisitaw jikxatasipxi uksa walja kutiw uñjarakta. Jupanakat maynïrixa Sabinawa.

Chachapax yaqha markaruw irnaqäw thaqhir sarxatayna, phaxsinaka, maranakaw pasxäna janiw kuttʼanxänti. Sabinakiw Milena ukat Ghelian sat pä jiskʼa wawanak qʼiptʼata qhipharxäna. Ukat aksarux sapüruw Sabinax phuchhanakapamp nayrar mistuñataki irnaqtʼi.

Mä jaypʼuxa kullakapan tiendapankaskataynawa, alasirinakar wali pacienciampiw ukan aljaskäna ukanwa jupar uñtʼawayta. Uru jurnala irnaqasin wali qaritätapaxa uñnaqapan qhanaw amuyasïna. Biblian yatichäwinakapat yatichtʼäma satax akham situwa: “Muniristawa, ukampis janiw tiempox utjkituti. ¿Janit jumamp wawanakajax Bibliat yatxatapkaspa?” sasa. Wawanakaparux jaypachaw Bibliat yatichxayäta, ukhamatwa Sabinarux sumpach uñtʼawayta ukat kunjamsa jakasïna uks yatirakta.

Sabinax pusi willjta horasatwa irnaqañ qallti. Ukañkamax wawanakapax ikisipkiwa, nina naktayasaw empanadanak aljañatak wakichtʼi ukhamat qullqi familiapatak jikxatañataki. Jaypʼutwa empanada lurañatak jakʼu chapuntawayi ukat empanadar uchañatakixa chʼimir khuchunuqtʼat aychsa waykʼitampiw mä mirqʼi aluminio phukhuru phaytʼaraki.

Uk tukuyasaxa, kʼachhitatwa maytʼat mä carritor akanak apxati: mä chʼiwiña, mä garrafa, mä jiskʼa cosina, mä mesa, quntʼañatak banquitonaka, phukhunaka, aceite, waykʼan aycha phayatampi empanadatak chaput masampi ukat frutat lurtʼat walja litronak frescomp aparaki.

Sabinamp wawanakapampix suxta alwa horasax aljir sarañatakix wakichtʼatäxapxiwa. Jan kun parlasa amukiw candadompi utap llawintas misttawayapxi, utapax mä jiskʼa cuartokiwa. Janiw maynis parlkiti ni lartʼkarakisa. Urux wali jayäkaspas ukhamawa jupanakax qaritäxapxiwa. Misioneronakataki lurata uka utatxa, sapa kutiw ukhamanak uñjapxta. Bolivia markanxa walja warminakaw ukham wali alwat sartasin callenakaru manqʼa aljir sarapxi, Sabinax uka warminakat maynïriwa.

Niyaw suxta alwa chikatanïxi, Intisa jachʼa qullu taypit niyaw uñstaniraki, kawkhantï aljasirïki uka esquinaruw Sabinampi phuchhanakapamp puripxi. Janiw khitis arskiti, carritot qʼipinak apaqasaxa jankʼakiw manqʼa aljañ puestop waktʼayapxi. Sabinaxa wallaqkir aceiteruw nayrïri empanada apanti. Empanada thixitax wali sum qʼaphipanxa manqʼat awtjat jaqinakax jakʼakiw alasir jutapxi.

“¿Qhawqsa munta?”, sasaw Sabinax nayrïr alasiriru jisktʼi. Alasirix iki machatpachaw jan pʼiq unxtayas pä lukʼan uñachtʼayi. Mä qhawqha qullqiruxa, wali suma thixirtʼat qhatirkiri pä empanadanak Sabinax churi. Uka alwax walja kutiw alasirinakax ukham jutapxi. Aljañ tukuyasaxa, puestop apthapisaw utar kuttʼanxapxi. Uka alwax wali jayäkaspas ukhamaw Sabinatakixa ukat kayunakapas usurakiwa, ukampis janiw utan qhiparkiti, kunattix kullakapan tiendapar aljir sarañaparakiwa.

Bibliat yatichkayäta ukhax Milenax 9 ukat Ghelianax 7 maranïsipkänwa, ukat tiendanxa mamapax niyaw pä jiskʼa banconak mä kʼuchitur usktʼatayna. Bibliat yatiqañ qalltapkäna ukhatpachaw jiskʼa imillanakax wali sum wakichtʼasis kusisit suyapxirïtu. Wali axsarirïpxänwa ukampis jukʼat jukʼat janiw ukhamäxapxänti, ukhamatwa amigäxapxayäta. Uk uñjasaw Sabinax wal kusisïna ukat janis tiemponïkchïnxa taqi chuymaw Bibliat nänakamp chika yatiqañ qalltawayi.

Sabinax jukʼamppach Bibliat yatxatxäna ukhax Jehová Diosatak munasiñapax jukʼampiw jilxattarakïna. Mä jukʼa tiempotxa wali kusisitaw jikxatasxäna nayrax janiw ukhamäkänti. Wali llakita, qarita ukhamaw callenakan sarnaqasirïna ukampis jichhax janiw ukhamäxänti. Sartatapasa janiw pachpäxänti, kusisiñatxa nayranakapax kʼajkaspas ukhamänwa. Kullakapasa ukham mayjtʼatap amuyarakïnwa, ukat mä kutix akham sänwa: “Sabinax kusisitaw lartʼasis sarnaqi, nayrax janipuniw lartʼasirïkänti” sasa. Janiw kullakapakix Sabinan mayjtʼatap amuykänti. Sabinaxa jichhax Diosar sum uñtʼxäna ukaw jupatak wali kusiskañänxa.

Sabinax wali kusisitaw Bibliat yatxatäna, ukampis jan tiemponïtapatxa janiw tantachäwinakar sarkänti. Mä kutixa Tantachasiñ Utaruw jutatayna, ukat jichhakamax tantachäwinakarux sarapuniwa. Tantachasiñ Utanxa chiqpach amiganakwa jikxatäna. Ukatxa khitinakatï Jehová Diosar taqi chuym munasipki ukat Jupar luqtañataki chʼamachasipki ukanakax bendicionanak katuqapxatapsa Sabinax amuyxänwa (Lucas 12:22-24; 1 Timoteo 6:8).

Yatiqkäna ukar wali askit uñjasaw yaqhanakar yatichtʼañ amtarakïna. Ukampis jan uñtʼatanakar yatiyañ wal axsartʼayasïna. “Axsarirïtwa janirakiw yatiqañ utar sarañs tukuyawaykti. ¿kunjamaraki yaqhanakar yatichiriststi?”, sasaw sirïna. Ukampisa, jakäwipax Biblian yatichäwinakapampix wali sumäxatapatsa ukat wali munasiñ chuymamp uñjatäsasa jupax wal yuspäräna, ukatwa yaqhanakar Bibliat yatiyir mistuñ qalltawayi. Ukat wawanakapan jupat yatiqasiñapwa munarakïna. Sabinax Bibliat yatiyir sarañ qalltxäna ukhatpachaw phuchhanakapax wali kusisita jupamp chika yatiyir sarapxi.

Jichhaxa, pisin jakasisa sapüru wal irnaqasin qarita jan kuna suytʼäwini warminakat sipansa, Sabinan jakäwipax mayjäxiwa. Janis qamirïkchixa, ukampis mä suma suytʼäwiniwa. Jichhaxa bautisata cristianawa, ukatwa yaqhanakarux Biblian qillqat suma suytʼäwit yatiyaski, uka suma yatiyäwix akawa: Jehová Diosan Apnaqäwipax niyaw tʼaqhisiñanak aka Uraqpachat chhaqtayani (Mateo 6:10).

Niyaw phisqa willjta urasäxi, Sabinax utat mistuñatakix wakichtʼatäxiwa. Ukampis jichhürux janiw empanadanak aljir sarkaniti jan ukasti jilat kullakanakamp jikisiriw saraski callenakanwa Diosan Arupat yatiyapxani. Uka yatiyäwinakax yaqhanakaruw wal kusisiyi ukwa Sabinax sum amuyi ukatwa yatiyir sarañatak tiempo apstʼasi. Ukhamax wali kusisitaw uta punku jistʼantawayasax callenjam aynach tuqir saraqawayi. Mä carrito nukhuñat sipansa, jaqinakar suma suytʼäwi churañatakiw Bibliat apstʼat qillqatanak mä bolsar apaski. Wali kusisitaw uñnaqi ukat akham siwa: “Janipuniw yaqhanakar Biblian yatichäwinakapat yatiykiristti sayätwa, ukampis jichax wali kusisitapuniw yatiyta” sasa.