Imantat suma yänakaw jikxatasitayna
¿AKATJAMAT wali valoran suma yänak jikxatirïtati? 2005 maran marzo phaxsit 27 urunak saraqatarux Ivo Laud sat jilatarux ukaw pasatayna, jupax Alma Vardja chuymankipstat kullakaruw Estonia markan mä thantha uta allitatañ yanaptʼaskäna. Maynïr pirqa allthapisax machón ladonxa, mä tabla uñjapxäna. Uka tabla apaqapxäna ukhaxa, yaqha jiskʼa tabla jikxatapxäna, uka tablax mä jiskʼa pʼiya imxattʼäna, anchorux 10 centimetroni, alayarusti 1,25 metroni ukat manqharux 10 centimetroniraki. (1) ¡Ukanwa wali valoran yänakax imantatäna! ¿Kunanakäpachänsa? ¿Khitis ukar imantpachäna?
Thuru papelar wali suma chʼuqanttʼat paquetenakänwa. (2) Jehová Diosan Qhanañchirinakapan Bibliat apstʼat qillqatanakapaw uka paquetenakankäna, uka qillqatanakatxa Yatiyañataki sat revistan taman yatxatañatak yatichäwinakaw jukʼamp utjäna (yaqhipasti 1947 marata). (3) Ukanakaxa, amparamp yäpar qillqtʼatänwa, estonio aruta. Uka paquetenak uñarasax documentonakwa jikxatapxäna, ukhamatwa khitis ukar uka qillqatanak imantatayna uk yatipxäna. Uka documentonakax Alma sat kullakana, Villem Vardja sat chachapar policiax jisksutayna uka informenakänwa. Ukat carcelankän uka maranakat informenakarakiw ukankäna. ¿Kunatsa carcelankpachäna?
Villem Vardja jilatax Tartu sat tama uñjirïna ukat qhipatsti Otepää sat tamwa uñjarakïna, paypach tamax Estonia markankänwa, uka markax nayra Repúblicas Socialistas Soviéticas uka taypinkänwa. Amuyatatx janïr Payïr Jachʼa Chʼaxwäwi qalltkipänwa Bibliat yatiqawaypachäna. Ukat 1948 maranwa diciembre phaxsit 24 urunak saraqatar comunistanakax carcelar jistʼantapxatayna, Diosan Apnaqäwipat yatiyatapat inas jistʼantapxchïna. Ukat Jehová Diosan mayni Qhañanchirinakapan sutip yatiyañapatakiw policianakax wal jupar waytʼapxatayna. Jumax tribunalar jarkʼaqasir janiw sarkasmati sasaw sapxatayna, uk sasinxa tunka maratakiw Rusia markar carcelan jistʼantatäñapatak apxapxatayna.
Villem jilatax 1990 maran marzo phaxsit 6 urunak saraqataruw jiwxatayna, ukürkamaw Jehová Diosat jan jithiqtas luqtawayatayna. Warmipax uka paquetenak utjatapx janiw yatkänti. Inas uka jilatax policianakat jarkʼaqañatak jupar jan kamskchïnti, ukhamat policianakax jisktʼapxasapän ukhax jan kuns arsuñapataki. ¿Kunatsa Bibliat apstʼat qillqatanak imantpachäna? Kunattix Comité de Seguridad del Estado soviético (KGB) ukankirinakaw jilat kullakanakan utanakapar Bibliat apstʼat qillqatanak akatjamat thaqhir mantapxirïna. Qhawqsay KGB ukankirinakax aparasipkchisapänxa, jilat kullakanakax Diosan yatichäwinakap katuqasipkakiñapatakiw Villem jilatax uka paquetenak imantpachäna. 1990 maranwa yaqha ukham imantañ chiqanak jikxatapxatayna, maynïrix Tartu sat chiqana, Estonia markat aynach tuqina, ukax Villem jilatan luratarakïnwa.
¿Kunatsa uka paquetenakarux wali valoran yänak sistanxa? Bibliat apstʼat uka qillqatanakax yäpar amparamp qillqtʼatätapa ukat suma imanttʼatätapaxa, jilat kullakanakatakix uka qillqatanakax kunja askïnsa uk qhan uñachtʼayistu (Mat. 24:45, MT). Jumasti, ¿ukhamti uñjaskarakta? Uka qillqatanakatxa maynïrix Yatiyañataki sat revistawa, estonio aruta ukat 170 yaqha arunakatwa utjaraki, ukaw Diosan Arupat jukʼamp yatxatañ yanaptʼistu.