¿Kunatsa yaqhep jaqenakan sutipajj Biblian jan uñstkpacha?

Mä chachat parlkasajj akham sasaw Rut libron qhanañchi: ‘Juparu’ sasaki, uka chachajj janiw kuntï Moisesan leyinakaparjamajj lurañapäkän uk phoqherjamäkänti (Rut 4:1-12). Ukhamajja, ¿jan wali jaqenakäpjjatapatti jan ukajj jan wakiskirïpjjatapatcha sutinakapajj Biblian jan uñstkpacha?

Janiwa. Yaqha toqet amuytʼañäni. Jesusan jiwañap jakʼäjjäna ukhajja, janïr Pascua fiesta amtkasinwa arkirinakaparojj sarapjjam markaru, “mayni jaqen utaparu” ukat Pascua fiesta amtañatakiw mä uta wakichapjjäta sasin säna (Mateo 26:18). Uka jaqejj qhorüpachänwa jan ukajj janiw wali wakiskirïkpachänti sasin amuyañajj ¿walikïskaspati?, janiwa. Uka chachajj Jesusan mä arkiripänwa, ukampis sutip aytañajj janiw wakiskapunïnti.

Ukampis Bibliajj walja qhoru jaqenakan sutipwa ayti, ukat walja suma chuyman jaqenakan sutinakapsti janiw aytkarakiti. Sañäni: waljaniw Eva sat nayrïr warmin sutip uñtʼapjje. Ukampis jupatakik kuns munatapata ukat jan istʼasirïtapatwa Adán chachaparojj juchar purtʼasiyäna, ukajj jan walirupuniw aptʼawayistu (Romanos 5:12). Maysa toqetsti, Noé chachan warmipajj wali qʼapha ukat istʼasirïkchïnsa janiw sutipajj Biblian uñstkiti, jupajj wali wakiskir luräwinwa chachaparojj yanaptʼäna. Ukhamajj Biblian sutip jan uñstatapajj janiw sañ munkiti jan wakiskirïtapa ni Diosamp jan askit uñjatätapa.

Bibliajj yaqha jaqenakan sarnaqäwinakapat parlarakiwa, janisay sutinakapajj Biblian jikjjataskchejja, Diosan amtap phoqhasiñapatakis yanaptʼapjjarakïnwa. Jan ajjsartʼir mä imill wawat amtañäni, jupasti asirionakan ejercitop pʼeqtʼir Naamanan warmipatakiw esclavat serviskäna. Ukat jan ajjsartʼasaw Naamanan warmiparojj Diosan profetapat parläna, uka profetasti Israel markankaskänwa. Ukham jan ajjsartʼas parlatapatjja, mä milagrow utjarakïna (2 Reyes 5:1-14). Yaqha wali yateqaskay sarnaqäwejj Jefté chachan phuchaparakiwa. Jupajj awkipan arsutap laykojj janiw casaraskänti ni wawanïkarakïnsa (Jueces 11:30-40). Ukat 40 jila salmonak qellqerinakan sutinakapas janiw Biblian uñstkiti, ukat Diosat jan jitheqtas loqtir yaqhep profetanakan sutinakapas janiw uñstkarakiti (1 Reyes 20:37-43).

Ukat ¿angelanakat kamsasirakispasa? Jupanakajj millón millonanakapkchisa, Biblian pä sutinakakiw jupanakat uñsti, ukanakasti akanakawa: Gabriel ukat Miguel (Daniel 7:10; Lucas 1:19; Judas 9). Mayni angelanakan sutinakapajj janiw yatiskiti. Mä kutejj akham sasaw Sansonan Manoa awkipajj mä angelar jisktʼäna: “Sutimaksay avisawayapjjeta, kunsatätasa uka, ukhamata kunapachatejj arsutanakamajj phoqhaskani ukkhajja jumaru yuspagarañataki” sasa. Ukham satajj angelajj akham sänwa: “¿Kunatakisa jumajj sutejja yatiñ munta?” sasa. Jehová Diosarukiw jachʼañchäwi katoqañajj waktʼi, ukatwa uka jachʼañchäwi jan katoqañ laykojj uka angelajj sutip jan yatiykänti (Jueces 13:17, 18).

Kunatsa yaqhepanakan sutinakapajj Biblian jikjjataspacha ukat yaqhepanakan janiraki, uk Bibliajj janiw qhanañchkiti. Ukampis walja askinakwa khitinakatï Diosar taqe chuyma loqtawayapki ukanakat yateqassna, jupanakajj janiw wali aytatäñ laykojj Jehová Diosar serviwayapkänti.