¿Kunatsa tʼaqhesiñajj wal utjpacha?

JAN WALI APNAQERINAKA

“Kunapachatejj qhoru jaqenakajj jilïrit apnaqapki ukkhasti, jaqenakajj waliw tʼaqhesipjje.” (Proverbios 29:2.)

Akapachan sarnaqäwipajj qhoru ukat munañapar apnaqerinakamp phoqhantatawa, ukat ukham apnaqerinakaw markachirinakapar tʼaqhesiyawayapjje. Cheqans janiw taqpach apnaqerinakajj ukhamapunïpkiti, kunattejj yaqhepanakajj wali sum markachirinakapar yanaptʼañ munapjje. Ukampis marka apnaqerjam uttʼayatäsin wals yanaptʼañatakejj chʼamachasipkchejja, janiw uk lurirjamäpkiti kunattejj jupanakkama ukat mark apnaqañ munañjjat chʼajjwañanakakiw utjaski. Ukat awisajj markapar yanaptʼañat sipansa, jupanakan askipak thaqjjapjje. Henry Kissinger sat chachajj Estados Unidos markan secretariopänwa, jupajj akham siwa: “Akapach sarnaqäwejja, sapa apnaqerinakan jan waltʼäwinakapakiw kutin kutin uñjasiski ukat sum lurañs amtapkchejja janiw ukhampun phoqhapkiti” sasa.

Bibliajj akham siwa: ‘Jaqejj janirakiw sarnaqäwipsa sum apnaqkaspati’ (Jeremías 10:23). Ukhamajj pantjasir jaqenakjamajj janiw mayni pachpas sum apnaqasirjamäktanti, ukhamajj ¿kunjamatarak mä jaqejj markpachar apnaqaspasti? ¿Amuytanti, kunatsa akapach apnaqerinakajj tʼaqhesiñ jan chhaqtayirjamäpki? Ukampis jila partejj jupanak pachpaw jan waltʼäwinak uñstayapjje.

KʼARI RELIGIONANAKA

“Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama.” (Juan 13:35.)

Munasiñaw utjañapa ukat mä wawakiw sarnaqañasa sasaw akapachankir religionanakan pʼeqtʼirinakapajj wal parlapjje, ukampis arkirinakaparojj munasiñaw jiskʼachasiñanakar atipjañapa sasin janiw sum amuytʼayapkiti. Antisas munasiñ utjayañat sipansa, uñisiña ukat jaqenak purasa markanak puras tʼaqa tʼaq sarnaqapjjaspa, ukanakaruw chʼamañchapjje. Ukat Hans Küng Biblia toqet yatjjattʼat chachajj El cristianismo y las grandes religiones sat libropan niya tukuyäwipan akham sasaw qellqatayna: “Política toqet wali tʼaqheskañ chʼajjwäwinaka ukat wila wartäwinakjja, religionanakaw utjayawayi” sasa.

Ukampis religionanakan pʼeqtʼirinakapajj janïr casaraskasin wachoq juchan sarnaqaskañasa ukat chacha pura jan ukajj warmi pura sarnaqaskañas walikïskaspas ukham jaqenakar amuyayapjje. Ukat ukham qʼañu luräwinakan sarnaqañajj kunayman usunaka, sullsuyañanaka (aborto), jan waw munas usuriptañanaka ukat jaqechasïwinakarusa, familianakarus aynachtʼayawayiwa, taqe ukanakajj chuym ustʼayasiña ukat tʼaqhesiñanakakwa utjayawayi.

JUCHANAKASAMPI UKAT MUNAÑANAKASAMP APNAQAYASIÑA

‘Maynejj ñanqha amtäwinakaparjamaw yantʼat uñjasi, ukampiw katuntayasi sallqjayasiraki. Uka jan wali amtäwinakatwa juchajj sarti.’ (Santiago 1:14, 15.)

Niyakejjay juchararastänjja, taqeniw pantjassna. Ukampis jañchin munañanakapaw jan wali luräwinakar apistaspa ukanakar saykatañatakiw chʼamachasiñasa (Efesios 2:3). Ukat kunapachatï jan wali munañanakajj chuymasan utjaspa ukhajja, wali chʼamäspaw ukanakar saykatañajja, ukampis atipayasiñäni ukhajja, kunayman jan walinakanwa uñjassna.

Uka toqet P. D. Mehta sat yatjjatatajj akham sasaw qellqatayna: “Jila parte tʼaqhesiñanakjja, mayni pachpaw utjayaspa qʼañu luräwinakan sarnaqañ munasa, jañchin munañap thaqhasa, jupatakik kuns munasa ukat jupan askipak thaqhasa” sasa. Ukat jañchin munañanakapat akanakäspawa: alcohol umañanaka, droganakamp qolljasiñanaka, anatañanaka, wachoq jucha lurañanaka ukat yaqha ukhamanakampi, taqe ukanakajj walja jaqenakaruw aynachtʼayawayi ukhamarak familiaranakaparusa ukat amigonakaparusa. Ukhamajj niyakejjay taqenis pantjasirïstanjja, Biblian qellqatapajj cheqäskapuniwa “yattanwa kunjämtejj aka Diosan lurat oraqejj wal tʼaqhesiski, kunjämtejj mä wawachasir warmejj warariski ukhama” (Romanos 8:22).

ÑANQHA AJAYUNAKA

Supayaw “akapach diosajj” sasaw Bibliajj qhanañchi, ukat yanapirinakapas wali chʼaman ajayunakawa ukanakajj sajjranaka satäpjjewa (2 Corintios 4:4; Apocalipsis 12:9).

Sajjranakajj Supayjamarakiw jaqenakar pantjasiyañ munapjje. Uka toqet apóstol Pablojj akham sänwa: ‘Janiw jaqenak toqejj nuwasktanti, jan ukasti alajjpachanakankiri ñanqha ajayunak toqew nuwastanjja, khitinakatejj aka chʼamak oraqen munañampi apnaqapki ukanak contra’ sasa (Efesios 6:12).

Sajjranakajj janiw jaqenakarojj aleqak pantjasiyañak munapkiti, jan ukasti Alajjpachankir Jehová Diosat jitheqtayañ munapjje (Salmo 83:18). Ukat kunayman toqetwa Supayajj jaqenakar sallqjje, ukanakat mä qawqhajj akanakawa: warawaranak uñchʼukisin jutïr urunakat yatiña, layqasiñanaka ukat yaqha ukhamanakampi. Ukatwa Jehová Diosajj “uka jan walinakat amuyasipjjam” sistojja, ukat khitinakatï ñanqha ajayunakar saykatañatak chʼamachasisipki ukanakarojj Diosajj yanaptʼarakiwa (Santiago 4:7).

‘QHEPA URUNAKANWA’ JAKTANJJA

Khä niya pä waranqa nayra maranakanjja, akhamwa Bibliajj satayna: “Yatiñamarakiwa, qhepa urunakanjja jan wali tiemponakaw jutani” sasa.

Ukat saskakïnwa: “Jaqenakajj michʼaw tukupjjani, qollqe chuymaraki, jachʼa jachʼaw tukupjjani, jilamp parlirinakaraki [...], jan munasiñanïpjjaniwa ukhamarak jan khuyapayasiñani, arunak apnaqerinaka, jan wali luräwinakapjja janiw apanukupkaniti, wali qhorunakäpjjaniwa, aski luräwinakan uñisirinakaparakïniwa. Aljantasirïpjjarakiniwa, jan ajjsarasaw kuna jan walsa arsupjjarakini, jachʼa jachʼa tukuñampi phoqhantatäpjjarakiniwa, jupanakan pachpa munañanakapakwa thaqapjjani Diosan munañap thaqañat sipansa”. Ukhamajj ‘qhepa urunakan’ jakaskatasatwa tʼaqhesiñanakajj utjaraki (2 Timoteo 3:1-4).

Kunjamtï aka qellqatan uñjawayktanjja, jaqenakajj tʼaqhesiñanak chhaqtayañsa munasipkchejja, janiw chhaqtayirjamäpkiti uk sum amuyawaytanjja, ukhamajj ¿khitirus yanap maysna? Diosaru. Jupasti, ‘Supayan luratanakaparu’ ukat arkirinakaparojj tʼunjäwa sasinwa arsuwayi (1 Juan 3:8). Jutïr yatichäwinjja, tʼaqhesiñanak chhaqtayañatakejj kunsa Diosajj lurani uka toqetwa yatjjataskañäni.