¿Yatiyätati?

Biblia qellqaskäna uka tiemponakanjja, ¿kunatsa jaqenakajj isinakap chʼiyanoqasipjjerïna?

BIBLIANJJA, kunatsa isinakap chʼiyanoqasipjjerïna ukanakat wal parli. Jichha tiempon ukham lurañajj inas mayjächispa, ukampis judionakatakejj janiw ukhamäkänti. Chuyma ustʼata, jiskʼachata, llakita, colerata ukat jan kuns kamachtʼirjam jikjjatasipkäna ukhaw ukham lurapjjerïna.

Amuytʼañataki, Jacobon Rubén wawapajj José sullka jilapar esclavjam aljapjjatap yatisajja, “isipa chʼiyanoqasïna”, ukampis janiw kuns kamachirjamäkänti. Jacob awkipasti monte animalaw wawajarojj manqʼantpacha sas amuyasaw ‘isipa chʼiyanoqasïna’ (Gén. 37:18-35). Job chachar taqpach wawanakamaw jiwarata sasin yatiyapkäna ukhajja, isipwa chʼiyanoqasïna (Job 1:18-20). Mä khita jaqejj ‘isip chʼiyanoqasisaw’ akham sas Elí sacerdoter yatiyäna: ‘Israelitanakajj chʼajjwäwinwa atipjayasipjje, pä yoqamas jiwayatawa, ukat Diosan arcapsa uñisirinakaw apasjjapjje’ sasa (1 Sam. 4:12-17). Ukhamarakiw Josías chachampejj pasäna, Diosan Leyip liytʼir istʼasajj “isip chʼiyanoqasïna”, kunattejj israelitanakajj janiw ukarjam phoqapkänti (2 Rey. 22:8-13).

Jesusajj juchañchata uñjaskäna ukhajja, jilïr sacerdote Caifasajj ‘isinakap chʼiyanoqasisaw’ akham säna: ‘Arunakapampejj Diosaruw jiskʼachi’ sasa (Mat. 26:59-66). Rabinonakajj akham sasaw yatichapjjäna: ‘Diosan sutip jiskʼachir istʼapjjäta ukhajja, isinakamwa chʼiyanoqasipjjañama’ sasa. Ukampis Jerusalén templojj tʼunjatäjjäna uka qhepatjja, akham sisjjapjjarakïnwa: “Jichhajj khititï Diosan sutip jiskʼachiri istʼani ukajja, janiw isinakap chʼiyanoqasiñapäjjeti, ukham lurani ukhajja, isinakap jiskʼa jiskʼaruw chʼiyanoqasini” sasa.

Ukhamasti maynejj cheqapuni chuym ustʼayasis isinak chʼiyanoqaskäna ukhakiw Diosajj wali askit uñjäna. Ukatwa Jehová Diosajj markapar akham säna: “¡Jumanakasti Tatitu Diosamar kuttjjapjjam, isinakama chʼiyanoqkamayjja, chuymanakamaya chʼiyanoqapjjamjja!” sasa (Joel 2:13).