BIBLIA TOQET JISKTʼANAKA
¿Kuna amtamp luratäpachas aka Oraqesajja?
Oraqejj jaqenakan kusisita jakasipjjañapatak lurtʼatänwa
Oraqejja, jakäwi utjañapatak suma lurtʼatawa. Ukat umas waljaw ukan utjaraki, cheqas ukaw jakañatakejj wali wakiskirejja. Oraqejj janiw sinti altʼatäkis ni sinti saytʼatäsisa, ukat kawknämtï muytañapäki ukanjamwa muytaraki, ukhamatwa jachʼa lamar qotanakajj jan chhullunktʼkiti ni phututtasins umajj tukstkarakiti. Ukat jarkʼaqer samanapas (atmósfera), campo electromagnético satäkis ukasa, jan wali qhananakat jarkʼaqarakiwa. Animalanakampi, alinakampis purapat yanaptʼasisaw jakasipjjaraki. Taqe ukanak uñjasaw waljanejj aka Oraqejj mä amtampi luratäpachawa sasajj amuyapjje. (Isaías 45:18 liytʼäta.)
Ukampis ina chʼusat tʼaqhesiñanakampi, llakinakampi phoqantatarakiwa. Ukatwa yaqhepajj akham jisktʼasipjje: ‘¿Diosajj aka Oraqen ukanak utjañapti munpachäna?’ sasa. (Deuteronomio 32:4, 5 liytʼäta.)
Oraqejj kuna amtampi lurtʼatäkiti ukajj ¿phoqaspachäniti?
Oraqejja, jaqenakan kusisita maynit maynikam respetasisa ukat taqe kun Luriri Diosar munasa jakasipjjañapataki lurtʼatawa. Ukhamajja, jaqenakajj mä amtampi lurtʼatarakïtanwa. Animalanakata ukat alinakat sipansa jiwasajj khitis Lurawayistu uk sum yattanjja ukat Jupat yateqasiñwa munaraktanjja, Jupajj munasiri ukat cheqaparu uñjiriwa. (Eclesiastés 12:13 ukat Miqueas 6:8 liytʼäta.)
Taqe kun Lurir Diosajja, kuntï amtki ukjja, phoqaspawa. Ukhamajj ina chʼusat tʼaqhesiñanaka ukat llakisiñanakjja chhaqtayjjaniwa. Ukat aka Oraqjja, jaqenakan kusisita jakasipjjañapatakiw sum tukuyjjarakini. (Salmo 37:11, 29 ukat Isaías 55:11 liytʼäta.)