Taqi kunsa ‘Tatitun arunakap parlañ layku’ lurañäni
1. ¿Diosan arunakap yatiyañatakix kun lurañasasa ukat kunatsa?
1 Jaqinakan wiñay sum jakasipxañapatakix Diosan arunakap yatiyañajapuniw sasaw Pablox säna (1 Cor. 9:16, 19, 23). Uka pachpa amtanïñarakiw jiwasarux chʼamachistu, jaqinakar Diosan suma yatiyäwinakap yatiyañatakixa.
2. Yatiykasax kun lurañasasa ukat kunatsa?
2 Kuna horasasa ukat kawkhansa. Chawlla katur jaqix janiw kawkharutï qänap jaqtʼañ munki ukaru jaqtʼkiti, jan ukasti kawkhantï chawllanakax utjki ukaruw qänap jaqtʼi. Yatiyktan uka chiqanakanxa uka kikparakiw jiwasax “jaqi katuri” sarañatakix kawkhantï jaqinakax utjki ukaru sarañatak tiempo apstʼasiñasaxa, ukhamat “taqi casta chawllanaka” katsuraksnaxa (Mat. 4:19; 13:47). Ukatakixa, ¿alwasa jan ukax jaypʼusa callenakan yatiyañatak tiempo apstʼasiraksnati? Pablox kawkhans jikxatasïna uka chiqanakanxa, jaqinakarux [‘suma yatiyäwinak taqinir yatiyapunirïnwa’, NM] jupat yatiqasiñasawa (Hech. 17:17; 20:20, 24).
3, 4. Yatiykasaxa, ¿kunjamatsa jaqinakan chuymapar purtʼsna ukat kuns jikxataraksna?
3 Kunatï llakisiyki ukanakat parltʼañasawa. Chawlla katurinakax kawkïr chawlltï katuñ munapki ukatakix kunaymanitwa katuñ yatipxi. Jiwasax kawkhantï yatiyktan uka chiqanakanxa, ¿jaqinakan chuymapar purtʼañatakix kunjam arunakampis parlañ qalltsna? Nayraqataxa, wali amuyumpiw kunanakas jaqinakar llakisiyi uka tuqit parltʼañasa, ukatxa kamsanis uk sum istʼañasaraki (Sant. 1:19). Parltʼkäta uka tuqit kamsis uk yatiñatakix jisktʼañamawa (Pro. 20:5). Ukhamat kunatï llakisiyki uka tuqit parltʼarakismaxa. Pablox jaqinakar yatiyañatakix “jupanakjamaw tukta” sarakïnwa (1 Cor. 9:22). Sapa maynitakjam parltʼañax wali wakiskiriw jaqinakan chuymapar purtʼañatakixa.
4 ¡“Suma kusiskañ yatiyäwinak” apañax wal kusisiyistu! (Isa. 52:7.) Ukhamasti, taqi kunsa ‘Tatitun arunakap parlañ layku’ lurapxañäni, kunattix walja jaqinakaruw suma yatiyäwinak yatiyañ muntanxa (1 Cor. 9:23).