Jisktʼäwinaka
◼ ¿Kunatsa tantachäwin yatichaski ukanak teléfono tuqnam istʼañatak waktʼayañax wali amuyumpi uñjañasa?
Yaqhipanakax usutäpxatap layku jan ukasti kunaymanin uñjasisaw Tantachasiñ Utarux jan sarirjamäpkiti. Ukatwa jupanakar yanaptʼañatakix walja tamanakanx telefon uchayasipxi ukhamat tantachäwin arstʼaski uk istʼapxañapataki. Ukampis khitinakas uka yanaptʼanak katuqapxani ukxa wali amuyumpi uñjaña ukat sum waktʼayañaw wakisiraki. Ukatwa kawkïr irpir chuymaninakatï uk waktʼayapki ukanakax telefonx kunjamsa apnaqasiñapa uk uñjapxañapax wali wakiskirixa, ukhamat ‘taqi kunsa sum lurasiñapataki’ (1 Cor. 14:40).
Usurnukstatanakaru jan ukasti janipun tantachäwinakar sarirjamäpki uka jilat kullakanakaruw irpir chumaninakax jukʼamp yanaptʼapxañapa. Ukatxa mä jilat kullakasa jan ukax nayrar sartaskir Bibliat yatiqiris akatjamat usuntxchi ukat utat jan misturjamäxapchi ukanakaruw ukham yanaptʼasirakispa. Teléfono tuqnam tantachäwinak istʼapki ukanakax tamamp chika tantachasipkaspas ukham jakhutapxarakiwa. Yanaptʼasiñapäki ukanakar yanaptʼañatakitix taman walja telefon lineanak jan utjchi ukhaxa, tantachäwin yatichaski ukxa jupanakatakix grabtʼasirakispawa.
Ukhamarusa, tanchäwinakar sarasakipuniw wali chʼamañchtʼat jikxatasiraksnaxa. Tantachtʼasisakipuniw ‘maynit mayniru yanaptʼastanxa’ ukat machaqanakas taqpach tantachäwinakar sarañax kunja askisa uks amuyapxarakiwa. Tantachäwinakar sarasaw demostracionanakat jukʼamp yatiqtanxa, irpir chuymaninakas yanaptʼapxistu ukat jilat kullakanakax qhawqs munasipxistu uks amuyaraktanxa. Tantachasiñ Utat mistkasaw mä jilïr kullakarux munasiñampi qhumanttʼapxäna, ukhaw jupax akham säna: “¡Telefonotxa janipuniw khitis ukham aruntkitaspati!” sasa. ¡Uka arunakapax chiqäskapuniwa! (Rom. 1:11, 12.)
Ana warmix templorux sarapunirïnwa, jichhürunxa ukhamarakiw jilïr jilat kullakanakax jan sinti usutjamäpki ukhax tantachäwinakar sarasipkaraki (Luc. 2:36, 37). Wakiskchi ukhax telefonot istʼapkchisa, janiw Tantachasiñ Utar jan sarañ laykukix ukham lurapkiti. Ukhamasti, jupanakat yatiqasisin tantachäwinakar sarañatak chʼamachasisipkakiñäni, ukhamat Jehová Diosar yupaychañasataki (Sal. 95:1-3, 6; 122:1).